પર્દાફાશ / VTV STING : મહિને 6000ની આવક બતાવી RTEમાં એડમિશન લીધું, સાચી આવક જાણીને આંખો ફાટી જશે

શિક્ષણને લઈ સૌથી મોટો પર્દાફાશ
RTE પર હચમચાવી દે તેવો ખુલાસો
RTEનો ઉપયોગ અમીર વાલીઓ કરી રહ્યા છે
ગરીબ વાલીઓ બિચારા હજુ પણ ધક્કા જ ખાય છે

વીટીવી ગુજરાતી મીડિયાના ઈતિહાસમાં સૌ પ્રથમ વખત એવા ખુલાસો કરવા જઈ રહ્યું છે જેને તે પહેલા ક્યારે નહીં જોયો હોય...કારણ કે આ એવો ખુલાસો છે જે શિક્ષણ સાથે જોડાયેલો છે...અને શિક્ષણનું શું મહત્વ હોય છે તે આપણે સૌ જાણીએ છીએ...RTEનો કાયદો ગરીબ બાળકોને શિક્ષણના હક માટે બનાવવામાં આવ્યો હતો...કોઈ ગરીબ બાળક મોંઘામાં મોંઘી શાળામાં એડમિશનથી વંચિત ન રહી જાય તે માટે લાવવામાં આવ્યો હતો...પરંતુ આ કાયદાનો ધનિક લોકો કેવી શાતિર રીતે ઉપયોગ કરી રહ્યા છે...ગરીબનો હક છીનવતા આ ધનિકોની ખરેખર આવક કેટલી છે અને તેમણે RTE થ્રુ એડમિશન માટે કેટલી આવક બતાવી તે જાણી તમે કહેશો કે આ લોકો રૂપિયા તે અમીર છે પણ તેમની વિચાર ગરીબ છે.. 

જેની પાસે બંગલો છે તેણે પોતાની આવક 85 હજારની દર્શાવી

VTVએ વધુ તપાસ કરી તો વધુ એક વાલી હાથ લાગ્યા, આમને પણ RTEના કાયદાનો દુરુપયોગ કરી ખોટી રીતે એડમિશન લીધું હતું. રાજુભાઈ ગુજરાતી નામના એક વાલીએ પોતાની દીકરીને એડમિશન અપાવ્યું હતું અને તમણે આવકનો દાખલો રૂપિયા 85 હજારનો રજૂ કર્યો હતો. પરંતુ જ્યારે વીટીવીએ તપાસ કરી તો રાજુ ગુજરાતીનું વર્ષ 2020-21નું આઈ.ટી રીટર્ન 5 લાખ 58 હજાર 663 રૂપિયા સામે આવ્યું, સાથે જ 2 લાખની કાર લોન, 1.80 લાખની ગોલ્ડ લોન લીધી હોવાનું પણ જાણવા મળ્યું. તો રાજુ ગુજરાતીએ કન્સ્ટ્રક્શન ઈક્યુપમેન્ટ માટે 6 લાખની લોન લીધી હોવાનું પણ જાણવા મળ્યું. આટલું ઓછું હોય તેમ રાજુભાઈનો બંગલો છે અને ઘરમાં તમામ વૈભવી સુવિધાઓ જાણવા મળી.જોઈન્ટ ફેમીલીમાં રહેતા આ પરિવારે એડમિશન માટે લીવ ઈન લાઈફ એગ્રીમેન્ટ બનાવ્યું હતું અને બેંકમાં નવું ખાતું ખોલાવ્યું હતું. આ એગ્રીમેન્ટ ખોટી રીતે બનાવ્યું હોવાનું પણ સામે આવ્યું. વ્યવસાયે બ્રોકર રાજુભાઈ પાસે એક ફોર વ્હીલર અને એક ટુ વ્હીલર પણ છે. તેમણે એડમિશન માટે દર્શાવેલી આવક અને ખરેખર આવકમાં ઘણો મોટો તફાવત જોવા મળ્યો.

મહિને એક લાખની આવક છતાં વાર્ષિક દોઢ લાખની આવક બતાવી એડમિશન લઈ લીધું 

VTVએ વધુ એક વાલીની પોલ ખોલી, આ વાલીનું નામ ચિરાગ નાગર છે. પોતાના દીકરાને તેમણે એડમિશન RTE અંતર્ગત અપાવ્યું છે અને આ માટે તેમણે વાર્ષિક દોઢ લાખ રૂપિયાનો દાખલો રજૂ કર્યો હતો. પરંતુ જ્યારે અમે તપાસ કરી તો ચિરાગ નાગરના નામે અલગ અલગ 4 લોન ચાલે છે જેમાંથી કેટલીક ભરાઈ ગઈ છે. નાગર સાહેબના નામે અનેક બેંકમાં ખાતાઓ છે, વ્યવસાયે ફોટોગ્રાફર ચિરાગ નાગરની આવક વાર્ષિક 10થી 12 લાખ રૂપિયા છે અને તેઓ દર મહિને હોમ લોનનો રૂપિયા 14 હજાર 500નો હપ્તો ભરે છે. હવે આમને આવક વાર્ષિક દોઢ લાખ રૂપિયા બતાવી હતી. એટલે કે મહિને 12500 રૂપિયા પરંતુ તેઓ હપ્તો જ 14 હજાર 500નો ભરી રહ્યા છે અને આમાં ખાવાનો ખર્ચો, અન્ય ખર્ચા ક્યાંથી કાઢતા હશે? હવે આને ખોટું ન કહેવાય તો શું કહેવાય?

બે થી વધુ ઘર, કાર-બાઇક છતાં વાર્ષિક આવક 1.48 લાખ જ !  

ભાવિન પટેલ નામના વ્યક્તિએ વાર્ષિક આવક એક લાખ 48 હજાર દર્શાવી છે. પરંતુ અમે જ્યારે સત્યની તપાસ કરી તો સામે આવ્યું કે પુત્રને તો RTE અંતર્ગત એડમિશન અપાવ્યું. પરંતુ પુત્રી નવકાર પબ્લિક સ્કૂલમાં અભ્યાસ કરે છે. જે સૌથી મોંઘી સ્કૂલ કહેવાય છે. ભાવિન પટેલ શાકભાજીના હોલસેલના વેપારી છે અને અમદાવાદમાં તેમના પોતાના બેથી વધુ ઘર હોવાનું જાણવા મળ્યું અને આ ઘરમાં પણ અનેક મૂલ્યવાંન વસ્તુઓ હોવાનું જોયું. બાઈક અને કાર પણ પટેલ સાહેબ પાસે છે. હવે અમને કેવી રીતે ગરીબ કહેવા?

VTV ગુજરાતીના સળગતા સવાલ

• શિક્ષણના હકનું સૌથી મોટું ઓપરેશન
• RTEનો ઉપયોગ કેવા વાલીઓ કરે છે?
• આવી રીતે કોઈ ગરીબ બની શકશે ધનિક?
• શું ગરીબને શિક્ષણથી વંચિત જ રાખવા છે?
• ગરીબ વિદ્યાર્થીને શિક્ષણનો હક નથી?
• ધનિકો કેમ કરે છે કાયદાનો ખોટો ઉપયોગ?
• ખોટા આવકના દાખલા કોણે આપ્યા?
• મામલતદાર, TDO સામે કાર્યવાહી ક્યારે?
• ડોક્યુમેન્ટનું કેમ નથી થતું વેરિફિકેશન?