આક્ષેપ / 3 કરોડની ઓફર ન સ્વીકારી તો BJPએ પતિ દ્વારા દબાણ કર્યુ, ડિવોર્સ બાદ પણ...: AAP કૉર્પોરેટરનો આરોપ

• સુરતમાં આમ આદમી પાર્ટીની મહિલા નેતાનો મોટો ધડાકો 
• ભાજપ ધારાસભ્ય દ્વારા માણસો મોકલીને કરાઇ 3 કરોડની ઓફર 
• ઓફર ન સ્વીકારી તો પતિ દ્વારા કરાયું દબાણ, થયા છૂટાછેડા 
• કામરેજના ધારાસભ્ય વી ડી ઝાલાવાડીયાએ ભાજપમાં જોડાવવા ઓફર કરી-ઋતા દૂધાગરા

સુરતમાં આમ આદમી પાર્ટીએ ભાજપ પર લગાવ્યો ગંભીર આરોપ
ગુજરાતમાં આગામી વર્ષમાં વિધાનસભાની ચૂંટણી છે ત્યારે ચૂંટણી પહેલા આમ આદમી પાર્ટી પોતાના સંગઠનને મજબૂત કરી રહી છે. ભાજપ પણ વિધાનસભા ચૂંટણીને લઈને તૈયારીમાં છે ત્યારે સુરતના મહિલા કૉર્પોરેટરે આજે ભાજપના ધારાસભ્ય પર ગંભીર આરોપો લગાવતા રાજકીય ખળભળાટ મચી ગયો છે. 

દબાણ કરતા પતિ સાથે થયા ડિવોર્સ
આપના કૉર્પોરેટર ઋતા દૂધાગરાનો આરોપ છે કે ભાજપના ધારાસભ્ય તેમને કરોડો રૂપિયાની ઓફર કરી રહ્યાં છે આટલું જ નહીં. તે ઓફરનો સ્વીકાર ન કરતાં કોર્પોરેટરના પતિ દ્વારા દબાણ કરવામાં આવ્યું જે બાદ તેમણે પતિ સાથે છૂટા થવાનો નિર્ણય લેવો પડ્યો. 

3 કરોડ રૂપિયાની કરાઈ છે ઓફર
સુરતમાં આમ આદમી પાર્ટીએ ભાજપ પર ગંભીર આરોપ લગાવ્યા છે. આમ આદમી પાર્ટીના કોર્પોરેટર ઋતા દૂધાગરાએ પ્રેસ કોન્ફરન્સ યોજીને દાવો કર્યો કે કામરેજના ધારાસભ્ય તેમને ભાજપમાં જોડાવવા માટે ઓફર કરી રહ્યા છે. ઋતા દૂધાગરાએ જણાવ્યું કે ઝાલાવડિયા ઈશારે આવેલા અલગ અલગ લોકોએ તેમને 3 કરોડ રૂપિયાની લાલચ પણ આપી હતી, જો કે તેમણે આ ઓફરને ઠુકરાવી દિધી. 

ડિવોર્સ બાદ પણ મહિલા કોર્પોરેટરની કરાઈ રહ્યા છે બદનામ
કૉર્પોરેટર દૂધાગરાનો આરોપ છે કે ડિવોર્સ બાદ પણ ભાજપ દ્વારા બદનામ કરવામાં આવી રહી છે અને તેમના પતિએ ભાજપ પાસેથી 25 લાખ રૂપિયા લીધા હોવાની વાત પણ તેમણે કબૂલી. નોંધનીય છે કે ઋતા દૂધાગરા સૌથી વધુ લીડથી જીતનારા કૉર્પોરેટર છે. 

AAP કોર્પોરેટર ઋતા દૂધાગરાને નથી ઓળખતોઃ ઝાલાવાડિયા
આટલું જ નહીં ઋતા દૂધાતરાએ કહ્યું કે તેમના પતિ ચિરાગ દૂધાગરા પણ આ ષડયંત્રમાં શામેલ છે, જેમાં તેમણે ભાજપ પાસેથી 25 લાખ રૂપિયા લીધા છે. જો કે આ મામલે જ્યારે VTVની ટીમે ભાજપના ધારાસભ્ય વી ડી ઝાલાવાડિયાનો સંપર્ક કર્યો તો તેમણે આમ આદમી પાર્ટી તરફથી લગાવવામાં આવેલા આરોપોને નકારી દિધા અને કહ્યું કે તેઓ ઋતા દૂધાગરાને ઓળખતા નથી. તેમણે કહ્યું કે આ મારા વિષય બહારની વાત છે અને મેં કોઈ જ ઓફર કરી નથી.