કૂટનીતિ / યુક્રેન યુદ્ધની વચ્ચે પુતિનનું મોટું એક્શન, ઝુકરબર્ગની કંપની Metaને આતંકી સંગઠન જાહેર કર્યું

• યુક્રેન યુદ્ધની વચ્ચે રશિયાના પ્રેસિડન્ટ પુતિનનું એક્શન
• ફેસબુકના માલિક ઝુકરબર્ગની કંપની Metaને આતંકી સંગઠન જાહેર કર્યું 
• મેટા ફેસબુકની પેરેન્ટ કંપની

રશિયાના પ્રેસિડન્ટ વ્લાદિમિર પુતિન અણધાર્યાં ચોંકાવનારા નિર્ણય લેવા માટે જાણીતા છે. તેઓ દુનિયાના કોઈ પણ દેશથી ડરનારા નથી અને ગમે ત્યારે ગમે તેવું પગલું ભરતાં પણ અચકાતા નથી. હવે પુતિને યુક્રેન સાથેના યુદ્ધની વચ્ચે એક મોટું એક્શન લેતા ફેસબુકના સીઈઓ માર્ક ઝુકરબર્ગની પેરેન્ટીંગ કંપની મેટાને આતંકી સંગઠન જાહેર કર્યું છે. ફેડરલ સર્વિસ ફોર ફાઇનાન્શિયલ મોનિટરિંગ (રોસફાઇનમોનિટરિંગ)ના ડેટાબેઝ પરથી આવી માહિતી સામે આવી હતી.  

મેટા આતંકવાદી અને ઉગ્રવાદી સંગઠનોની યાદીમાં સામેલ 
રશિયાએ અમેરિકાની ટેક જાયન્ટ કંપની અને માર્ક ઝુકરબર્ગની કંપની મેટા સામે મોટું પગલું ભરતાં તેને આતંકવાદી અને ઉગ્રવાદી સંગઠનોની યાદીમાં સામેલ કરી દીધું છે. મેટા ફેસબુકની પેરેન્ટ કંપની છે. 

#BREAKING Russia adds Meta to list of 'terrorist and extremist' organisations pic.twitter.com/sWCF0x6sFL

— AFP News Agency (@AFP) October 11, 2022

માર્ચમાં રશિયાએ સોશિયલ મીડિયા પ્લેટફોર્મ પર મૂક્યો હતો પ્રતિબંધ 
માર્ચમાં રશિયાની સરકારે ફેસબુક, ઇન્સ્ટાગ્રામ અને ટ્વિટર જેવા સોશિયલ મીડિયા પ્લેટફોર્મને બ્લોક કરી દીધા હતા. મોસ્કોની એક અદાલતે માર્ક ઝુકરબર્ગની માલિકીના સોશિયલ મીડિયા પ્લેટફોર્મ પર પણ ઉગ્રવાદી પ્રવૃત્તિનો આરોપ મૂક્યો હતો અને દાવો કર્યો હતો કે તે યુક્રેનમાં સોશિયલ મીડિયા યૂઝર્સને રશિયનો વિરુદ્ધ હિંસાને પ્રોત્સાહન આપતી સામગ્રી પોસ્ટ કરવાની મંજૂરી આપી રહી છે. જો કે, મેટાના વકીલે ત્યારબાદ આરોપોને ફગાવી દીધા હતા, અને કોર્ટને કહ્યું હતું કે આ સંગઠન ક્યારેય ઉગ્રવાદી પ્રવૃત્તિઓમાં સામેલ થયું નથી. 

માર્ક ઝૂકરબર્ગ પર રશિયાએ લગાવ્યો હતો પ્રતિબંધ 
ઉલ્લેખનીય છે કે મે 2022માં રશિયાએ માર્ક ઝૂકરબર્ગ સહિત 963 અમેરિકન લોકોના રશિયા પ્રવેશ પર પ્રતિબંધ મૂકી દીધો હતો. આ લિસ્ટમાં અમેરિકાના રાષ્ટ્રપતિ જો બિડેનનો પણ સમાવેશ કરવામાં આવ્યો હતો.

યુક્રેન પર રશિયાએ શરુ કર્યો મિસાઈલ હુમલો 
મેટાને આતંકી સંગઠન જાહેર કરવાનો રશિયાનો નિર્ણય એવે સમયે આવ્યો છે કે જ્યારે ગઈકાલે રશિયાએ યુક્રેન પર મિસાઈલ મારો શરુ કરી દીધો છે. રશિયાએ સોમવારે રાજધાની કિવ સહિત યૂક્રેનના અનેક શહેરો પર હુમલો કરીને નાગરિક ઠેકાણાઓને નિશાન બનાવ્યા હતા. રાજધાની કિવમાં થયેલા હુમલામાં 8 લોકોના મોત થયાના સમાચાર છે.