કોરોના રસી / પોતાની વૅક્સિન પર આરોપો લાગતા રશિયાએ કર્યો મોટો દાવો, અમે Sputnik V તો...

• રશિયન વેક્સિન બાબતે રશિયાનો ખુલાસો 
• 6 વર્ષોથી ચાલી રહ્યું હતું વાયરસ પર રિસર્ચ 
• કોરોના જેવા અન્ય વાયરસ પર ચાલતું હતું સંશોધન 

કોરોના સામેની વિશ્વની પ્રથમ રસી તૈયાર કરી હોવાના રશિયન દાવાને ઘણા લોકો પડકારી રહ્યા છે, જ્યારથી તેને લગતી જાહેરાત થઈ છે ત્યારથી તે સવાલોના ઘેરામાં છે. નોંધણી દરમિયાન આપેલા દસ્તાવેજોથી ઘણાં ખુલાસા પણ થયા છે, જે રસીની અસરકારકતા અંગે શંકા ઊભી  કરે છે. આ બધા આક્ષેપો વચ્ચે, રશિયા તરફથી એક ચોંકાવનારો દાવો કરવામાં આવ્યો છે.  કે  જે રસી તૈયાર કરવામાં આવી છે તેનું ટ્રાયલ રશિયામાં 6 વર્ષથી ચાલી રહ્યું હતું. 

શું કહ્યું RDIFના વડા એ.. 

હકીકતમાં, વૈશ્વિક માર્ગદર્શિકા અને પરીક્ષણ પૂર્ણ કર્યા વિના રસી તૈયાર કરવા અંગેના આક્ષેપો વચ્ચે Sputnik Vની રસી વિશે દાવા કરવામાં આવ્યા છે. રસી માટે ફંડ આપી રહેલા રશિયન સોવરિન વેલ્થ ફંડ ના વડા, કિરીલ દિમિત્રીવે જણાવ્યું હતું કે રસીપર છેલ્લા 6 વર્ષથી રિસર્ચ કરાઇ રહ્યું હતું. 

દિમિત્રીવાએ જણાવ્યું હતું કે છેલ્લા કેટલાક વર્ષોથી અમે ઇબોલા, મર્સ અને સાર્સ વાયરસની રસી વિકસાવી રહ્યા છીએ. આ વાયરસ કોરોના જાતિના વાયરસ છે. કોવિડ -19 રોગચાળો ફેલાવતો વાયરસ સાર્સ-કોવ -2 જેવો વાયરસ છે, અને અમે મર્સની રસી બનાવવા માટે બે વર્ષ રોકાયેલા હતા. આ કારણોસર, અમે ઝડપથી રસી બનાવી શક્યાં છે.

દિમિત્રીવાએ જણાવ્યું હતું કે વિશ્વમાં મર્સની કોઈ રસી હજુ સુધી તૈયાર કરવામાં આવી નથી, જ્યારે ઇબોલા માટેની પહેલી રસી ડિસેમ્બર 2019 માં મંજૂર કરવામાં આવી હતી. તેમણે કહ્યું કે જે લોકો રશિયન વેક્સિનપર વિશ્વાસ નથી કરતા તેઓ તેમની રસી તૈયાર કરી શકે છે. એવો દાવો કરવામાં આવે છે કે રશિયન રસી નવેમ્બર-ડિસેમ્બરમાં વૈશ્વિક બજારમાં પ્રવેશી શકે છે. તેમ છતાં એસ્ટ્રાઝેનેકા, મોડર્નાની રસી પણ રેસમાં જ રહેશે. 

ચેપ ઘટાડવામાં આગળ હતું રશિયા

રશિયાએ માત્ર કોરોના માટેની પ્રથમ રસી હોવાનો દાવો કર્યો નથી, તે કોરોના ચેપની ગતિ ઘટાડવામાં પણ ઘણા દેશો કરતા આગળ હતો. આંકડા મુજબ, મે મહિનામાં જ્યાં રોજ 10 હજારથી વધુ નવા કેસ આવતા હતા, હવે પાંચ હજારથી ઓછા કેસ આવી રહ્યા છે.

સિનિયર તબીબે આપ્યું રાજીનામું 

રશિયાના રાષ્ટ્રપતિ વ્લાદિમીર પુટિન દ્વારા કોરોના રસીની ઘોષણા પછી, રશિયાના સિનિયર મેડિકલ એક્સપર્ટ  પ્રો. એલેક્ઝાંડર ચૂચાલિને રશિયાના આરોગ્ય મંત્રાલયની એથિક્સ કાઉન્સિલમાંથી રાજીનામું આપ્યું છે. એવું કહેવામાં આવી રહ્યું છે કે તેણે Sputnik Vની રસીનું રજીસ્ટ્રેશન રોકી ન શક્યતા આ પગલું ભર્યું હતું. પ્રો. એલેક્ઝાંડર રસીની સલામતી અને અસરકારકતા પર સવાલ ઉભો કરતા રહ્યા છે. 

રશિયામાં પલ્મોનોલોજી સંશોધન સંસ્થાની સ્થાપના કરનાર પ્રો. એલેક્ઝાંડરે રસી બનાવતી સંસ્થા ગમાલિયા રિસર્ચ ઇન્સ્ટિટ્યૂટના ડિરેક્ટર અને રશિયન આર્મીના સિનિયર વાઇરોલોજિસ્ટ કર્નલ પ્રો. સેરગી બોરીસિવિક ઉપર પણ ગંભીર આરોપો લગાવ્યા હતા. તેમણે કહ્યું હતું કે આ લોકોએ તમામ માપદંડોને બાયપાસ કરીને વિશ્વની પ્રથમ રસી તૈયાર કરવા મટેનું બેકગ્રાઉન્ડ તૈયાર કર્યું હતું.  તે જાણીતું છે કે whoએ પણ રશિયન રસી પર સવાલો ઊભા કર્યા હતા. 

શું કહે છે પશ્ચિમી નિષ્ણાતો? 

ઘણા નિષ્ણાતોએ આ રસી વિશે પ્રશ્નો ઉભા કર્યા છે. યુનિવર્સિટી કોલેજ લંડનના પ્રોફેસર ફ્રાન્સુઆ બેલેક્સ કહે છે કે ગાઈડલાઇન્સને  અવગણવું અને  રસી લાવવી તે રશિયાનો શરમજનક નિર્ણય છે. નાગરિકોના રસીકરણને સીધી રીતે તેમના સ્વાસ્થ્ય સાથે સંબંધ છે જેની સાથે છેડખાની એ યોગ્ય નથી. આ પહેલા યુનાઇટેડ સ્ટેટ્સ અને બ્રિટને પણ આ રસી ઉપર સવાલ ઉઠાવ્યા હતા.  બ્રિટને તો એમ પણ કહ્યું છે કે તે આ રસીનો ઉપયોગ તેના નાગરિકો પર કરશે નહીં.

જર્મનીના આરોગ્ય પ્રધાન જેન્સ સ્પાહે પણ રસી અંગે સવાલ ઉઠાવતા કહ્યું હતું કે રશિયન રસીની પૂરતી તપાસ કરવામાં આવી નથી. લોકોને તે આપવું સ્વાસ્થ્ય માટે જોખમી સાબિત થઈ શકે છે. તે જરૂરી નથી કે રસી પ્રથમ બનાવવામાં આવે, પરંતુ તે સુરક્ષિત રહે તે જરૂરી છે. ડબ્લ્યુએચઓએ તેની વેબસાઇટ પર ક્લિનિકલ ટ્રાયલ હેઠળની 25 રસીઓને સૂચિબદ્ધ કરી છે, જ્યારે 139 રસી હાલમાં પૂર્વ-ક્લિનિકલ તબક્કામાં છે.