અમદાવાદ / IPS સફિન હસન બનીને રોમિયોએ યુવતીને ફસાવી, સાયબર ક્રાઇમમાં દાખલ થઈ ફરિયાદ

• IPS સફિન હસનના નામે વાત કરતા ઈસમ વિરુદ્ધ ફરિયાદ
• અમદાવાદ સાયબર ક્રાઇમમાં એક યુવતીએ નોંધાવી ફરિયાદ 
• સાયબર ક્રાઈમે રોમિયોને પકડવા માટે પ્રયાસો હાથ ધર્યા

આજના વર્તમાન સમયમાં સોશિયલ મીડિયા એક જાણીતું પ્લેટફોર્મ બન્યું છે અને સોશિયલ મીડિયાથી કોઈ પણ બાકાત રહી શક્યું નથી, તેમાય  યુવાનોમાં અને નાના બાળકોમાં સોશિયલ મીડિયોનો દિવસે દિવસે ક્રેઝ વધી રહ્યો છે ત્યારે સાઈબર ક્રાઈમના કિસ્સાઓનું  પ્રમાણ પણ વધી ગયું છે. સોશિયલ મીડિયામાં છેડતી, યુવતીઓને હેરાન કરવાના ઘણા કિસ્સાઓ આવતા હોય છે જેમાં યુવતીઓને ગંદા મેસેજ મોકલવા, બિભત્સ ફોટો મોકલવા સહિત ધમકી આપવી જેવા કિસ્સાઓ બનતા હોય છે. તેવામાં હવે IPS સફિન હસનના નામે કોઈ અજાણ્યા ઈસમે યુવતીને મેસેજ કરી તેની સાથે ફ્રેન્ડશીપ કરવા માટે પ્રયાસ કર્યો હતો. સાથે જ આ ઈસમે યુવતીને અશ્લીલ મેસેજ કરતા યુવતીએ અમદાવાદ સાયબર ક્રાઈમમાં ફરિયાદ નોંધાવી છે. 

અજાણ્યા નંબરથી આવ્યા હતા મેસેજ 
ફરિયાદ મુજબ, અમદાવાદના દાણીલીમડા વિસ્તારમાં રહેતી અને ખાનગી કંપનીમાં નોકરી કરતી યુવતીના ફોન પર થોડા દિવસો અગાઉ અજાણ્યા નંબરથી મેસેજો આવ્યા હતા. જોકે, યુવતી આ ઈસમને ઓળખતી ન હોવાથી તેને મેસેજ કે ફોન કરવાની ના પાડી દીધી હતી. પરંતુ આ ઈસમ દરરોજ અવાર નવાર મેસેજ કરવા લાગતા યુવતીએ તેનો નંબર બ્લોક કરી દીધો હતો.

વીડિયો કોલ કરવાનો ઈનકાર કર્યો
થોડા દિવસ બાદ આ ઈસમે અજાણ્યા નંબર ઉપરથી ફોન કરીને હતું કે, હું આઈપીએસ ઓફિસ સફીન હસન બોલું છું. જે બાદ ફોન કરનાર વ્યક્તિએ યુવતી સાથે મિત્રતા કેળવવા માટેના પ્રયાસો કર્યા હતા. સાથે જ આ ઈસમ યુવતીને સોશિયલ મીડિયા પ્લેટફોર્મ વોટ્સએપ પર પણ મેસેજ કરતો હતો. જોકે, યુવતીને શંકા જતા તેણે આ ઈસમને વીડિયો કોલ કરવા કહ્યું હતું, પરંતુ તેણે વીડિયો કોલ કરવાની સ્પષ્ટ ના પાડી દીધી હતી. 

પોલીસે આ મામલે ફરિયાદ દાખલ કરીને વધુ કાર્યવાહી હાથ ધરી
જે બાદ યુવતીએ આ ઈસમનો ફોન ઉપાડવાનું બંધ કરી દેતા તે ઈસમ અલગ-અલગ નંબર પરથી યુવતીને ફોન કરતો હતો અને વાત કરવાનો પ્રયાસ કરતો હતો. સાથે જ વોટ્સએપ પર અશ્લીલ મેસેજો મોકલતો હતો.  અંતે કંટાળીને યુવતીએ સમગ્ર ઘટનાની જાણ પોલીસને કરી છે. યુવતીએ હાલ અમદાવાદ શાહીબાગ ક્રાઈમમાં ફરિયાદ નોંધાવી છે.  સમગ્ર મામલે સાયબર ક્રાઈમ પોલીસે ગુનો નોંધી આવા ટપોરીને પકડવા માટેની તજવીજ હાથ ધરી છે.