મુંબઈ ઈન્ડિયન્સના કેપ્ટન રોહિત શર્માએ ટી-20 ક્રિકેટમાં એક ખાસ સિદ્ધી પ્રાપ્ત કરી છે. શારજાહમાં રાજસ્થાન રોયલ્સની સામેની મેચમાં રોહિત શર્માએ 13 બોલમાં નાની પરંતુ તોફાની ઈનિંગ રમી અને ઈતિહાસ રચી દીધો.
ટી-20 ફોર્મેટમાં 400 છગ્ગા બનાવનારા ભારત-એશિયાના પ્રથમ ખેલાડી
IPLમાં રોહિત શર્માએ 227 છગ્ગા ફટકાર્યા
રોહિત શર્મા 400 છગ્ગા બનાવનારા એશિયાના પ્રથમ ખેલાડી
રોહિત શર્મા હવે ટી-20 ફોર્મેટમાં 400 છગ્ગા બનાવનારા ભારત અને એશિયાના પ્રથમ ખેલાડી બની ગયા છે. આ મામલે ભારતના સુરેશ રૈના 325 છગ્ગા બનાવનારા બીજા ક્રમાંકે છે. રોહિતે રાજસ્થાન સામેની પ્રથમ ઓવરમાં મુસ્તફિઝૂર રહેમાનની બોલમાં પ્રથમ છગ્ગો લગાવ્યો છે. ત્યારબાદ તેમણે શ્રેયસ ગોપાલની પ્રથમ ઓવરમાં પોતાનો બીજો છગ્ગો લગાવ્યો. આ રીતે તેમણે ટી-20 ફોર્મેટમાં 400 છગ્ગાની મહત્વની સિદ્ધી પ્રાપ્ત કરી.
આઈપીએલમાં રોહિતે સૌથી વધુ 227 છગ્ગા ફટકાર્યા
જો આઈપીએલની વાત કરીએ તો રોહિતે 227 છગ્ગા ફટકાર્યા છે અને તેઓ સૌથી વધુ છગ્ગા ફટકારવા મામલે ગેલ અને ડીવિલિયર્સ બાદ ત્રીજા સ્થાને છે. આઈપીએલમાં સૌથી વધુ છગ્ગા લગાવવાનો રેકોર્ડ કેરેબિયન દિગ્ગજ ક્રિસ ગેલના નામે છે. તેઓ 300 છગ્ગા બનાવનારા એકલા બેટ્સમેન છે.
ટી-20 ક્રિકેટમાં સૌથી વધુ છગ્ગા બનાવવાનો રેકોર્ડ ક્રિસ ગેલના નામે
ઉલ્લેખનીય છે કે, ટી-20 ક્રિકેટમાં સૌથી વધુ છગ્ગા ફટકારવાનો રેકોર્ડ વેસ્ટ ઈન્ડીઝના આક્રમક બેટ્સમેન ક્રિસ ગેલના નામે છે. તેમણે અત્યાર સુધી 1042 છગ્ગા ફટકાર્યા છે. ગેલ 1000થી વધુ છગ્ગા બનાવનારા વિશ્વના એકમાત્ર બેટ્સમેન છે.
આ ખેલાડીઓએ સૌથી વધુ છગ્ગા ફટકાર્યા
ટી-20 ક્રિકેટમાં સૌથી વધુ છગ્ગા જે ખેલાડીઓએ ફટકાર્યા છે. તેમાં ક્રિસ ગેલ (1042), કીરોન પોલાર્ડ (758), આંદ્રે રસેલ (510), બ્રેન્ડન મૈકુલમ (485), શેન વોટસન (467), એબી ડીવિલિયર્સ (434) અને રોહિત શર્મા (400)ના નામનો સમાવેશ થાય છે. જેમાં મૈકુલમ અને વોટસનને છોડીને બાકી દરેક ખેલાડીઓ સક્રિય છે અને સતત ટી-20 મેચો રમી ચૂક્યા છે.