અમેરિકાના પ્રેસિડેન્ટ ડોનાલ્ડ ટ્રમ્પની અમદાવાદમાં આગમનની તડામાર તૈયારીઓ ચાલી રહી છે. કરોડોના ખર્ચે અમદાવાદનો સાજ શણગાર કરવામાં આવી રહ્યો છે ત્યારે આ કાર્યક્રમને ખાસ બનાવવા માટે દેશના જાણીતા ચહેરાઓને પણ આમંત્રણ આપવામાં આવ્યું છે. દેશના દિગ્ગજ ઉદ્યોગપતિ અને પૂર્વ ક્રિકેટર્સ આ કાર્યક્રમની શોભા વધારશે.
અમેરિકન રાષ્ટ્રપતિ ડોનાલ્ડ ટ્રમ્પ ભારત પ્રવાસે આવવાના છે જેમાં અમદાવાદમાં ભવ્ય કાર્યક્રમોની તડામાર તૈયારીઓ કરવામાં આવી રહી છે. આખા અમદાવાદની કાયાપલટ કરીને તેને સજાવવામાં આવી રહ્યું છે. અમેરિકન રાષ્ટ્રપતિના કાર્યક્રમને ખાસ બનાવવા માટે વિશેષ અતિથીઓને બોલાવવામાં આવી રહ્યા છે. આ કાર્યક્રમમાં મુકેશ અંબાણી, રતન ટાટા, આનંદ મહિન્દ્રા, સચિન તેંદુલકર અને કપિલ દેવ હાજર રહેશે.
અમદાવાદમાં ટ્રમ્પના કાર્યક્રમને યાદગાર બનાવવા માટે કોઈ પણ કચાશ રહી ન જાય તેનું ધ્યાન રાખવામાં આવી રહ્યું છે. અમદાવાદમાં 1.2 લાખ લોકોને એકઠા કરવા માટે ભાજપ નેતાઓએ કમર કસી લીધી છે. ટ્રમ્પ તેમના પત્ની સાથે મોટેરા સ્ટેડીયમમાં સંબોધન કરશે. મોટેરા સ્ટેડીયમની આસપાસ પાર્કિંગ પ્લોટ ઉભા કરવામાં આવી રહ્યા છે.
આખા અમદાવાદને નવી દુલ્હનની જેમ જ તૈયાર કરી દેવામાં આવી રહ્યું છે. શહેરના જાહેર સ્થળો પર રંગરોગાન અને પેઇન્ટિંગ બનાવવામાં આવી રહી છે. ટ્રમ્પની સુરક્ષાને લઈને પણ કવાયત હાથ ધરવામાં આવી છે. લગભગ 11 હજારથી વધુ પોલીસકર્મી સુવિધામાં લાગશે. ભારત અને અમેરિકાની સુરક્ષા એજન્સીઓ તૈયારીઓને આખરી ઓપ આપી રહી છે.
ટ્રમ્પની સુરક્ષાનાં બધા જ વાહનો સોમવારે જ અમદાવાદ આવી પહોંચ્યા હતા. ડોનાલ્ડ ટ્રમ્પ પહેલાં અમેરિકન પ્રેસિડેન્ટ હશે જે ગાંધી આશ્રમની મુલાકાત લેશે. ભવ્ય રોડ શોની તૈયારીઓ પણ લગભગ પૂર્ણ થઇ ગઈ છે. ટ્રમ્પની આગતા-સ્વાગતામાં કોઈ પણ ચૂક ન થાય તેનું ધ્યાન રાખવામાં આવી રહ્યું છે.