કોરોના રસીને લઈને સમગ્ર વિશ્વમાં દોડ તેજ થઈ ગઈ છે. રશિયાએ દુનિયાની પહેલી વેક્સિન લોન્ચ કરી દીધા પછી આવી જ પહેલ ચીન દ્વારા પણ કરવામાં આવી હતી. ત્યારે યુરોપ અને અમેરિકાએ પણ વર્ષના અંત અથવા 2021 સુધીમાં રસી લાવવાની વાત કરી છે. જો કે રશિયાની વેક્સિન પર ટ્રાયલ વિના લોન્ચ કરવાના પ્રશ્નો ઉઠતાં આખરે તેણે લોકો પર ફરી તેની વેક્સિનનું ટ્રાયલ કરવાની જાહેરાત કરી છે.
કોરોના વેક્સિનને લઈને રશિયાનો મોટો નિર્ણય
પોતાની વેક્સિન પર સવાલો ઉઠતા આખરે ઝૂક્યું રશિયા
હવે 40000 જેટલા સ્વયંસેવકો પર કરાવશે હ્યુમન ટ્રાયલ
પ્રથમ સફળ કોરોના રસી હોવાનો દાવો કરનાર રશિયા હવે વિશ્વનો વિશ્વાસ જીતી શકે છે. રશિયાએ હવે રસીની તપાસ માટે 40 હજાર લોકોની હ્યુમન ટ્રાયલ કરવાનો નિર્ણય લીધો છે. આ ટ્રાયલ આવતા અઠવાડિયાથી શરૂ થઈ શકે છે. આ અગાઉ, ફોનટાન્કા ન્યૂઝ એજન્સીએ દાવો કર્યો હતો કે રશિયાએ માત્ર 38 લોકોની તપાસ કર્યા પછી તેની રસીને મંજૂરી આપી દીધી છે.
એક્સપર્ટસ દ્વારા કરાઇ નિંદા, WHOએ પણ ઉઠાવ્યા હતા સવાલો
આ અગાઉ રસી લોન્ચ કર્યા પર નિષ્ણાતો દ્વારા રશિયાની ટીકા કરવામાં આવી હતી, તેમણે કહ્યું હતું કે રશિયાએ ફેજ - 3 ટ્રાયલ વિના કોરોના વેક્સિન લોન્ચ કરી છે. રશિયા સતત દાવો કરે છે કે સ્પુટનિક વી નામની તેની કોરોના રસી સલામત છે અને તેની તમામ પ્રકારની ચકાસણી કરવામાં આવી છે. જો કે રશિયા આ રસી બાબતના ડેટાને પણ WHO સાથે શેર કરવામાં નિષ્ફળ નીવડ્યું હતું. જેને લઈને તેની રસીને શંકાની નજરે જોવામાં આવી હતી. આખરે દબાણને વશ થઈને રશિયાએ આ નિર્ણય લીધો હોય તે સંભવ છે.
રશિયન વેક્સિન સામે અન્ય દેશો ચલાવી રહ્યા છે ઇન્ફોર્મેશન વોર
કોવિડ વેક્સિન સંશોધન કરનારી મોસ્કોની ગામેલ્યા સંસ્થાના અધિકારીએ કહ્યું છે કે દેશના 45 આરોગ્ય કેન્દ્રોમાં 40 હજાર લોકોને ટ્રાયલ્સ માટે રસીનો ડોઝ આપવામાં આવશે. રશિયન વેક્સિનને ભંડોળ પૂરું પાડતી સંસ્થા, રશિયન ડાયરેક્ટ ઇન્વેસ્ટમેન્ટ ફંડ (RDIF) ના વડા કિરીલ દિમિત્રીયેવે કહ્યું છે કે ઘણા દેશો રશિયન રસી સામે ઇન્ફોર્મેશન વોર ચલાવી રહ્યા છે. તેમણે કહ્યું કે આ મહિને વેક્સિનને લાગતો ડેટા પ્રકાશિત કરવામાં આવશે.
ઘણા દેશો અને WHOએ નથી આપી માન્યતા
કિરીલ દિમિત્રીવ એમ પણ કહે છે કે રશિયન રસી ટ્રાયલનો ડેટા WHO અને તે દેશોને આપવામાં આવી રહ્યો છે જેઓ ફેઝ -3 ટ્રાયલમાં ભાગ લેવા ઇચ્છે છે. ચાલો આપણે જાણીએ કે રશિયાએ તેના દેશમાં ઉપયોગ માટે વેક્સિનને પહેલાથી જ મંજૂરી આપી દીધી છે, પરંતુ મોટાભાગના અન્ય દેશો અને WHOએ હજી સુધી રસીને મંજૂરી આપી નથી.
કિરીલ દિમિત્રીવે કહ્યું છે કે મંજૂરીને લીધે હવે રશિયામાં ડોકટરો અને મેડિકલ સ્ટાફને અને વધુ પડટી હેલ્થ રિસક્સ ધરાવતા લોકોને આ રસીનો ડોઝ આપી શકાય છે. તેમણે કહ્યું કે આ પ્રક્રિયા લોકોના વોલન્ટરીઝ્મ પર આધારિત છે. તેમને આ માટે કોઈ ફરજ પડવાની વાતને તેમણે સ્વીકારી નહોતી.