તમે મોટાભાગે 'WWE' (વર્લ્ડ રેસલિંગ એન્ટરટેઇનમેન્ટ)માં અથવા અન્ય રમતોમાં ખેલાડીઓને એકબીજા પર મહેણાં-ટોણાં મારતા, કટાક્ષ કરતા, ડરાવવા કે નિરાશ કરવાની કોશિશ કરતા જોયા જ હશે. હકીકતમાં, આ પોતાના કટ્ટર હરિફ કે વિરોધીને માનસિક રીતે નબળા પાડવાની એક રીત છે, જેને 'ટ્રેશ ટૉક' કહેવામાં આવે છે. આ ટ્રેશ ટૉકમાં ખેલાડીઓનું દિલ દુ:ખાય છે અને તેઓ ઉશ્કેરાય જાય છે. કેટલીક વખત તેઓ તેમની કુદરતી રમત નથી રમી શકતા અને આ કારણે હારી જાય છે.
વૈજ્ઞાનિકોએ જણાવ્યું છે કે, આ ટ્રેશ ટૉક ફક્ત માણસ દ્વારા જ કરવામાં આવે ત્યારે દુ:ખ નથી પહોંચાડતી પણ જ્યારે કોઈ રોબોટ આવી જ ટ્રેશ ટૉક કરે ત્યારે પણ માણસોનું દિલ દુ:ખાય છે. સંશોધનકારો દ્વારા હાથ ધરવામાં આવેલા અભ્યાસમાં જણાવાયું છે કે, જ્યારે લોકોને હ્યુમનૉઈડ રોબોટ સાથે રમતો રમવાનું કહેવામાં આવ્યું ત્યારે ચોંકાવનારી વાત સામે આવી હતી. રોબોટે તેમને નિરાશ કર્યા, ટોણાં માર્યા ત્યારે તેમનું પ્રદર્શન બગડ્યું હતું.
બીજી તરફ રોબોટ દ્વારા પ્રોત્સાહિત કરવાથી તેમનું પ્રદર્શન સુધર્યું પણ હતું. રમતમાં ભાગ લેનારા લોકોએ જણાવ્યું હતું કે, રોબોટનાં મહેણાં-ટોણાં તેમને બેચેન બનાવતા હતા અને ઉશ્કેરતા હતા, જેથી તેઓ સારી રીતે રમત રમી શક્યા નહોતા. એક સહભાગીએ જણાવ્યું હતું કે, તેને રોબોટના કટાક્ષ અને ટોણાં જરાય ગમતા ન હતા, પરંતુ તેને એ રીતે જ ડિઝાઇન કરવામાં આવ્યા હોય તો તેના માટે રોબોટને દોષી ઠેરવી શકાય નહીં.
આ અભ્યાસના લેખક એરોન એમ. રુથે અમેરિકાની કરનેગી મલોં યુનિવર્સિટી (સીએમયુ)માં અનુસ્નાતક કરતા હતા ત્યારે આ પ્રયોગ કર્યો હતો. આ અભ્યાસ ગયા મહિને નવી દિલ્હીમાં રોબોટ-હ્યુમન કમ્યુનિકેશન પરની આંતરરાષ્ટ્રીય પરિષદમાં પણ રજૂ થયો હતો. સંશોધનકારોએ જણાવ્યું છે કે, આ અભ્યાસ રોબોટ-હ્યુમન ઇન્ટરેક્શન અભ્યાસ કરતા સંપૂર્ણપણે અલગ છે, જે દર્શાવે છે કે મનુષ્ય અને રોબોટ કેવી રીતે સાથે મળીને કામ કરી શકે છે.
સીએમયુની ઈન્સ્ટિટ્યૂટ ફૉર સૉફ્ટવેર રિસર્ચના એક સહાયક પ્રોફેસર ફી ફેંગે કહ્યું હતું કે, આ પહેલો અભ્યાસ છે, જેમાં મનુષ્ય અને રોબોટ એક સાથે મળીને કામ કરી રહ્યા નથી. તેમણે કહ્યું કે, આ એ દુનિયા માટે બહુ મોટો ખતરાનો સંકેત છે, જ્યાં ભવિષ્યમાં આર્ટિફિશયલ ઈન્ટેલિજન્સ (એઆઈ)થી સજ્જ મશીનો અને રોબોટની ભરમાર થવાની છે. અમને આશા છે કે, આપણા હોમ આસિસ્ટન્ટ સહકારની ભાવના રાખશે, પરંતુ જો એઆઇથી સજ્જ સહાયકો (રોબોટ) તેમની પસંદગીને પ્રાધાન્ય આપવાનું શરૂ કરી દેશે તો શું થશે?