બિઝનેસ / કોરોનાથી ભયથી બહાર આવીને આ કંપનીનો IPO લોન્ચ થઇ રહ્યો છે; સૌ રોકાણકારોની નજર

બજારમાં ઘટાડાને કારણે IPO લોન્ચ કરવાની તૈયારી કરતી કંપનીઓ ભયભીત થઈ ગઈ છે. પરંતુ હવે ચાર મહિનાના વિરામ બાદ કેમિકલ કંપની રોઝરી બાયોટિકનો IPO આવતીકાલે એટલે કે 13 જુલાઇથી ખુલવા જઈ રહ્યો છે. રોઝરી બાયોટિક એ વર્તમાન નાણાકીય વર્ષનો પહેલો IPO અને કેલેન્ડર વર્ષનો બીજો IPO છે. જે 13 જુલાઇએ ખુલશે અને 15 જુલાઈના રોજ બંધ થશે. ઘણી કંપનીઓ ઉપરાંત રોકાણકારોની આ IPO પર નજર છે. જો IPO સફળ રહેશે તો ટૂંક સમયમાં ઘણા વધુ IPO બજારમાં આવી શકે છે.

રોઝરી બાયોટિકે આ IPO માટે ઇક્વિટી શેર દીઠ રૂપિયા 423-425ની કિંમત નક્કી કરી છે. આ IPOમાં 35 શેરનો એક લોટ હશે. એટલે કે, રોકાણકારોએ આ IPO માટે ઓછામાં ઓછા 14,805-14,875 રૂપિયાનું રોકાણ કરવું પડશે. આ IPO દ્વારા કંપની 50 કરોડ નવા શેર જારી કરશે. ઓફર ફોર સેલ દ્વારા કંપનીના પ્રમોટરોના 1,05,00,000 ઇક્વિટી શેરનું વેચાણ થશે. કંપનીના આ IPOની સાઈઝ આશરે 496 કરોડ રૂપિયા છે. 

રોઝરી બાયોટિકે જણાવ્યું છે કે તેમણે 15 મોટા રોકાણકારોને શેર દીઠ રૂપિયા 425 પર 35,02,940 શેર ફાળવ્યા છે. આ અગાઉ છેલ્લો IPO SBI કાર્ડ્સ દ્વારા ઓફર કરવામાં આવ્યો હતી, જે માર્ચ મહિનામાં આવ્યો હતો. રોઝરી બાયોટિક કંપની સ્પેશ્યાલિટી કેમિકલ્સ બનાવે છે. તેનો ઉપયોગ સાબુ, ડીટરજન્ટ, પેઇન્ટ, શાહી, કાગળ, કુદરતી અને કૃત્રિમ કાપડ બનાવવામાં કરવામાં આવે છે. શેમ્પૂ, પાવડર, સ્પ્રે અને ક્રીમ પણ આમાંથી બનાવવામાં આવે છે. પોલ્ટ્રી ફાર્મ માટે ન્યુટ્રીશન આઈટમ બનાવવામાં આવે છે.