ચેતવણી / "બીજી વાર આવું કર્યું તો બૉમ્બથી ઉડાવી દઈશું" રશિયાએ આ દેશને આપી ધમકી 

• રશિયાએ આપી બ્રિટનને ચેતવણી 
• બ્રિટનના યુદ્ધ જહાજ પર બોમ્બ ફેંક્યા 
• બ્રિટને રશિયાના આક્ષેપોને નકાર્યા 

બ્લેક Sea લાંબા સમયથી વિવાદનું કેન્દ્ર છે
રશિયા લાંબા સમયથી બ્લેક સીનો ઉપયોગ ભૂમધ્ય સમુદ્રમાં તેની શક્તિ દર્શાવવા માટે કરી રહ્યું છે. બ્લેક સી લાંબા સમયથી રશિયાની સાથે તેના સ્પર્ધકો તુર્કી, ફ્રાન્સ, બ્રિટન અને યુએસ વચ્ચે વિવાદના કેન્દ્રમાં છે. 

બ્રિટનનું યુદ્ધ જહાજ યુક્રેન તરફ અગ્રેસર હતું
બ્રિટન દ્વારા યુક્રેનની નૌકાદળને અપગ્રેડ કરવામાં સહાય કરવા માટે  કરાર કરવામાં આવ્યો હતો અને આ કરાર હેઠળ જ્યોર્જિયામાં બ્રિટનનું યુદ્ધ જહાજ બટુમી બંદરેથી યુક્રેનના ઓડેસા બંદર પર પહોંચ્યું હતું. પરત આવતી વખતે રશિયાએ આક્ષેપ કર્યો હતો કે, બ્રિટિશ યુદ્ધ જહાજ તેમણી જળસીમામાં પ્રવેશ કરવાનો પ્રયત્ન કરી રહ્યું છે જેથી રશિયાએ ફાયરિંગ કરી અને રસ્તામાં જહાજ પર બોમ્બ ફેંક્યા હતા.  

મોસ્કોમાં બ્રિટનના રાજદૂતને બોલાવવાના અહેવાલો 
રશિયાના ઉપ વિદેશમંત્રી સર્જેઈ રિબકોવે કહ્યું કે, બ્રિટન આંતરરાષ્ટ્રીય નિયમોનું પાલન કરે નહિતર રશિયાને પણ જવાબ આપતા આવડે છે. મોસ્કોમાં રશિયાએ બ્રિટનના રાજદૂતને પોતાનો આક્રોશ બતાવવા માટે બોલાવ્યાના અહેવાલ છે પરંતુ રશિયાની વિદેશ મંત્રાલયની પ્રવક્તા મારિયા જખારોવાએ લંડન પર જુઠ્ઠુ બોલવાનો આક્ષેપ લગાવ્યો છે. રશિયાએ મૂકેલા આક્ષેપોને બ્રિટને સંપૂર્ણપણે નકારતા કહ્યું કે, તેમનું જહાજ આંતરરાષ્ટ્રીય નિયમોનું પાલન કરીને યુક્રેનની જળસીમાઓની અંદર રહીને જ આગળ વધી રહ્યું હતું. રશિયા આખી ઘટનાને ખોટી રીતે દર્શાવી રહી છે.     

સર્જેઈ રિબકોવે બ્રિટનને આપી ચેતવણી
સર્જેઈ રિબકોવે બ્રિટનને ચેતવણી આપતા કહ્યું કે, રશિયાએ પેહલા પણ બ્રિટિશ યુદ્ધ જહાજના રસ્તા પર બોમ્બ નાખીને અવરોધ્યું હતું. જો ફરીથી બ્રિટન આવું કરશે તો માત્ર રસ્તા પર જ નહીં પરંતુ જહાજ પર બોમ્બ નાખીને તેને ઉડાવી દેવામાં આવશે.  દરિયાના આંતરરાષ્ટ્રીય નિયમો મુજબ એક જહાજને બીજા રાજ્યની જળ સીમમાં પ્રવેશ ત્યારે જ મળે છે જ્યાં સુધી બીજા રાજ્યની સુરક્ષા પર તેનો કોઈ પ્રભાવ ના પડે. બ્રિટનના વિદેશ મંત્રી ડોમિનિક રાબે કહ્યું કે, તેમના જહાજ પર કોઈ ગોળીબારી નથી કરવામાં આવી.

બ્રિટને રશિયાના આક્ષેપોને નકાર્યા
બ્રિટનના પ્રધાનમંત્રીએ આ બાબત પર કહ્યું કે, જહાજ નિયમોનું પાલન કરી જ રહ્યું હતું. બ્રિટનના રક્ષા મંત્રી બેન વેલેસે કહ્યું કે, રૉયલ નેવી હમેશા આંતરરાષ્ટ્રીય નિયમોનું પાલન કરે છે અને ગેરકાયદેસર દખલગીરીનો સ્વીકાર નહીં કરે.