બાયડનના પોલેન્ડ પ્રવાસ પહેલાં રશિયા બોર્ડર પર હલચલ તેજ જોવા મળી રહી છે. કારણ કે, NATOએ રશિયા બોર્ડર પર 30 હજાર સૈનિકો તૈનાત કરી દીધાં છે.
રશિયા-યુક્રેન વચ્ચેનાં યુદ્ધનો આજે 29મો દિવસ
NATOએ રશિયા બોર્ડર પર તૈનાત કર્યાં 30 હજાર સૈનિકો
મંડરાઇ રહ્યો છે ત્રીજા વિશ્વયુદ્ધનો ખતરો
રશિયા-યુક્રેન વચ્ચેનાં યુદ્ધનો આજે 29મો દિવસ થયો છે. તેમ છતાં હજુ પણ રશિયા-યુક્રેન વચ્ચેનું યુદ્ધ થમવાનું નામ નથી લઇ રહ્યું. રશિયા-યુક્રેન વચ્ચેનાં યુદ્ધમાં રશિયા બોર્ડર પર સૈનિકો તૈનાત કરી દેવાયાં છે. NATOએ રશિયા બોર્ડર પર 30 હજાર સૈનિકો તૈનાત કરી દીધાં છે. ત્યારે તમને જણાવી દઇએ કે, બાયડનના પોલેન્ડ પ્રવાસ પહેલાં રશિયા બોર્ડર પર હલચલ તેજ જોવા મળી રહી છે.
NATO દેશોના સૈનિકોએ યુદ્ધાભ્યાસ પણ શરૂ કરી દીધો છે. રશિયા બોર્ડર પર યુદ્ધાભ્યાસ શરૂ કરી દીધો છે. યુક્રેનના રડાર પર કેટલાંક લડાકુ વિમાનો ટ્રેસ થયા હતાં. વિમાનો હંગેરી બોર્ડર ક્રોસ કરતા હોવાની માહિતી અપાઇ છે તેમજ તે વિમાનો અમેરિકાનાં પણ હોવાનું મનાઇ રહ્યું છે. ત્યારે આ પરિસ્થિતિ જોતા એવું લાગી રહ્યું છે કે, કદાચ રશિયા પર NATO દેશો મોટું એક્શન લે તેવી શક્યતા છે.
રશિયાને રોકવું અમેરિકા અને NATO દેશો માટે શા માટે મહત્વનું?
એવું માનવામાં આવી રહ્યું છે કે, યુક્રેન બોર્ડર અને હંગેરિયન એરસ્પેસમાં જોવા મળેલા ફાઈટર પ્લેન અમેરિકાના હોઈ શકે છે. પરંતુ હજુ સુધી તેની પુષ્ટિ થઈ નથી. વાસ્તવમાં, ગયા વર્ષે રશિયન રાષ્ટ્રપતિ વ્લાદિમીર પુતિને કહ્યું હતું કે, રશિયાએ એવી પરમાણુ મિસાઈલ તૈયાર કરી છે જે આખી દુનિયામાં ક્યાંય પણ હુમલો કરી શકે છે અને દરેક લક્ષ્યને ટાર્ગેટ કરી શકે છે. પુતિનનો એવો દાવો છે કે, આ મિસાઈલને રોકવી અશક્ય છે. પુતિને રશિયન સરકારી ટીવી પર લોકોને એક પ્રેઝન્ટેશન પણ બતાવ્યું હતુ. જેમાં પુતિને કહ્યું હતું કે, રશિયા એવાં ડ્રોન પણ તૈયાર કરી રહ્યું છે કે જે સબમરીનમાંથી છોડી શકાય અને પરમાણુ હુમલા કરવામાં પણ સક્ષમ હશે. પુતિને વધુમાં કહ્યું કે, યુરોપ અને એશિયામાં બિછાવેલી અમેરિકન ડિફેન્સ સિસ્ટમ પણ રશિયાની નવી મિસાઈલને રોકી નહીં શકે.
બીજી તરફ અમેરિકી રાષ્ટ્રપતિએ પણ પોતાના પરમાણુ હથિયારોના આધુનિકીકરણનો આદેશ આપ્યો હતો. જો કે, તેનો ઓર્ડર આપ્યાં પછી શું થયું તે હજુ પણ વિશ્વ માટે એક મોટું રહસ્ય છે. મતલબ કે, જો રશિયાને યુક્રેનમાં રોકવામાં નહીં આવે તો તેનું આગામી લક્ષ્ય રશિયાને નજીકનાં આવેલા અન્ય દેશો પણ હોઇ શકે કે જે NATOનાં સભ્ય છે. આથી ખતરો મોટો છે. તેથી, નાટોના 30 હજાર સૈનિકો દ્વારા યુદ્ધાભ્યાસ શરૂ થઇ ચૂક્યો છે. માઈનસ ડિગ્રી તાપમાનમાં પણ રશિયા-યુક્રેન વચ્ચે ભીષણ યુદ્ધ ચાલી રહ્યું છે.
NATO દેશ અને રશિયાની સત્તામાં જાણો કોણ કેટલું શક્તિશાળી?
- NATO દેશો પાસે 54 લાખ, 5 હજાર, 700 સૈનિકો
- જ્યારે રશિયા પાસે 13 લાખ, 50 હજાર સૈનિકો
- NATO દેશો સાથે સક્રિય સૈનિકોની સંખ્યા 33 લાખ, 66 હજાર
જ્યારે રશિયા પાસે 8 લાખ 55 હજાર સક્રિય સૈનિકો
- NATO દેશો સાથે પેરા મિલિટરી યુનિટની સંખ્યા 7 લાખ, 38 હજાર, 700
જ્યારે રશિયા સાથે પેરા મિલિટ્રી યુનિટની સંખ્યા 2 લાખ 50 હજાર
- NATO દેશો પાસે 20,723 એરક્રાફ્ટ
જ્યારે રશિયા પાસે 4,173 એરક્રાફ્ટ
- NATO દેશો પાસે 1,048 ગ્રાઉન્ડ એટેક એરક્રાફ્ટ
જ્યારે રશિયા પાસે 739 ગ્રાઉન્ડ એટેક એરક્રાફ્ટ
- NATO દેશો પાસે 678 ટેન્કર એરક્રાફ્ટ
જ્યારે રશિયા પાસે માત્ર 20 ટેન્કર એરક્રાફ્ટ
- NATO દેશો પાસે 8,485 હેલિકોપ્ટર
જ્યારે રશિયા પાસે 1,543 હેલિકોપ્ટર
રશિયાની સામે NATO દેશો ઘણાં શક્તિશાળી છે
એટલે કે રશિયાની સામે NATO દેશો ઘણાં શક્તિશાળી છે અને ક્યાંક ને ક્યાંક ઝેલેન્સ્કી NATO દેશો સાથે જોડાવા પણ ઇચ્છે છે. પરંતુ પુતિને કહ્યું છે કે, જો નાટો દેશો યુદ્ધમાં ઉતરશે તો તેના પરિણામો ખૂબ જ ભયાનક હશે અને તેના જવાબમાં પુતિને પરમાણુ યુદ્ધની પણ વાત કરી છે.