ભારતીય જનતા પાર્ટી માટે આજનો દિવસ થોડો સંઘર્ષમય રહ્યો છે. દિલ્હી અને બંગાળ વિધાનસભામાં બઘડાટી બોલાવ્યા બાદ બંને જગ્યાએથી કુલ 8 ધારાસભ્યોને સસ્પેન્ડ કરી દીધા છે.
બંગાળ વિધાનસભામાં ભાજપ અને ટીએમસી વચ્ચે ઘર્ષણ
ભાજપના પાંચ ધારાસભ્યોને સસ્પેન્ડ કરી દીધા
દિલ્હી વિધાનસભામાં પણ હોબાળો થયો
બંગાળ વિધાનસભામાં બીજેપી અને ટીએમસીના ધારાસભ્યો આમનેસામને આવી જતા વિધાનસભાની અંદર જ મારામારીના દ્રશ્યો સર્જાયા હતાં. મળતી માહિતી મુજબ, બંગાળ વિધાનસભામાં બીજેપી ધારાસભ્ય મનોજ તિગ્ગા અને ટીએમસી ધારાસભ્ય અસિત મજુમદાર વચ્ચે મારામારી થઈ હતી. આ મારામારીમાં અસિત મજુમદાર ઘાયલ થયા હોવાંથી તેઓને હોસ્પિટલ લઈ જવામાં આવ્યા છે.
બંગાળ વિધાનસભામાં બઘડાટી બોલી
હોબાળો મચાવાના આરોપમાં વિપક્ષના નેતા સુવેંદુ અધિકારી સહિત 5 ભાજપના ધારાસભ્યોને વિધાનસભાની કાર્યવાહીમાંથી સસ્પેન્ડ કરી દેવામાં આવ્યા હતા. સસ્પેન્ડ થયેલા ધારાસભ્યોમાં સુવેંદુ અધિકારી ઉપરાંત મનોજ ટિગ્ગા, દીપક બર્મન, નરહરી મહતો અને શંકર ઘોષ સામેલ છે. સત્તાધારી દળના મુખ્ય સચેતક નિર્મલ ઘોષે વિધાનસભામાં ભાજપના ધારાસભ્યો વિરુદ્ધ પ્રસ્તાવ રજૂ કરતા કહ્યું કે, સદનની ગરિમાને ઠેસ પહોંચાડી છે. સુવેંદુ અધિકારીની ઉશ્કેરણી હેઠળ વિધાનસભામાં તાંડવ મચાવામાં આવ્યું હતું.
બંગાળ વિધાનસભામાંથી ભાજપના 5 ધારાસભ્યો સસ્પેન્ડ
મમતા બેનર્જી સરકારના મંત્રી ચંદ્રિમા ભટ્ટાચાર્યે કહ્યું કે, ભાજપના ધારાસભ્યોને સસ્પેન્ડ કરી દેવામાં આવ્યા છે. વિધાનસભા અધ્યક્ષ વિમાન બેનર્જીએ કહ્યું કે, સદનની ગરિમાને ઠેસ પહોંચાડી છે. સંપત્તિને નુકસાન પહોંચાડવામા આવ્યું છે. તેનો હિસાબ કરવામાં આવશે, ત્યાર બાદ સુવેંદુ અધિકારી સહિત 4 અન્ય ભાજપ ધારાસભ્યોને વિધાનસભાની કાર્યવાહીમાંથી સસ્પેન્ડ કરી દેવામાં આવ્યા હતા.
દિલ્હી વિધાનસભામાંથી ભાજપના 3 ધારાસભ્યો સસ્પેન્ડ
દિલ્હી વિધાનસભામાં મુખ્યમંત્રી અરવિંદ કેજરીવાલ વિરુદ્ધ ટિપ્પણી પર ભારે હોબાળો થયો હતો. વિધાનસભા અધ્યક્ષ રામ નિવાસ ગોયલે ભારતીય જનતા પાર્ટીની શહેરી કમિટિના અધ્યક્ષ આદેશ ગુપ્તા દ્વારા મુખ્યમંત્રી અરવિંદ કેજરીવાલ વિરુદ્ધ કરવામા આવેલી કથિત અપમાનજનક ટિપ્પણીને લઈને સદનમાં આમ આદમી ુપાર્ટીના ધારાસભ્યોના વિરોધ વચ્ચે ભાજપના 3 ધારાસભ્યોને સોમવારે દિવસભર માટે સસ્પેન્ડ કરી દેવામા આવ્યા હતા.