ક્રિકેટ / છગ્ગા ફટકારવાના મામલે આંતરરાષ્ટ્રીય ક્રિકેટમાં રોહિત શર્માનું એકચક્રી શાસન

રોહિત શર્મા ગત રવિવારે બેંગલુરુ ખાતે રમાયેલી વન ડેમાં પોતાના અસલી મિજાજમાં જોવા મળ્યો અને કાંગારું બોલર્સની જોરદાર ધોલાઈ કરી. ઓસ્ટ્રેલિયાનો કોઈ બોલર રોહિત સામે પ્રભાવ પાડી શક્યો નહીં. રોહિતે બેંગલુરુમાં જોરદાર છ છગ્ગા ફટકાર્યા. રોહિત શર્મા હવે આંતરરાષ્ટ્રીય ક્રિકેટમાં પોતાના ડેબ્યૂ બાદથી સૌથી વધુ છગ્ગા ફટકારનારો બેટ્સમેન બની ગયો છે. તેણે પોતાના ડેબ્યૂ બાદ છગ્ગા ફટકારવાના મામલામાં ક્રિસ ગેલને પણ પાછળ છોડી દીધો છે.
રોહિત શર્માએ તા. ૨૩ જૂન, ૨૦૦૭માં આંતરરાષ્ટ્રીય ક્રિકેટમાં પદાર્પણ કર્યું હતું. ત્યાર બાદથી તે અત્યાર સુધી વન ડે ક્રિકેટમાં સૌથી ‍વધુ છગ્ગા ફટકારી ચૂક્યો છે. પોતાના ડેબ્યૂ બાદથી વન ડેમાં તેણે છગ્ગા ફટકારવાના મામલામાં ક્રિસ ગેલને પણ પાછળ છોડી દીધો છે. રોહિતે પોતાના ડેબ્યૂ બાદ વન ડેમાં અત્યાર સુધીમાં કુલ ૨૪૩ છગ્ગા ફટકાર્યા છે, જ્યારે ક્રિસ ગેઇલના ૨૪૨ છગ્ગા છે.

રોહિતે આંતરરાષ્ટ્રીય ક્રિકેટના ત્રણેય ફોર્મેટમાં ડેબ્યૂ બાદ સૌથી વધુ છગ્ગા ફટકાર્યા છે. રોહિતના નામ પર અત્યાર સુધીમાં કુલ ૪૧૫ છગ્ગા નોંધાઈ ચૂક્યા છે, જ્યારે ૪૧૩ છગ્ગા સાથે ક્રિસ ગેલ બીજા સ્થાને છે. આ આંકડા પણ રોહિતના ડેબ્યૂ એટલે કે ૨૩ જૂન, ૨૦૦૭ બાદના છે.

નવા દાયકાની પ્રથમ સદી રોહિતના નામેઃ
રોહિતે ભારત તરફથી વન ડે ક્રિકેટમાં નવા દાયકાની પ્રથમ સદી ફટકારી છે. રોહિતે બેંગલુરુ વન ડેમાં ૧૨૮ બોલમાં ૧૧૯ રનની ઇનિંગ્સ રમી, જેમાં આઠ ચોગ્ગા અને છ છગ્ગા સામેલ હતા. છેલ્લા ત્રણ દાયકાની શરૂઆતમાં પ્રથમ સદી ફટકારનારા બેટ્સમેનો પર નજર કરવામાં આવે તો ૧૯૯૦માં મોહંમદ અઝહરુદ્દીન, ૨૦૦૦માં વીવીએસ લક્ષ્મણ, ૨૦૧૦માં મહેન્દ્રસિંહ ધોની અને ૨૦૨૦માં રોહિત શર્માનું નામ આવે છે.