રશિયા-યુક્રેન યુદ્ધ / ભાવુક થયાં ઝેલેન્સ્કી! યુદ્ધ પૂર્ણ કરવાને લઈને આપ્યું એવું નિવેદન કે દુનિયાભરમાં ચર્ચા થઈ ગઈ શરૂ

• ...તો આ યુદ્ધ અમે પહેલાં જ ખતમ કરી દીધું હોત
• યુદ્ધ પૂર્ણ કરવાને લઈને યુક્રેનના રાષ્ટ્રપતિનું મોટું નિવેદન
• ઝેલેન્સ્કીએ ફરીથી હથિયારોની માંગ કરી

રશિયા અને યુક્રેન વચ્ચે ચાલી રહેલું યુદ્ધ દિવસે ને દિવસે વધારે ને વધારે વિકરાળ સ્વરૂપ ધારણ કરી રહ્યું છે. તમને જણાવી દઇએ કે, રશિયન સૈન્યએ યુક્રેનના શહેરો પર બોમ્બ અને મિસાઈલ હુમલાઓ તેજ કરી દીધાં છે. એવામાં યુક્રેનના રાષ્ટ્રપતિ ઝેલેન્સ્કીએ ફરીથી હથિયારોની માંગ કરી છે. ઝેલેન્સ્કીએ કહ્યું કે, 'જો અમારી પાસે અમને જેની જરૂરિયાત છે તે હથિયારો હોત તો અમે આ યુદ્ધ ઘણા સમય પહેલાં જ ખતમ કરી દીધું હોત.'

રશિયાના હુમલામાં પ્રદેશના એક હજારથી વધુ નાગરિકો માર્યા ગયા

મહત્વનું છે કે, કિવના પ્રાદેશિક પોલીસ વડા એન્ડ્રી નેબિટોવે જણાવ્યું છે કે, રશિયાના હુમલામાં પ્રદેશના એક હજારથી વધુ નાગરિકો માર્યા ગયા છે. ત્યારે ઝેલેન્સ્કીએ સાથી દેશોને શસ્ત્રો પૂરા પાડવા માટે આહવાન કરતાં કહ્યું છે કે, એ વ્યાજબી નથી કે અમે હજુ પણ પૂછવા માટે મજબૂર થઇ રહ્યાં છીએ કે સહયોગી દેશ આટલાં વર્ષોથી શું સંગ્રહ કરી રહ્યું હતું.

યુક્રેનના રાષ્ટ્રપતિએ કહ્યું કે, રશિયન સેનાએ આ યુદ્ધમાં ખુદને ઈતિહાસની સૌથી બર્બર અને અમાનવીય સેના તરીકે નોંધણી કરાવશે. તેઓએ કહ્યું કે નાગરિકોની ઇરાદાપૂર્વક હત્યા, નાગરિકોના રહેણાંક સંકુલ અને માળખાકીય સુવિધાઓનો વિનાશ, તમામ પ્રકારના પ્રતિબંધિત શસ્ત્રોનો ઉપયોગ રશિયન સૈન્યની નિર્દયતાની સાક્ષી આપે છે. બીજી તરફ જર્મન ચાન્સેલર ઓલાફ સ્કોલ્ઝે પુતિનને યુદ્ધ અપરાધ માટે જવાબદાર ગણાવ્યા છે.

જર્મન ચાન્સેલરે યુક્રેનને શસ્ત્રોનો પુરવઠો ચાલુ રાખવાની જાહેરાત કરી અને એમ પણ કહ્યું કે, જર્મનીની શસ્ત્ર સપ્લાય ક્ષમતા હવે લગભગ ખતમ થઈ ગઈ છે. અમારી સરકાર એ માટે હથિયાર ઉત્પાદકો સાથે મળીને કામ કરશે. તેમણે એવો પણ આગ્રહ કર્યો છે કે, યુક્રેનનાં સૈનિકોને એ હથિયાર આપવામાં આવે કે જેનો ઉપયોગ તેઓ કરતા રહ્યાં છે. જર્મન ચાન્સેલરે એ પણ સ્પષ્ટ કર્યું છે કે, NATO યુક્રેન યુદ્ધમાં સીધો હસ્તક્ષેપ નહીં કરે.

યુક્રેન મારિન્કા શહેર પર કબજો કર્યાનો દાવો

યુક્રેને એવો દાવો કર્યો છે કે, ડોનેત્સ્કથી 10 કિલોમીટર દૂર આવેલા મારિન્કા શહેર પર તેની સેનાએ ફરીથી કબજો કરી લીધો છે. માર્ચના મધ્યમાં રશિયન સેનાએ મારિન્કા પર નિયંત્રણ સ્થાપિત કર્યું હતું. યુક્રેનના મીડિયાએ એવો દાવો કર્યો છે કે, રશિયા હવે 2014 ની તર્જ પર દક્ષિણ યુક્રેનમાં ખેરસોન અને માયકોલેવમાં સ્યુડો લોકમત યોજવાની તૈયારી કરી રહ્યું છે. યુક્રેનના મીડિયાના જણાવ્યાં અનુસાર, રશિયન સેનાએ 18 એપ્રિલની આખી રાત દરમિયાન ખેરસોનને સ્નિહુરિવકા અને આસપાસના મેદાન સાથે જોડતા હાઇવેનું ખોદકામ કર્યું હતું.

યુક્રેનનો દાવો - રશિયન હેલિકોપ્ટરને તોડી પાડ્યું

યુક્રેને દાવો કર્યો છે કે છેલ્લાં 24 કલાકમાં ડોનબોસ વિસ્તારમાં 12 રશિયન ટેન્કને નષ્ટ કરવામાં આવી છે. યુક્રેનનો દાવો છે કે, રશિયન આર્ટિલરી સિસ્ટમ, 28 બખ્તરબંધ વાહન, એક સુખોઈ-34 એરક્રાફ્ટ, એક Ka-52 હેલિકોપ્ટર, ચાર UAV અને એક ક્રુઝ મિસાઈલનો નાશ કરવામાં આવ્યો છે. યુક્રેનના સંરક્ષણ મંત્રાલયે એવો દાવો કર્યો છે કે, ગોળીબારી તીવ્ર હોવા છતાં રશિયા સંઘર્ષ કરી રહ્યું છે. પર્યાવરણીય, લોજિસ્ટિક્સ અને અન્ય પડકારો પણ રશિયન સૈન્યના માર્ગમાં અવરોધરૂપ છે.