ન્યૂઝીલેન્ડની ટીમનો મિડલ ઓર્ડર બેટ્સમેન ભારત સામે 21 ફેબ્રુઆરીએ પ્રથમ ટેસ્ટ મેચમાં રમતાંની સાથે જ એક મહારેકોર્ડ પોતાના નામે નોંધાવી દેશે. આ એ રેકોર્ડ હશે, જેને દુનિયાનો કોઈ પણ દિગ્ગજ ખેલાડી પોતાના નામે નોંધાવી શક્યો નથી. હાલ રોસ ટેલર આ સિદ્ધિ હાંસલ કરવાથી માત્ર એક ડગલું દૂર છે.
ટેલર પોતાની 100મી ટેસ્ટ મેચ રમવા મેદાનમાં ઊતરશે
100 મેચ રમનારો દુનિયાનો પ્રથમ અને એકમાત્ર ખેલાડી બની જશે
રોસ ટેલર પોતાની 100મી ટેસ્ટ મેચ રમવા મેદાનમાં ઊતરશે. આ પહેલાં ઘણા ખેલાડી 100 ટેસ્ટ મેચ પોતાની ટીમ તરફથી રમી ચૂક્યા છે, પરંતુ રોસ ટેલર ટેસ્ટ, વન ડે અને ટી-20 આંતરરાષ્ટ્રીય મેચમાં 100 મેચ રમનારો દુનિયાનો પ્રથમ અને એકમાત્ર ખેલાડી બની જશે. રોસ ટેલર પહેલાં કોઈ પણ ખેલાડી આ સિદ્ધિ હાંસલ કરી શક્યો નથી. કેટલાક ખેલાડીઓ 100 વન ડે અને 100 ટેસ્ટ તો રમ્યા છે, પરંતુ 100 ટી-૨૦ આંતરરાષ્ટ્રીય મેચ રમ્યા નથી. અન્ય કેટલાક ખેલાડીઓ 100 ટી-20 અને 100 વન ડે રમ્યા છે, પરંતુ તેઓ 100 ટેસ્ટ રમ્યા નથી.
હવે પહેલી વાર એવું બનશે કે આઇસીસીના આ મહારેકોર્ડ રોસ ટેલર પોતાના નામે કરી લેશે. રોસ ટેલર દુનિયાનો પ્રથમ એવો ખેલાડી બની જશે, જેણે 100 વન ડે ઇન્ટરનેશનલ, 100 ટી-20 ઇન્ટરનેશનલ અને 100 ટેસ્ટ મેચ રમી હોય. તાજેતરમાં ભારત સામે જ તેણે પોતાની 100મી ટી-20 આંતરરાષ્ટ્રીય મેચ રમી હતી.
ઉલ્લેખનીય છે કે રોસ ટેલર 231 વન ડે ઇન્ટરનેશનલ, 100 ટી-20 ઇન્ટરનેશનલ અને 99 ટેસ્ટ મેચ રમી ચૂક્યો છે. ટી-20 ઇન્ટરનેશનલમાં 100 મેચ રમનારો તે દુનિયાનો ત્રીજો ખેલાડી બન્યો હતો. ટેલરની પહેલાં પાકિસ્તાનનો શોએબ મલિક અને ભારતીય ઓપનર શર્મા 100 ટી-20 મેચ રમી ચૂક્યા છે.