દુનિયાની પ્રથમ કોરોના વેક્સિનને રજિસ્ટર્ડ કર્યા બાદ રશિયાએ પોતાની કોરોના વાયરસ રસી સ્પુટનિક (વી) નું ઉત્પાદન શરૂ કરી દીધું છે. રશિયન અધિકારીઓએ કહ્યું છે કે તેઓ રસીના 500 મિલિયન ડોઝ તૈયાર કરવા માટે સક્ષમ છે. આ રસી કોરોના સામેની લડાઈમાં મહત્વપૂર્ણ સાબિત થશે.
રશિયાએ બેફિકર થઈ શરૂ કર્યું રસીનું ઉત્પાદન
પશ્ચિમી દેશો અને WHOએ રસી પર ઉઠાવ્યા હતા સવાલો
રસીની કરાઇ છે પૂરતી તપાસ: રશિયન આરોગ્ય મંત્રાલય
રશિયાએ વર્લ્ડ હેલ્થ ઓર્ગેનાઇઝેશન ( WHO) અને યુએસ સહિત પશ્ચિમી દેશોની ટીકાને ધ્યાનમાં લીધા વિના, કોરોના રસી સ્પુટનિક-વીનું ઉત્પાદન શરૂ કરી દીધું છે. રશિયાના આરોગ્ય મંત્રાલયે શનિવારે જણાવ્યું હતું કે ગમાલય વૈજ્ઞાનીક સંશોધન સંસ્થા દ્વારા વિકસિત આ કોરોના રસીનું ઉત્પાદન શરૂ થઈ ગયું છે. અધિકારીઓએ કહ્યું છે કે તેઓ આગામી 12 મહિનામાં કોરોના વાયરસ રસીના 50 કરોડ ડોઝનું ઉત્પાદન કરવામાં સક્ષમ છે.
રશિયનો દાવો કોરોના સામે એન્ટિબોડી બનાવવામાં સફળ સાબિત થઈ છે રસી
રશિયન આરોગ્ય મંત્રાલયે જણાવ્યું છે કે આ રસી તમામ જરૂરી તપાસ કરાઈ છે અને તે કોરોના વાયરસ સામે પ્રતિરક્ષા વિકસાવવામાં સફળ સાબિત થઈ છે. આ રસી બે વાર લાગુ પડે છે અને એવી અપેક્ષા રાખવામાં આવે છે કે તે લગભગ બે વર્ષ સુધી વાયરસ સામે પ્રતિરક્ષા વિકસાવશે. આ રસીનું 76 લોકો પર અલગથી પરીક્ષણ કરવામાં આવ્યું છે.
રશિયન અધિકારીઓએ જણાવ્યું હતું કે ટૂંક સમયમાં આ રસીનું ઉત્પાદન વિદેશોમાં પણ શરૂ થશે અને યુએઈ, સાઉદી અરેબિયા અને ફિલિપાઇન્સમાં પણ ટ્રાયલ્સ શરૂ થવા જઈ રહી છે. બીજી તરફ બ્રિટીશ અખબાર ડેઇલી મેઇલના અહેવાલ મુજબ રશિયન રસી કેટલી અસરકારક અને સલામત રહી છે તેની તપાસ થઈ નથી. એટલું જ નહીં, આ રસીની આડઅસર પણ જોવા મળે છે. જો કે રશિયાનો દાવો છે કે પુતિનની દીકરીને પણ રસી આપવામાં આવી છે.
WHO એ રસીની સંપૂર્ણ માહિતી માંગી
ડેઇલી મેઇલના અહેવાલ મુજબ ફક્ત 38 સ્વયંસેવકોને જ આ રસી આપવામાં આવી છે. રસી આપ્યા પછી આ અખબારે 144 પ્રકારની આડઅસરોનો દાવો કર્યો હતો. એવું પણ કહેવામાં આવ્યું છે કે રસી આપ્યાના 42મા દિવસે 31 સ્વયંસેવકોને આડઅસરો જોવા મળી હતી, આ બધા પ્રશ્નો વચ્ચે, રશિયાએ કહ્યું છે કે તેની રસી સંપૂર્ણપણે સલામત છે અને તેને આશરે 20 દેશોમાંથી આ રસી માટે ઓર્ડર પણ મળ્યા છે. બીજી તરફ, રશિયન સમાચાર એજન્સી ફોટંકાએ દાવો કર્યો છે કે સ્વયંસેવકોના શરીરમાં જોવા મળેલી આડઅસરોની લિસ્ટ બહુ લાંબી છે.