RTIમાં બેંક ફ્રોડ મુદ્દે મોટો ખુલાસો થયો છે. તેના આધારે જાણવા મળ્યું છે કે ભારતની 12 બેંકોના 20 હજાર કરોડ રૂપિયા ફસાયા છે. આ તમામ બેંકોમાં સૌથી વધારે ફ્રોડ SBI સાથે થયું હોવાનો ખુલાસો કરવામાં આવ્યો છે. મળતી માહિતી અનુસાર એપ્રિલ 2020થી જૂન 2020 સુધીમાં એટલે કે 3 મહિનામાં જ 20 હજાર કરોડનું ફ્રોડ કરાયું છે.
સરકારી બેંકો લૂંટાઈ
3 મહિનામાં 12 બેંકમાં થયું 20 હજાર કરોડનું ફ્રોડ
SBI સાથે સૌથી વધારે ફ્રોડ કેસ હોવાનું આવ્યું સામે
નાણાકીય વર્ષ 2019-20માં 1.85 લાખ કરોડનું ફ્રોડ થયું હતું. બેંક ફ્રોડના કેસમાં સતત વધારો થઈ રહ્યો છે. SBIમાં 2050 કેસ સાથે 2,325.88 કરોડ રૂપિયાનું ફ્રોડ થયું છે.
આરબીઆઈના હાલના આંકડા અનુસાર 2019-20માં બેંક અને નાણાંકીય સંસ્થામાં દગાખોરીના કિસ્સા સતત વધી રહ્યા છે. ગત વર્ષ કરતાં તેમાં 28 ટકાનો વધારો થયો છે. ગયા નાણાંકીય વર્ષમાં કુલ 8707 કેસ આવતાં 1.85 લાખ કરોડનું નુકસાન થયું હતું.
દગાખોરીની તપાસમાં લાગ્યા 2 વર્ષ
આરબીઆઈના આધારે 2019-20માં બેંકો અને નાણાંકીય સંસ્થામાં દગાખોરીના કારણે તેની તપાસમાં 2 વર્ષનો સમય લાગ્યો હતો. એટલે કે દગાખોરી થવી અને તેને પકડવી તેમાં 24 મહિનાનો સમય લાગ્યો, 100 કરોડ રૂપિયાથી વધુની દગાખોરીના કેસમાં સૌથી વધારે સમય લાગ્યો હતો. આ કેસને પકડવામાં લગભગ 63 મહિનાનો સમય લાગ્યો છે. તેમાં અનેક ખાતા ઘણા જૂના છે.