IPL ની આ સિઝનમાં કેપ્ટન રોહિત શર્માની ટીમ મુંબઈ ઈંડિયન્સનું પ્રદર્શન કંગાળ રહ્યું છે. સતત સાત મેચ હાર્યા પછી ગઈકાલે રોહિતનાં જન્મદિવસે ટીમનો વિજય થયો હતો.
પોતાના બર્થડે પર રોહિત મેચ જીતવાની સાથે બીજું એક મિશન લઈને મેદાનમાં ઉતર્યો હતો. રોહિત આ વખતે પર્યાવરણ સંબંધિત મુદ્દાઓને રમત થકી વાચા આપવાના પ્રયાસોના ભાગરૂપે પગમાં ખાસ પ્રકારના ડિઝાઇન કરેલ શૂઝ પહેરીને રમવા માટે ઉતર્યો હતો. જેના પર પ્લાસ્ટિક વેસ્ટને ખતમ કરવાનો અને દરિયાઈ જીવ સૃષ્ટિને બચાવવાનો સંદેશ લખેલો હતો.
ત્રીજી વખત અનોખા શૂઝ પહેરીને રમવા ઉતર્યો
આ ત્રીજી વખત એવી ઘટનાં બની છે કે રોહિતે કોઈ સારા પ્રયાસને આ પ્રકારે સમર્થન કર્યું હોય. તેણે ઇન્સ્ટાગ્રામ પર પોસ્ટ કરીને પણ લખ્યું હતું કે તે શુઝની કંપની એડીડાસ સાથે મળીને આ ગ્રહને વધારે સારો બનાવવાનો પ્રયાસ કરી રહ્યા છે. રોહિતે બનાવેલ એક એક રન માટે મુંબઈના દરિયા કિનારેથી આ કંપની 10 પ્લાસ્ટિકની બોટલ્સ ઉઠાવશે અને દરિયાઈ જીવસૃષ્ટિને બચાવવાના પ્રયાસોમાં યોગદાન આપશે.
ઉલ્લેખનીય છે કે અગાઉની સિઝનમાં એક મેચમાં કે જે રોયલ ચેલેન્જર્સ બેંગલોર સામે રમાઈ હતી તેમાં વિલુપ્ત થઈ રહેલી ગેંડાની પ્રજાતિને બચાવવાના પ્રયાસોના ભાગરૂપે એવી પ્રિન્ટવાળા શૂઝ પહેરીને એક અનોખો સંદેશ આપ્યો હતો. ત્યાર બાદ આ વખતે પણ રોહિતે ‘End Plastic Waste’ લખેલા જૂતાં પહેર્યા હતા.
સતત પરાજયની હારમાળા પછી આજે રોહિતને રાહતનો શ્વાસ લેવાનો અવસર તેના પોતાના બર્થ ડે ના દિવસે ટીમે આપ્યો છે જો કે તે પોતે માત્ર 2 રને જ આઉટ થઈ ગયો હતો અને આ વિજય છતાં ટીમ લગભગ હવે પ્લેઓફની રેસમાંથી બહાર થઈ ચૂકી છે માટે જીતથી ખાસ ફરક પડતો નથી.
પાંચ વખતની ચેમ્પિયન અને હાલમાં પ્લેઓફની રેસમાંથી બહાર થઈ ગયેલી મુંબઈ ઈન્ડિયન્સે આખરે જીતનો સ્વાદ ચાખ્યો. તેણે રાજસ્થાન રોયલ્સને 5 વિકેટથી હરાવ્યું અને કેપ્ટન રોહિત શર્માને તેના જન્મદિવસના અવસર પર તેના જીતની ભેટ આપી હતી.
સાત મેચ પછી જીત્યું MI
પ્રથમ બેટિંગ કરતા રાજસ્થાને 6 વિકેટે 158 રન બનાવ્યા હતા. જવાબમાં મુંબઈએ 5 વિકેટે 161 રન બનાવીને જીત મેળવી હતી. સૂર્યકુમાર યાદવ મેચનો હીરો રહ્યો, તેણે 39 બોલમાં 5 ચોગ્ગા અને 2 છગ્ગાની મદદથી 51 રન ફટકાર્યા, જ્યારે ટિમ ડેવિડે અણનમ 20 રન બનાવ્યા. ડેનિયલ સેમ્સે વિજેતા સિક્સ ફટકારી હતી.
અગાઉ, રાજસ્થાન રોયલ્સે ઈનફોર્મ જોસ બટલરના 52 બોલમાં 67 રનની મદદથી મુંબઈ ઈન્ડિયન્સ સામે 6 વિકેટે 158 રન બનાવ્યા હતા. બટલર, જોકે, શરૂઆતમાં એવો ફોર્મમાં લાગતો ન હતો પરંતુ પછીથી તેણે ઓફ-સ્પિનર રિતિક શોકીનને સતત ચાર છગ્ગા ફટકારીને રન-રેટ વધાર્યો હતો. તે 16મી ઓવરના છેલ્લા બોલ પર ડીપમાં કેચ આપી બેઠો હતો. અગાઉની મેચોમાં સારી ઇકોનોમીથી બોલિંગ કરનાર શોકીને આજે ત્રણ ઓવરમાં 47 રન આપ્યા, જેમાં છ છગ્ગાનો સમાવેશ થાય છે.