અત્યારે 'ખતરો કે ખિલાડી 10' ચાલી રહ્યું છે. આ શોમાં કન્ટેસ્ટન્ટે જીવના જોખમે અલગ-અલગ ખતરનાક સ્ટંટ કરવાના હોય છે. રોહિત શેટ્ટી આ શોને હોસ્ટ કરી રહ્યો છે. ત્યારે શોમાં એક્ટ્રેસ તેજસ્વી પ્રકાશ તેના ટાસ્કમાં બેસ્ટ પર્ફોમન્સથી લોકોનું દિલ જીતી રહી છે. શોમાં રોહિત સાથેની તેની મસ્તી પણ લોકોને ખૂબ પસંદ આવી રહી છે. પરંતુ શોમાં એવું કંઈક થયું કે રોહિત તેના પર ગુસ્સે થઈ ગયો અને તેને હદમાં રહેવાનું કહી દીધું.
ખતરો કે ખિલાડીમાં ચાલુ શૂટિંગે રોહિત શેટ્ટીને આવ્યો ગુસ્સો
શોના એક પ્રોમોમાં રોહિત શેટ્ટી તેજસ્વી પર ગુસ્સો કરતાં જોવા મળી રહ્યો છે. હકીકતમાં તેજસ્વી રોહિત પર આરોપ લગાવે છે કે, તે અમૃતા ખાનવિલકર સાથે થોડું સારી રીતે વર્તન કરે. આ જ વાતને લઈને બંને વચ્ચે બોલાચાલી થઈ જાય છે.
શોમાં તેજસ્વી આ બધું ફની અંદાજમાં કહે છે. તેજસ્વી કહે છે કે, મારા પગ બળી ગયા છે એટલે રોહિત સરે અમૃતાને એડવાન્ટેજ આપ્યું. જોકે, રોહિત આ વાત પર તેજસ્વીને ચેતવણી આપે છે અને કહે છે કે, હું અહીં કોઈ શોર્ટકટ માટે નથી આવ્યો, આજે હું જે પણ મુકામ પર છું તેના માટે મેં ઘણી જ મહેનત કરી છે. હદમાં રહો નહીં તો શોમાંથી બહાર કરી દેવામાં આવશે. હવે જોવાનું એ રહ્યું કે, રોહિત તેજસ્વીથી સીરિયલી નારાજ થઈ ગયો કે પછી એ તેની સાથે મજાક કરી રહ્યો છે.
તમને જણાવી દઈએ કે, થોડાં દિવસ પહેલાં શોમાં આવો જ એક ટાસ્ક થયો હતો, જે પહેલાં ક્યારેય શોમાં જોવા મળ્યો નથી. જેના માટે કન્ટેસ્ટન્ટે પોતાના ફોનની કુરબાની આપવી પડી. ટાસ્ક મુજબ, કંન્ટેસ્ટન્ટને 3 મોબાઈલ ફોનને અનલોક કરવાના હતા. તેમને ત્રણ પાસવર્ડ પણ આપવામાં આવ્યો હતો. જે અલગ-અલગ કંટેનરમાં હતા. એ કંટેનરમાં કીડા ભરેલાં હતા. ટ્વિસ્ટ એ હતો કે, જો કંટેસ્ટન્ટ આ ટાસ્કમાં ફેલ થઈ જાય તો ફોન તોડી દેવાનો. તેજસ્વી ટાસ્ક પૂરો નથી કરી શકતી તો તેનો ફોન તોડી દેવામાં આવે છે. પોતાનો ફોન તૂટી જવાને કારણે તેજસ્વી પ્રકાશ ઘણી જ નારાજ થઈ ગઈ હતી.