જ્વેલરીમાં રશિયન ડાયમંડ નથી તેનું સર્ટીફિકેટ ફરજિયાત
સુરતના જ્વેલરી ઉત્પાદકો અને એક્સપોટર્સ માટે સર્જાઇ મુશ્કેલી
રશિયા યુક્રેન યુદ્ધની અસર સુરતના હીરા ઉદ્યોગ પર થવા લાગી છે. સુરતથી અમેરિકા એક્સપોર્ટ થતી ડાયમંડ જ્વેલરીમાં અમેરિરાના બાયર્સ સુરતના હીરા વેપારીઓ પાસે જ્વેલરીમાં સર્ટીફિકેટ માંગી રહ્યાં છે કે, આ હીરા રશિયાની રફમાંથી નથી બન્યા. ઉલ્લેખનીય છે કે, યુક્રેન અને રશિયામાં યુદ્ધની સ્થિતિને કારણે અમેરિકાએ રશિયાની રફ પર બેન મુક્યો છે.
દેશમાં આયાત થતી કુલ રફ હીરામાંથી 30 ટકા રશિયાથી આવે છે. અમેરિકાએ આ રફ પર બેન મૂકતાં ભારત અને ખાસ કરીને સુરતમાં રફની શોર્ટ સપ્લાય શરૂ થઈ છે, છેલ્લાં 2 વીકથી હીરાના કારખાનામાં વીકમાં 2 દિવસની રજા શરૂ થઈ છે. રફની શોર્ટ સપ્લાયને કારણે તૈયાર હીરાની માંગમાં ધીમે ધીમે વધારો થયો હતો. ત્યાં ફરી અમેરિકાએ નવો નિયમ લાવ્યા છે. આ હીરા અને જ્વેલરી રશિયાની રફમાંથી તૈયાર કરાતી નથી તેવું સર્ટિફિકેટ અમેરિકાના બાયર્સ ભારતના ઉદ્યોગકારો પાસે માંગી રહ્યાં છે. જેથી વેપારીઓની સ્થિતિ કફોડી બની છે.
અમેરિકાની ડિમાન્ડથી જ્વેલરી ઉત્પાદકોની હાલત કફોડી થઇ
અમેરિકાના તૈયાર હીરાના બાયર્સે રશિયાની રફમાંથી તૈયાર કરાયેલા હીરા અથવા તો રશિયાની રફમાંથી તૈયાર કરાયેલી જ્વેલરીની ખરીદી કરવાનો ઈન્કાર કર્યો છે. વેપારીઓએ ‘જે હીરાનો ઉપયોગ થયો છે તે રશિયાની રફના નથી’ એવું સર્ટિફિકેટ મોકલી આપ્યા બાદ જો પાછળથી ખબર પડશે કે, રશિયાની રફમાંથી આ હીરા તૈયાર કરાયા હતા તો તેવા વેપારીઓને અમેરિકન બાયર્સ બેન કરી દેશે.