સાબરકાંઠા જિલ્લામાં ચાલતી બોગસ ડિગ્રી મામલે મોટો ખુલાસો થયો છે. જો તમારે ફાયર ઓફિસર બનવું હોય કે નર્સ તમે માત્ર પૈસો ફેંકો અને ડિગ્રી લઈ જાઓ. આ ખેલ ચાલી રહ્યો છે સાબરકાંઠા જિલ્લામાં જ્યાં નકલી ડિગ્રી બનાવી આપવાનો વેપાર ધમધમી રહ્યો છે. હિંમતનગરમાં આવેલી એપલ પેરામેડીકલ ઈન્સ્ટીટ્યૂટમાં પણ કંઈક આવું જ થઈ રહ્યું છે. ન્યૂઝ પેપરમાં જાહેર ખબર છપાવીને લોકોને ખંખેરી લેવાનો ધંધો ચાલી રહ્યો છે. જેમાં જરૂરિયાતમંદ લોકોને ટાર્ગેટ બનાવીને ચૂનો લગાવવામાં આવી રહ્યો છે. અહીં નર્સિંગ, ફાયર બ્રિગેડના કોર્સ સહિત 11 જેટલા કોર્સના સર્ટી બનાવી આપવામાં આવે છે. જેમાં 20 હજારથી લઈને 4 લાખ સુધીની ફી વસૂલવામાં આવે છે. કોલેજમાં જાઓ કે ન જાઓ તમને ઘરે બેઠા જ ડિગ્રી મળી જાય છે. આ સમગ્ર મામલો ત્યારે સામે આવ્યો જ્યારે કોર્સ કર્યા બાદ વિદ્યાર્થીઓ નોકરી મેળવવા માટે ગયા. સાબરકાંઠા જિલ્લા પંચાયતના આરોગ્ય વિભાગમાં બે મહિના પહેલા નર્સના ઈન્ટરવ્યુ લેવાયા હતા. જેમાં બે વિદ્યાર્થીની માર્કશીટ નકલી હતી. જે મામલે તપાસ કરતાં આ માર્કશીટ એપલ ઈન્સ્ટીટ્યૂટમાંથી બનાવાઈ હોવાનું સામે આવ્યું હતું. જેથી એપલ ઈન્સ્ટીટ્યૂટ વિરુદ્ધ ફરિયાદ પણ નોંધાવવામાં આવી છે. તો મામલતદાર પણ લોકોને અપીલ કરી રહ્યા છે વાલીઓ પોતાના સંતાનને કોર્ષ કરાવતા પહેલા યોગ્ય તપાસ કરે.