ચમત્કાર / રોબોટે રચ્યો ઇતિહાસ! માણસની કોઈ પણ મદદ લીધા વગર જાતે કરી એવી સર્જરી કે જે કરતાં ડોકટરોને પણ ફાંફાં પડી જાય

• રોબોટે કર્યુ સફળ ઑપરેશન
• ડુક્કર પર લેપ્રોસ્કોપિક સર્જરી કરી
• સંશોધકોએ મનુષ્યો કરતા પણ સારી સર્જરી ગણાવી

હવે એ દિવસો દૂર નથી કે રોબોટ માણસની મદદ વિના જ માણસની સફળ સર્જરી કરી શકે. જો કે આવુ થયુ પણ છે. વિશ્વમાં સૌ પ્રથમવાર રોબોટે માણસની મદદ લીધા વિના જ ડુક્કર પર લેપ્રોસ્કોપિક સર્જરી સફળતાપૂર્વક પાર પાડી. અમેરિકાની પ્રતિષ્ઠિત જ્હોન હોપકિન્સ યુનિવર્સિટીના સ્માર્ટ ટિશ્યુ ઓટોનોમસ રોબોટ (STAR) એ ડુક્કરની પેશી પર આ સર્જરી કરી છે. સંશોધકોએ શોધી કાઢ્યું કે રોબોટ્સે પ્રાણીઓની અંદર આ સર્જરી મનુષ્યો કરતાં 'ઘણી સારી' રીતે કરી હતી. 

શું કહે છે સંશોધકો

અમેરિકન સંશોધકોએ કહ્યું કે આ ઓપરેશન રોબોટિક્સની દુનિયામાં એક મોટી સફળતા છે, જે ભવિષ્યમાં સંપૂર્ણ સ્વસંચાલિત માનવ ઓપરેશન તરફ દોરી જશે. આ ઓપરેશન દ્વારા રોબોટે ડુક્કરના આંતરડાના બે છેડાને જોડ્યા. અત્યાર સુધીમાં 4 પશુઓમાં આ પ્રકારનું ઓપરેશન કરવામાં આવ્યું છે. સંશોધનમાં કહેવામાં આવ્યું છે કે ઓપરેશન દરમિયાન રોબોટે ખૂબ જ સારું કામ કર્યું છે, જેના માટે ઉચ્ચ કૌશલ્યની જરૂર છે.

માણસ કરતા પણ વધુ સારા પરિણામ

રિસર્ચના વરિષ્ઠ લેખક ડૉ. એક્સેલ ક્રિગરે કહ્યું કે આ ઓપરેશનમાં દુનિયામાં પહેલીવાર રોબોટે કોઈપણ માનવ મદદ વગર ઓપરેશન કર્યું. પેટમાં બે આંતરડાને જોડવાનું સૌથી પડકારજનક પગલું છે અને તેના માટે ડૉક્ટરની કુશળતા જરૂરી છે. હાથની સહેજ બેદરકારી અથવા હલનચલન  થાય તો દર્દીને ગંભીર સમસ્યાઓનું કારણ બની શકે છે.ડૉ. એક્સેલ ક્રિગરે લખ્યું કે અમારું સંશોધન બતાવે છે કે આપણે આંતરડાના બે છેડાને જોડવાનું સ્વસંચાલિત કરી શકીએ છીએ, જે સર્જરીનું ખૂબ જ મુશ્કેલ અને નાજુક કાર્ય છે. રોબોટે ચાર પ્રાણીઓમાં આ ઓપરેશન કર્યું અને આ ઓપરેશનમાં માણસો કરતાં વધુ સારા પરિણામો આપ્યા. મહત્વનું છે કે  એક્સેલ જોન્સ હોપકિન્સ ખાતે ઇલેક્ટ્રિકલ અને કમ્પ્યુટર એન્જિનિયરિંગના પ્રોફેસર છે. નિષ્ણાતોનું કહેવું છે કે રોબોટમાં નવા ફીચર્સ આવવાથી તે વધુ સારી રીતે કામ કરી શકશે.