આજ રોજ ફિલ્મ 'RRR'ના પ્રમોશન માટેની ટીમ સ્ટેચ્યુ ઓફ યુનિટીની મુલાકાતે આવ્યાં હતાં. ત્યારે જૂનિયર NTRએ કહ્યું કે, 'સરદાર વલ્લભભાઇને જ્યારે આપણે જોઇ રહ્યાં છીએ ત્યારે માથું ઊંચુ કરીને જોઇ રહ્યાં છીએ.'
ફિલ્મ RRRની ટીમ સ્ટેચ્યુ ઓફ યુનિટીની મુલાકાતે
મને ગુજરાતીઓ ખૂબ ગમે છે, અમદાવાદ-બરોડામાં ઘણા મિત્રો : રામચરણ
સરદાર વલ્લભભાઇને લઇને જૂનિયર NTRએ કર્યા ભરપૂર વખાણ
અમારા નિર્દેશકે RRRના માટે અમને પસંદ કર્યા તે અમારી માટે નસીબની વાત : NTR
જૂનિયર NTRએ કહ્યું કે, 'સરદાર વલ્લભભાઇને જ્યારે આપણે જોઇ રહ્યાં છીએ ત્યારે માથું ઊંચુ કરીને જોઇ રહ્યાં છીએ. માથું ઊંચુ રાખીને જ જીવીશું. માથું ક્યારેય ઝુકવા નહીં દઇએ. આ આપણો ભારત દેશ છે. આ આપણું ગર્વ છે કે વલ્લભભાઇ પટેલ જેવાં લોખંડી પુરૂષ આપણી પાસે હતાં. ત્યારે RRR પણ અમારા જીવનમાં એ જ માન્ય રાખે છે કે, જે રોલ અમે ભજવી રહ્યાં છીએ તે લોકો પણ એવાં જ હતાં કે માથું ગર્વભેર ઊંચુ રાખવા માટે પોતાના જીવનનું પણ બલિદાન આપી દીધું. તો એ ગર્વની વાત છે કે, તે પાત્રો માટે અમને અમારા નિર્દેશક રાજમૌલીજીએ પસંદ કર્યા છે, જે અમારી માટે એક નસીબની વાત કહેવાય.'
મારા અમદાવાદ અને બરોડામાં ઘણાં ગુજરાતી મિત્રો છે : રામચરણ
અભિનેતા રામચરણે જણાવ્યું કે, 'અહીંના લોકોનો ખૂબ પ્રેમ મળી રહ્યો છે. માત્ર સાઉથ જ નહીં પણ સમગ્ર દેશમાંથી મળી રહ્યો છે કે જે RRRને આભારી છે. અમારી માટે અહીંયા હોવું એ એક ગૌરવપૂર્ણ બાબત છે. જેમણે સર ઉંચુ કરીને જીવવાની પ્રેરણા આપી છે એવાં લોખંડી પુરુષનો અમે આદર કરીએ છીએ. મને ગુજરાતી લોકો ખૂબ ગમે છે સાથે તેમનું જમવાનું પણ મને પસંદ છે. મારા અમદાવાદ અને બરોડામાં ઘણાં ગુજરાતી મિત્રો છે.'
સરદાર પટેલે આપણને જે શીખવ્યું છે તે એક ફિલ્મમાં ઉતારવું શક્ય નથી : રાજામૌલી
ફિલ્મ ડિરેક્ટર રાજમૌલીએ જણાવ્યું કે, 'અમને આંધ્ર અને તેલંગણા જેવું સમર્થન અહીંયા મળી રહ્યું છે. સરદાર પટેલે આપણને જે શીખવ્યું છે તે એક ફિલ્મમાં ઉતારવું શક્ય નથી. હાં કોઈક દિવસ મારા સદનસીબે એ હું કરી શકીશ.' ધ કાશ્મીર ફાઇલ્સ ફિલ્મ મુદ્દે રાજમૌલીએ જણાવ્યું કે, 'તે ફિલ્મ ઘણી સારી છે, મે હજી તે જોઈ નથી, પણ મને જોવી ગમશે અને સારી ફિલ્મ માટે બજેટ જરૂરી નથી.'
એક્શનથી ભરપૂર છે ફિલ્મ
RRR એક્શન અને ઇમોશન્સથી એકદમ ભરપૂર છે. તેનું ટ્રેલર જોઇને જ ગુસબમ્પ્સ આવી જાય છે. આ ટ્રેલર જોશો એટલે ફિલ્મ જોવાની એટલી બધી ઉતાવળ આવી જશે કે વાત જ ન પૂછો.
આલિયા અને અજય પણ ફિલ્મમાં
આ ફિલ્મ તેની કાસ્ટને લઇને ખુબ ચર્ચામાં રહી છે. તેમાં જુનિયર NTR, રામ ચરણ તેજા, આલિયા ભટ્ટ, શ્રીયા સરણ અને અજય જેવા દિગ્ગજ કલાકાર છે.
એસએસ રાજામૌલી દ્વારા નિર્દેશિત આ ફિલ્મ 25 માર્ચ 2022નાં રોજ રિલીઝ થવા જઈ રહી છે. રિલીઝ પહેલા જ દર્શકોમાં આ ફિલ્મને લઈને ઉત્સુકતા જોવા મળી રહી છે. આ ફિલ્મ તમિલ, તેલુગુ, હિંદી, મલયાલમ અને બીજી ભારતીય ભાષાઓમાં રિલીઝ કરવામાં આવશે.