સુરતમાંથી 75 લાખ ઝડપાવવા મામલે ચોંકાવનારા CCTV અને ઝડપાયેલા ઉદય ગુર્જરના ચોંકાવનારા ફોટો સામે આવ્યા છે.
સુરતમાંથી 75 લાખ ઝડપાવવા મામલે મોટો ખુલાસો
CCTVમાં AICCના સચિવ બી.એમ.સંદીપ હોવાની આશંકા
75 લાખ રૂપિયા સાથે 2 વ્યક્તિની ધરપકડ, 1 વ્યક્તિ ફરાર
તાજેતરમાં જ સુરતમાંથી એક કારની અંદરથી રૂપિયા 75 લાખ ઝડપાવવા મામલે મોટા સમાચાર સામે આવ્યા છે. આ ઘટનાને લઇને એક ચોંકાવનારા CCTV સામે આવ્યા છે. જેમાં AICCના સચિવ બી.એમ.સંદીપ સુરતના રસ્તા પર દોડતા નજરે પડ્યા હોવાની આશંકા સેવાઇ રહી છે. મહત્વનું છે કે, કારમાંથી મળેલા પાર્કિંગ પાસમાં બી.એમ.સંદીપનો પણ પાસ હતો. કાર પકડાવાની આશંકાએ બી.એમ. સંદીપ ફરાર થયા હોવાનું કહેવાઇ રહ્યું છે.
કોઈનું આધાર કાર્ડ મળવાથી આપણે તેને દોષિત ના કહી શકીએ: નૈષધ દેસાઈ
જોકે CCTV ફૂટેજને લઈને કોંગ્રેસ પ્રવક્તા નૈષધ દેસાઈએ પ્રતિક્રિયા આપતા જણાવ્યું કે, 'CCTVમાં સંદીપ દેસાઈનો ચહેરો સ્પષ્ટ નથી દેખાતો. આ સંદીપ દેસાઈને ટાર્ગેટ કરવાનું ષડયંત્ર છે. કોઈનું આધાર કાર્ડ મળવાથી આપણે તેને દોષિત કહી શકીએ નહીં. ગાડીમાંથી 75 લાખ રૂપિયા મળ્યા છે તે કોઈએ ગણ્યા નથી. ઈન્કમટેક્સ વિભાગે પણ કોંગ્રેસને નોટિસ નથી પાઠવી.'
રૂપિયા સાથે ઝડપાયેલા ઉદય ગુર્જરનું સીધું રાજકીય કનેક્શન!
વધુમાં સુરતમાંથી 75 લાખ રૂપિયા ઝડપાવા મામલે વધુ એક ચોંકાવનારો ખુલાસો થયો છે. રૂપિયા સાથે ઝડપાયેલા ઉદય ગુર્જરનો સીધો કોંગ્રેસ સાથે સંપર્ક હોવાનું માનવામાં આવી રહ્યું છે. તમને જણાવી દઇએ કે, ઉદય ગુર્જર રાજસ્થાન PRO યુથ કોંગ્રેસ સાથે જોડાયેલો છે. રાજસ્થાન પ્રદેશ સચિવ સાથે ઉદય ગુર્જરનો સીધો સંપર્ક છે. ઉદય ગુર્જરના રાજસ્થાનના CM અશોક ગેહલોત સાથેના ફોટા સામે આવ્યા છે. ઉદય ગુર્જર Z+ સિક્યુરિટી વચ્ચે પણ દેખાય છે. રાહુલ ગાંધીની સભામાં પણ ઉદય ગુર્જર હાજર હતો.
રૂપિયા સાથે કોંગ્રેસનું નામ જોડવું એ ભાજપનું ષડયંત્ર: નૈસદ દેસાઈ
જોકે સુરતની કારમાંથી રૂ. 75 લાખ મળવા મામલે રૂપિયા ઝડપાવવા મામલે કોંગ્રેસ પ્રવક્તા નૈસદ દેસાઈએ નિવેદન આપતા જણાવ્યું હતું કે, 'રૂપિયા અને કોંગ્રેસ વચ્ચે કોઈ સબંધ નથી. રૂપિયા સાથે કોંગ્રેસનું નામ જોડવું એ ભાજપનું ષડયંત્ર છે.' ઉલ્લેખનીય છે કે, સુરતમાંથી એક કારમાંથી રૂપિયા 75 લાખ ઝડપાયા હતા. રૂપિયા મળેલી આ કારમાં કોંગ્રેસના ચિહ્નવાળા VIP પાર્કિંગ પાસ પણ મળી આવ્યા હોવાનું જાણવા મળી રહ્યું છે.
75 લાખ રૂપિયા સાથે 2 વ્યક્તિની ધરપકડ, 1 વ્યક્તિ ફરાર
સૂત્રો દ્વારા મળતી માહિતી અનુસાર, શહેરના મહિધપુરા વિસ્તારમાં સ્ટેટેસ્ટિક ટીમ દ્વારા ગાડીઓનું ચેકિંગ હાથ ધરવામાં આવ્યું હતું. આ દરમિયાન એક ઈનોવા કારમાંથી 75 લાખ રૂપિયાની રોકડ મળી આવી હતી. આ ઉપરાંત કારમાંથી કોંગ્રેસના ચિહ્ન સાથેના VVIP પાર્કિંગ પાસ પણ મળી આવ્યા હતા. ઝડપાયેલી કારમાંથી કોંગ્રેસની પત્રિકા મળી આવતા મામલો ગરમાયો છે.
આ કારમાં કુલ ત્રણ ઈસમો સવાર હતા. જેમાંથી એક ઈસમ ભાગવામાં સફળ થયો હતો. અન્ય બે લોકોને ઝડપી પાડવામાં આવ્યા છે. અધિકારીઓની પૂછપરછ કરવામાં આવતા ઝડપાયેલા બંને શખ્સોમાંથી એક ઉદય ગુર્જર દિલ્હીનો અને મહંમદ ફેજ સુરતનો રહેવાસી હોવાનું સામે આવ્યું છે. જ્યારે સંદીપ નામનો ફરાર શખ્સ કર્ણાટકનો રહેવાસી હોવાનું સામે આવ્યું છે. આ ઉપરાંત ત્રણેય ઈસમો RR આંગડિયા પેઢીમાંથી રૂપિયા લેવા આવ્યા હોવાનું અધિકારી સમક્ષ કબૂલ્યું છે.