પોરબંદર આરટીઓમાં HSRP નંબર પ્લેટના નામે કૌભાંડ સામે આવ્યુ છે. RTOમાં થતા કૌભાંડનો એક વીડિયો સામે આવ્યો છે. આ વીડિયોમાં ટ્રક આરટીઓમાં લાવ્યા વગર જ પાસીંગ થઇ જતું હોવાનું સામે આવ્યુ છે. પોરબંદર RTOમાં હજી પણ એજન્ટરાજ યથાવત્ છે. સમગ્ર અહેવાલ જોઇએ વિગતવાર.
હાલમાં RTOમાં ટ્રક લાવ્યા વગર જ નંબર પ્લેટ બદલવામાં આવી રહી છે. પાસિંગ માટે આવેલા ટ્રકોની પ્લેટ પર અન્ય નંબર પ્લેટ લગાવીને ફોટો પાડી કૌભાંડ આચરવામાં આવે છે. RTOમાં એજન્ટ ટ્રકને કચેરીએ લાવ્યા વિના જ પાસિંગ કરીને રૂપિયા કમાવે છે. વિના પાસિંગ માટે એજન્ટ દ્વારા 4 હજાર જેટલા ઉઘરાવવામાં આવે છે..
મહત્વનુ છે કે, ટ્રકને દર વર્ષે આરટીઓ કચેરીમા પાસીંગ કરાવવાનું હોય છે પરંતુ પોરબંદર RTOમાં એજન્ટ દ્વારા સ્ટાફની મિલીભગતથી ટ્રક કચેરીમાં લાવ્યા વગર જ પાસીંગ કરવામાં આવે છે. RTOમાં પાસીંગ કરાવવા માટે આવેલા એક ટ્રક ડ્રાઈવરે ઘટનાનો વીડિયો ઉતારીને સોશિયલ મીડિયામાં વાયરલ કર્યો છે. આ વીડિયોમાં ટ્રક ડ્રાઈવર અને RTOના ભાવેશ નામના કર્મચારી વચ્ચે વાતચીત થાય છે.
રાજ્યમાં નિયમોના પાલનની વાતો ખુબ થાય છે, પરંતુ પાલન થતું નથી. કારણ કે, જેમને જવાબદારી સોંપી છે. તે જ પાલન નથી કરતા અને ભ્રષ્ટાચારને ખુલ્લેઆમ છાવરી રહ્યા છે. આવો જ એક રાજકોટનો વીડિયો સોશિયલ વાયરલ થયો હતો, જેમાં એક ટ્રાફિક કોન્સ્ટેબલ ખુલ્લેઆમ ટ્રાફિકના નિયમનો ભંગ કરનાર યુવાનો પાસેથી રૂપિયા 500ની લાંચ લેતો જોવા મળે છે. જ્યારે આ વિડિયો બાદ ટ્રાફિક કોન્સ્ટેબલને સસપેન્ડ પણ કરાયો છે.