મહેસાણાની દૂધ સાગર ડેરીના જગુદણ ખાતે દેશની સૌથી મોટી પશુ ખોરાક ફેક્ટરી 2012માં ઉદઘાટન થયું હતું. તેના ત્રણ વર્ષમાં જ દાણ ફેક્ટરીમાં કરોડોનો ગોટાળો થયો હતો. જે મામલે આરોપી વિપુલ ચૌધરીનો પાસપોર્ટ કોર્ટ કસ્ટડીમાં છે. તેમ છતા પણ તેમણે કોર્ટ સાથે ઠગાઇ કરીને વિદેશ પ્રવાસ કર્યો હોવાનો ખુલાસો થયો છે.
સાગર દાણ કૌભાંડ કેસની તપાસમાં ખુલાસો થયો છે. જેમાં આરોપી વિપુલ ચૌધરીએ કોર્ટ સાથે ઠગાઈ કરીને વિદેશ પ્રવાસ કર્યો છે. વિપુલ ચૌધરીનો પાસપોર્ટ 2018થી કોર્ટ કસ્ટડીમાં છે. તેણે કેન્સલ થયેલો પાસપોર્ટ કોર્ટમાં જમા કરાવ્યો હતો. રીન્યુ કરાવેલા પાસપોર્ટના આધારે તેણે વિદેશ પ્રવાસ કર્યો હતો.
એપ્રિલ 2018થી ઓગસ્ટ 2018 દરમિયાન વિપુલ ચૌધરીએ આ પ્રવાસ કર્યો છે. બી-ડિવિઝનના PI મોડિયાએ હાઇકોર્ટમાં કરેલા સોગંદનામાં આ હકીકત સામે આવી છે. આ સોગંદનામાના પેરેગ્રાફ નંબર 13માં તેમણે આ હકીકતનો ઉલ્લેખ કર્યો છે. પાસપોર્ટ કોર્ટમાં સરન્ડર હોવા છતાં તેણે વિદેશ પ્રવાસ કર્યો છે.
સોગંદનામું મહેસાણા ચીફ કોર્ટમાં રજૂ કરવામાં આવ્યું છે. કોર્ટ દ્વારા આ મામલાને ગંભીરતાથી લેવાયો છે. વિપુલ ચૌધરી સામે કોર્ટ સાથે ઠગાઈ કરવાની ફરિયાદ થઈ શકે છે. આ સોગંદનામાની કોપી માત્ર વિટીવી પાસે છે.
અત્રે ઉલ્લેખનીય છે કે, સાગર દાણ ફેક્ટરીમાંથી દાણના કરોડોનો કાચો માલ ગેરવલ્લે કરી દેવાયો અને તેનો હિસાબ ન મળવાની વાત સામે આવી હતી. જેને લઇને કાર્યવાહી શરૂ કરવામાં આવી હતી. મહેસાણા દૂધસાગર ડેરીમાં અધ્યક્ષ વિપુલ ચૌધરીને પદેથી હટાવાયા બાદ કૌભાંડ થયું હતું. ત્યારબાદ દૂધસાગર ડેરીના એમડી નીશીત બક્ષીને સસ્પેન્ડ કરી દેવાયા હતા.