ભીષણ જંગ / યુક્રેન સાથેના યુદ્ધ વચ્ચે રશિયાએ એવી ધમકી આપી કે આખી દુનિયામાં મચ્યો ફફડાટ

• રશિયા અને યુક્રેન વચ્ચે ચાલી રહ્યો છે જંગ
• રશિયાએ આપી ડરામણી ધમકી
• ભીષણ જંગનો ૨૮મો દિવસ

રશિયા-યુક્રેન વચ્ચેના ભીષણ જંગના આજે ૨૮મા દિવસે રશિયાએ એક મોટી અને ડરામણી ધમકી આપી છે. રશિયાએ સ્પષ્ટપણે જણાવી દીધું છે કે જો અમારા અસ્તિત્વ સામે ખતરો ઊભો થશે તો અમે યુક્રેન પર પરમાણુ શસ્ત્રોનો હુમલો કરી શકીએ છીએ. રશિયાના આ નિવેદન બાદ યુક્રેન સહિત સમગ્ર દુનિયામાં ફફડાટ વ્યાપી ગયો છે.

ન્યુક્લિયર હુમલાની આપી ધમકી

રશિયાએ સ્પષ્ટ શબ્દોમાં જણાવી દીધું છે કે જરૂર પડે યુક્રેન પર ન્યુક્લિયર એટેક કરવામાં પણ રશિયા પીછેહઠ નહીં કરે. ક્રેમલિનના પ્રવક્તા દમિત્રી પેસ્કોવે સીએનએન સાથેની વાતચીતમાં ધમકી આપતાં જણાવ્યું હતું કે રશિયા ઉપર કોઈ પણ પ્રકારનો ખતરો હશે તો ન્યુક્લિયર વેપન્સનો પણ અને ઉપયોગ કરી શકીએ છીએ.  દમિત્રીના આ નિવેદનથી અમેરિકાએ જે આશંકા વ્યક્ત કરી છે તેને હવે સમર્થન મળી રહ્યું છે. અમેરિકા બેથી ત્રણ વ્યક્ત દહેશત વ્યક્ત કરી ચૂક્યું છે કે રશિયા યુક્રેન પર ન્યુક્લિયર એટેક કરી શકે છે. 

યુક્રેન રશિયા સામે ઝૂકવા તૈયાર નથી

આજે યુદ્ધના ૨૮મા દિવસે યુક્રેનના અલગ અલગ શહેરો પર રશિયાના ભીષણ હવાઈ હુમલા જારી રહ્યા છે. હજુ પણ યુક્રેન રશિયા સામે ઝૂકવા તૈયાર નથી. આ જંગ વચ્ચે રશિયાએ ચેર્નોબિલની એક નવી લેબને તબાહ કરી નાખી છે. 

મારિયુપોલ હુમલાથી ધ્રુજી ઉઠ્યું

દરમિયાન મારિયુપોલ શહેરમાં ભયાનક જંગ જારી છે. રશિયાએ યુક્રેનના આ દક્ષિણ તટિય શહેર મારિયુપોલ પર હુમલા વધુ આક્રમક કરી દીધા છે. મારિયુપોલ પર રશિયાએ બે શક્તિશાળી (સુપર પાવરફુલ) બોમ્બ ઝીંકતા સમગ્ર શહેર ધ્રુજી ઊઠ્યું હતું. મારિયુપોલમાં હજુ પણ હજારો લોકો ફસાયેલા છે. હ્યુમન રાઈટ્સ વોચના એક અધિકારીના અંદાજ મુજબ મારિયુપોલમાં હજુ પણ બે લાખથી વધુ લોકો ફસાયેલા છે. સામાપક્ષે યુક્રેન પણ રશિયાને જડબાતોડ જવાબ આપી રહ્યું છે. યુક્રેને એવો દાવો કર્યો છે કે યુદ્ધમાં અત્યાર સુધીમાં રશિયાના ૧૫,૩૦૦ સૈનિકો માર્યા ગયા છે. યુક્રેનના વિદેશ મંત્રાલયે ટ્વિટ કરીને આ જાણકારી આપી છે.

દુનિયા પર ‘વિશ્વયુદ્ધ’નો ખતરોઃ બિડેનના નિવેદનથી ખળભળાટ

રશિયાના આક્રમક તેવર અને ખાસ કરીને ન્યુક્લિયર વેપન્સનો ઉપયોગ કરવાની ખુલ્લી ધમકીથી અમેરિકા પણ ચોંકી ઊઠ્યું છે અને પ્રમુખ જો બિડેન પોલેન્ડની મુલાકાત લેવાના છે. પોલેન્ડની મુલાકાત પૂર્વે જો બિડેને એક નિવેદન કરીને વર્લ્ડવોરની ચિનગારીને વધુ ભડકાવી દીધી છે. જો બિડેને જણાવ્યું છે કે હવે સમગ્ર દુનિયા પર વિશ્વયુદ્ધનો ખતરો તોળાઈ રહ્યો છે. તેમના આ નિવેદનથી ખળભળાટ મચી ગયો છે. બિડેને જણાવ્યું છે કે હવે ટૂંક સમયમાં એક ન્યૂ વર્લ્ડ ઓર્ડર રચાશે, જેનું નેતૃત્વ અમેરિકાના હાથમાં હશે. આ માટે અમેરિકાએ દુનિયા તમામ સ્વતંત્ર દેશોને સંગઠિત કરવા પડશે. પોલેન્ડના પ્રવાસ પહેલા બિડેને આ નિવેદન કરીને રશિયાના પ્રમુખ પુતિન સામે નિશાન તાક્યું છે. અમેરિકા હવે રશિયા-યુક્રેન યુદ્ધને લઈને સીધેસીધા એક્શનમાં આવવાની ચેતવણી આપી રહ્યું છે.