હાર્દિક માટે રાખેલી બાધા પૂરી કરવા પાટીદાર સમાજે કાઢી ૩૦ કિલોમીટરની સદભાવના યાત્રા

પાસ કન્વીનર હાર્દિક પટેલ દ્વારા અનામત અને ખેડૂતોના દેવા માફી મુદ્દે ઉપવાસ આંદોલન કરાયું હતું. ત્યારે આ આંદોલન સમયે હાર્દિકનું સ્વાસ્થ્ય સારું રહે તે માટે હાર્દિક પટેલના સમર્થકો દ્વારા જુદી જુદી બાધાઓ રાખવામાં આવી હતી.

આ સમયે સાબરકાંઠા અને અરવલ્લી જિલ્લાના પાટીદાર સમાજના લોકો દ્વારા પણ બાધાઓ રખાઈ હતી. ત્યારે આજે સાબરકાંઠા જિલ્લાના આદર્શ પુંસરી ગામેથી હાર્દિકના સમર્થક પાટીદાર સમાજના લોકો દ્વારા આજે અરવલ્લી જિલ્લાના મુખ્ય મથક મોડાસા ખાતે આવેલા ઉમિયા માતાજી મંદિર સુધીની ૩૦ કિલોમીટરની સદભાવના યાત્રા કાઢવામાં આવી હતી.

જેમાં 1500થી વધુ પાટીદાર સમાજના લોકો જોડાયા હતા અને ખોડલમાતાજીના રથ સાથે પગે ચાલીને મોડાસા ઉમિયામાતાજી મંદિર સુધી આવ્યા હતા. ત્યાર બાદ ઉમિયા માતાજી મંદિરે આરતી કરી યાત્રાની પુર્ણાહુતી કરી હતી. 

યાત્રામાં જોડાયેલા પાટીદાર સમાજના લોકોએ અનામત અને ખેડૂતોના દેવા માફીની માંગ સાથે હાર્દિકે ઉપાડેલા આંદોલનમાં સાથે રહેવાની અને જરૂર જણાએ રસ્તાઓ ઉપર પણ ઉતરી આવી આંદોલન ને વધુ મજબૂત બનાવવાનો વિશ્વાસ વ્યકત કર્યો હતો.