પર્દાફાશ / કથિત ઓડિયો ક્લીપ: ગુજરાતમાં ભરતી કૌભાંડની હારમાળા, સાબરડેરીમાં નોકરી જોઇતી હોય તો 25 લાખનો ભાવ?

• ચેરમેન શામળ પટેલ દ્વારા ભ્રષ્ટાચાર કરાયાનો આરોપ 
• ડેરીના એમડી અને અન્ય એક શખ્સની કથિત ઓડિયો ક્લીપ વાયરલ
• ઉમેદવાર દીઠ રૂ.25 લાખનો નક્કી કરાયો ભાવ 

સાબરડેરીમાં ભરતી કૌભાંડમાં ભ્રષ્ટાચારનો પર્દાફાશ થયો છે. આ કૌભાંડ આચરવાનો આરોપ સાબર ડેરીના MD પર લાગ્યો છે. કેવી રીતે સાબરડેરીના એમ.ડી. એક-એક વ્યક્તિની ભરતી માટે લાખો રૂપિયાની માંગણી કરે છે તેની પોલ એક કથિત ઓડિયોમાં ખુલી છે.

સાબરડેરીના ચેરમેન શામળ પટેલ ભ્રષ્ટાચાર કરતા હોવાની કથિત ઓડિયો ક્લીપ વાયરલ થઇ છે. જેમાં ઉમેદવાર દીઠ રૂપિયા 25 લાખનો ભાવ નક્કી કરવામાં આવ્યો હોવાનો આક્ષેપ કરાયો છે. 

સાબર ડેરીના એમડી બાબુભાઈ પટેલ અને કિર્તિ પટેલ નામના શખ્સ વચ્ચેની વાતચીતમાં આરોપ લગાવવામાં આવ્યા છે. જેમાં ડેરીના એમડી એ વાતનો સ્વીકાર કરી રહ્યા છે કે ડેરીના ચેરમેન શામળ પટેલ દ્વારા ભ્રષ્ટાચાર કરવામાં આવી રહ્યો છે. તેઓ એ પણ કહી રહ્યા છે કે 155થી વધુ ઉમેદવારો પાસેથી નાણા લેવામાં આવ્યા છે. આ ઓડિયો ક્લીપ વાયરલ થતા ઉમેદવારોમાં ભારે રોષ જાગ્યો છે. ડેરીની ભરતી પ્રક્રિયા રદ કરવા ઉમેદવારોએ માગ કરી છે.

ત્યારે અહીં સવાલ એ છે કે શું આ કથિત ઓડિયો સામે આવ્યા બાદ નિષ્પક્ષ તપાસ થશે ખરી? અત્યાર સુધી કેટલા લોકો પાસે સાબરડેરીના સત્તાધીશો લાખો રૂપિયા પડાવી ચૂક્યા હશે? ક્યાં સુધી રૂપિયાના જોરે ભરતી થતી રહેશે? આ જ તમામ બાબતો પર વીટીવી દ્વારા મહામંથન કરાયું હતું.