મુશ્કેલી / RTOના આ નિયમના કારણે ડ્રાઇવિંગ ટેસ્ટમાં લોકો થાય છે ફેલ

મોટા ભાગના વાહનમાલિકોને આ નિયમની જાણકારી નહીં હોવાના કારણે ઓટો ગિયરવાળી કાર શીખી લઇને સીધા લાઇસન્સ માટે જાય છે ત્યારે ટેસ્ટ ડ્રાઇવ ટ્રેક પર ગિયરવાળી કાર ચલાવવી ફરજિયાત હોઇ નાપાસ થાય છે. બજારમાં અત્યારે અદ્યતન કારનું આગમન થઇ ગયું છે, પરંતુ આરટીઓના નિયમો હજુ પણ જૂના જમાનાના હોઇ વાહનચાલકો લાઇસન્સ મેળવવા માટે હેરાનગતિ ભોગવી રહ્યા છે.

કેન્દ્ર સરકારે તાજેતરમાં જ મોટર વિહિકલ એક્ટમાં સુધારો કર્યો છે. તે મુજબ દંડની રકમમાં મોટો વધારો કરી દીધો છે. અમદાવાદ સહિત રાજ્યભરમાં ઓટોમેટિક કારની સંખ્યા વધી રહી છે, પરંતુ કોઈ વ્યક્તિ માત્ર ઓટોમેટિક કાર જ ચલાવવા માગતી હોઈ તો પણ તેને ગિયરવાળી કાર જ શીખવી પડે છે, કેમ કે જેમ ટુ-વ્હિલરમાં ગિયર અને ગિયરલેસ જેવી બે કેટેગરી છે તેવી કેટેગરી ફોર વ્હિલર માટે નથી.
 

આવી કારના માલિકોએ ફરજિયાત ગિયરવાળી કાર શીખીને જ લાઇસન્સ લેવા જવું પડે તો જ તે ડ્રાઇવિંગ ટેસ્ટ ટ્રેકમાં પાસ થઇ શકે. આ નિયમની મોટા ભાગના લોકોને ખબર નથી.  જે વાહનમાલિકોએ ડ્રાઇવિંગ સ્કૂલમાં ગિયરવાળી કાર ક્યારેય શીખી નથી અને સીધી ઓટોગિયરવાળી કાર ખરીદીને ચલાવતા હોય તેઓને આ સમસ્યા વધુ નડી રહી છે.

ખાસ કરીને સિનિયર સિટીઝન અને મહિલાઓ મોટા ભાગે આવી કાર ઉપયોગમાં લે છે. એકમાત્ર અમદાવાદમાં ૨૦ હજારથી વધુ ઓટોમેટિક કાર રસ્તા પર દોડી રહી છે, જ્યારે તેમના ચાલકોએ હવે લાઇસન્સ મેળવવા ગિયરવાળી કાર શીખવી પડી રહી છે. 
 

અત્યારે ઓટોમેટિક કારનું ચલણ વધારે છે. ઓટો કંપનીઓ પણ ટુ વ્હીલર સાથે ગિયરલેસ ફોર વ્હીલરની સરખામણી સાથે વધુમાં વધુ ગિયરલેસ વાહનો વેચવાનો પ્રયત્ન કરી રહી છે ત્યારે સૌથી મોટી સમસ્યા લાઇસન્સની છે. ટુ વ્હીલરમાં વિથ ગિયર અને વિધાઉટ ગિયર એમ બે કેટેગરી છે અને લાઇસન્સ પણ એ પ્રમાણે મેળવવાની વ્યવસ્થા છે, પરંતુ કાર માટે લાઇટ મોટર ‌િવહિકલનું એકમાત્ર લાઇસન્સ છે.

અમદાવાદ આરટીઓમાં રોજ અંદાજે ૨૫૦થી વધુ કારનો ડ્રાઇવિંગ ટેસ્ટ લેવામાં આવે છે, જેમાં મહિલાઓનો નાપાસ થવાનો રેશિયો અંદાજે ૫૦ ટકા હોવાનું આરટીઓ સૂત્રો દ્વારા જાણવા મળે છે. આરટીઓના જ જણાવ્યા મુજબ જો મહિલાઓ ઓટોમેટિક કારથી ડ્રાઇવિંગનો ટેસ્ટ આપે તો તેનામાં ગભરાટ પણ ઓછો રહે અને સરળતાથી લાઇસન્સ મેળવી શકે. 

અમદાવાદમાં રૂ.ચાર લાખથી શરૂ કરીને ૪૦ લાખ સુધીના સેગ્મેન્ટની ઓટો કાર માર્કેટમાં છે. શહેરમાં જેટલી કાર વેચાય છે તેનો ૨૦ ટકા હિસ્સો ઓટો ગિયર કારનો છે. દુનિયાના મોટા ભાગના દેશોમાં ગિયરલેસ અને ગિયરવાળી કાર માટેના અલગ અલગ લાઇસન્સની વ્યવસ્થા હોય છે તે મુજબ ટુ વ્હીલરની માફક ગિયરલેસ લાઇસન્સ ધરાવનાર ગિયરવાળી કાર ચલાવી શકતા નથી અને ગિયરવાળી કારનું લાઇસન્સ ધરાવનારા ગિયરલેસ કાર ચલાવી શકતા નથી, પરંતુ ભારતમાં આ પ્રકારની વ્યવસ્થા હજુ સુધી કરવામાં આવી નથી.

આ અંગે રાજ્યના વાહનવ્યવહાર પ્રધાન ઇશ્વરભાઇ પટેલે જણાવ્યું હતું કે લાઇસન્સમાં કેટેગરી બદલવા મોટર વિહિકલ એક્ટમાં ફેરફાર કરવો પડે. હાલમાં અનેક રજૂઆતોના પગલે સરકારના ધ્યાનમાં આ બાબત આવી છે, જેના પગલે અમે કેન્દ્ર સરકારને રજૂઆત કરી છે. આ બાબતનો નિર્ણય રાજ્ય સરકાર નહીં, પરંતુ કેન્દ્ર સરકાર કરે છે. કેન્દ્ર સરકારનો જવાબ આવ્યા બાદ આ બાબતે ચોક્કસ વ્યવસ્થા ગોઠવાઇ શકે.

આ અંગે એઆરટીઓ એસ.એ. મોજણીદારે જણાવ્યું હતું કે આ બાબતે અમને અનેક રજૂઆતો મળી છે. તેથી અમે વાહનવ્યવહાર કમિશનરને આ બાબતે રજૂઆત કરી છે. ગિયરલેસ કાર માટે લાઇટ મોટર વિહિકલની કેટેગરીમાં સુધારો કરવો પડે અથવા ગિયરલેસથી ટેસ્ટ આપનાર માટે લાઇસન્સમાં એ પ્રમાણેની મંજૂરી હોવી જોઇએ.