World / હજુ બીજા દેશો કોરોના રસી શોધી રહ્યાં છે ત્યાં રશિયાએ ત્રીજી શોધી કાઢી, જુઓ ક્યારે આવશે

રશિયાએ ઓગસ્ટમાં પોતાની પહેલી સ્પુટનિક V લોન્ચ કરી છે. આ પછી 14 ઓક્ટોબરે બીજી વેક્સીન એપીવેકકોરોના લોન્ચ કરી હતી અને હવે ત્રીજી વેક્સીન પણ બનીને તૈયાર છે. 

રશિયાની ત્રીજી રસી રશિયન એકેડેમી ઓફ સાયન્સિસના ચૂમાકોવ સેન્ટરમાં બનાવવામાં આવી રહી છે. અહેવાલો અનુસાર આ ઈનએક્ટિવેટેડ રસી ડિસેમ્બર 2020 સુધીમાં માન્ય થવાની સંભાવના છે. નોવોસિબિર્સ્ક, સેન્ટ પીટર્સબર્ગ અને કિરોવની મેડિકલ ફેસિલિટીમાં પ્રથમ તબક્કા અને બીજા તબક્કાના પરીક્ષણ માટે રસીને મંજૂરી આપવામાં આવી છે.

પ્રથમ તબક્કા દરમિયાન આ રસી 6 ઓક્ટોબરના રોજ 15 વોલન્ટિયર્સને આપવામાં આવી છે અને તેમાંથી કોઈને ગંભીર આડઅસર જોવા મળી નથી. આ રસીનો બીજો તબક્કો 19 ઓક્ટોબરથી 285 વોલન્ટિયર્સ ઉપર શરૂ કરવામાં આવશે. એવી અપેક્ષા છે કે આ રસીનું ક્લિનિકલ ટ્રાયલ ડિસેમ્બર સુધીમાં પૂર્ણ થઈ જશે.

રશિયાએ તેની કોઈપણ રસીના મોટા પ્રમાણમાં ટ્રાયલ્સ કર્યા નથી. રશિયાની પ્રથમ રસી સ્પુટનિક V એડિનોવાયરસ વેક્ટર પર આધારિત છે. રાષ્ટ્રપતિ પુટિનની પુત્રીએ પણ આ રસીનો ડોઝ લીધો છે. હાલમાં આ રસી 13,000 વોલન્ટિયર્સને આપવામાં આવી છે.

તે જ સમયે રશિયાની બીજી રસી એપિવેકકોરોના સિન્થેટિક રસી છે અને તે સ્પુટનિક V કરતાં વધુ સુરક્ષિત માનવામાં આવે છે. આ રસીમાં વાયરસ પ્રોટીનનાં નાના સિન્થેટિક પેપ્ટાઇડ ટુકડાઓ શામેલ છે, જે રોગપ્રતિકારક શક્તિને વાયરસને ઓળખવા અને બેઅસર કરવામાં મદદ કરે છે. તેના ટ્રાયલ્સ 100 વોલન્ટિયર્સ પર કરવામાં આવ્યો છે.

રશિયાના નાયબ વડાપ્રધાન તાત્યાના ગોલીકોવા અને મુખ્ય સેનેટરી ડોક્ટર અન્ના પોપોવાને પણ એપિવેકકોરોનાની અસરકારકતા ચકાસવા માટે આ રસી આપવામાં આવી છે અને બંનેએ કોઈ આડઅસરની જાણ કરી નથી.

એપિવેકકોરોનાના 60,000 ડોઝ ટૂંક સમયમાં તૈયાર થઈ જશે. આ રસી બનાવનાર વેક્ટર સેન્ટર 40,000 વોલન્ટિયર્સના રજીસ્ટ્રેશન પછી ક્લિનિકલ ટ્રાયલ શરૂ કરશે. આ રસી 60 વર્ષથી ઉપરના 150 લોકોને તેની ક્ષમતા ચકાસવા માટે આપવામાં આવશે. 

ભારતના ડોક્ટર રેડ્ડી લેબે ડ્રગ કંટ્રોલર ઓફ ઈન્ડિયા પાસેથી અહીં સ્પુટનિક Vના મોટા પાયે ક્લિનિકલ ટ્રાયલ કરવા મંજૂરી માંગી હતી, પરંતુ DGCIએ મંજૂરી આપી ન હતી. DGCIએ કહ્યું હતું કે રશિયન રસી માટે પહેલા નાના પાયે ટ્રાયલ કરવા પડશે.