બિગ બોસ 14માં વીકેન્ડ કા વારમાં સલમાન ખાન અલગ જ અંદાજમાં જોવા મળી રહ્યો છે. તે શોના પહેલાં દિવસથી જ રુબીના દિલેકને ટાર્ગેટ બનાવી રહ્યો છે અને દરેક બાબતમાં તેના પર નિશાન સાધી રહ્યો છે. બિગ બોસના ઘરમાં જે પણ થાય છે, સલમાન ખાન સીધો રૂબીના દિલેક પર હુમલો કરે છે. પછી ભલે અર્શી ખાનનું ખરાબ વર્તન હોય કે રાહુલ વૈદ્ય અથવા અન્ય કોઈ રુબીના દિલેકને નિશાન બનાવતું હોય, પરંતુ ભૂલ રૂબીનાની જ હોય છે. આ સપ્તાહના વીકેન્ડના વારમાં પણ કંઈક આવું જ જોવા મળ્યું.
બિગ બોસમાં આ એક્ટ્રેસને સલમાન ખાને લીધી આડે હાથ
તો સોશિયલ મીડિયા પર ભડક્યાં ફેન્સ
શોના પહેલાં દિવસથી જ રુબીના દિલેકને ટાર્ગેટ બનાવી રહ્યો છે સલમાન
શોમાં સલમાન ખાન સતત રૂબીના સાથે ખરાબ વર્તન કરતો જોવા મળી રહ્યો છે. વીકેન્ડ કા વારમાં જ્યારે સલમાને અર્શી ખાનની બધી જ ખરાબ હરકતોને નજરઅંદાજ કરીને રૂબીનાને તેની ટચલી આંગળી દેખાડવા તેના પર નિશાન સાધ્યું તો બધી હદો પાર થઈ ગઈ. રૂબીના હમેશાં તેના દાયરામાં રહીને વાત કરે છે અને તેણે સલમાનની આવી નકામી વાતોનો કોઈ જવાબ પણ ન આપ્યો. એ પછી અર્શીના ખરાબ વર્તન વિશે જ્યારે અભિનવ શુક્લા જણાવવા લાગ્યો તો સલમાને તેને તરત ચુપ કરાવી દીધો. આના કારણે સોશિયલ મીડિયા પર રૂબીનાના ફેન્સ ભડક્યા છે અને તેઓ સલમાન પર નિશાન સાધી રહ્યાં છે.
એટલું જ નહીં સલમાને કહ્યું કે તે શોમાં રૂબીના દિલેકને એન્જલની જેમ રમતા જોવા માંગે છે, જ્યારે શોના બાકીના કન્ટેસ્ટન્ટને તેણે બધી છૂટ આપી છે. સલમાન ખાને તો રૂબીનાને એટલે સુધી કહી નાખ્યું કે જ્યારે કોઈ તારી સાથે કામ નહીં કરે ત્યારે શું કરીશ. તેને નસીબદાર કહી દીધી. પરંતુ સલમાન એ વાત ભૂલી ગયો કે રૂબીના મનોરંજન ઈન્ડસ્ટ્રીથી બેકગ્રાઉન્ડ ધરાવતી નથી. તે પોતાના દમ પર ટીવી ઈન્ડસ્ટ્રીમાં આવી અને પોતાની એક અલગ ઓળખ ઊભી કરી અને દર્શકોના દિલમાં પોતાના કામથી પોતાની જગ્યા બનાવી. આ રીતે સલમાનના મનમાં રૂબીનાને લઈને ગુસ્સો વધતો જઈ રહ્યો છે. આ જ કારણ છે કે રૂબીના શોમાં ખુલીને રમી નથી શકી રહી.