ભારતીય સેનાએ કાશ્મીર ઘાટીમાં આતંકના સંપૂર્ણ સફાયા માટે તેની ‘રોબો આર્મી’ ઉતારવાની તૈયારી કરી લીધી છે. આ રોબોટ્સ આતંકવાદીઓના ગુપ્ત ઠેકાણાઓ-કેમ્પોમાં ઘૂસીને તેમની સાચી સ્થિતિ જણાવશે એટલું જ નહીં, પરંતુ તેને તબાહ કરવા માટે પણ સક્ષમ હશે. ખાસ વાત એ છે કે, આ ‘રોબો આર્મી’ આ મહિનાના અંત સુધીમાં રણમેદાનમાં ઉતારી દેવામાં આવશે.
કાશ્મીર ઘાટીમાં આતંકના સંપૂર્ણ સફાયા માટે તેની ‘રોબો આર્મી’ ઉતારવાની તૈયારી
‘રોબો આર્મી’ આ મહિનાના અંત સુધીમાં રણમેદાનમાં ઉતારી દેવામાં આવશે
સંરક્ષણ મંત્રાલય પ્રથમ તબક્કામાં 550 રોબોટિક્સ સર્વેલન્સ યનિટ ખરીદી રહ્યું છે
આ રોબોટ્સ આતંક પ્રભાવિત વિસ્તારોમાં સેનાના આતંક વિરોધી યુનિટ અને સુરક્ષાદળો માટે ખુબ મદદગાર સાબિત થશે. આ ઉપરાંત સેનાને સંપૂર્ણ રીતે હાઈટેક બનાવવાનું કામ પણ ઝડપ પકડશે. એટલું જ નહીં, દુશ્મનની ઘૂસણખોરીને નિષ્ફળ બનાવવા અને પાકિસ્તાની સેનાના હુમલાઓને નિષ્ફળ બનાવવા માટે આ રોબોટ ખૂબ અસરકારક સાબિત થશે.
સંરક્ષણ મંત્રાલય પ્રથમ તબક્કામાં 550 રોબોટિક્સ સર્વેલન્સ યુનિટ ખરીદશે
આ અંગે સંબંધિત અધિકારીઓએ જણાવ્યું કે, બદલાતા જમાનાની જરૂરિયાતો અનુસાર સેનાને અત્યાધુનિક બનાવવાનો પ્રયાસ ચાલી રહ્યો છે. આ અંતર્ગત સંરક્ષણ મંત્રાલય પ્રથમ તબક્કામાં 550 રોબોટિક્સ સર્વેલન્સ યુનિટ ખરીદી રહ્યું છે અને ટૂંક સમયમાં જ તેમને આર્મીના હવાલે કરવાની તડામાર તૈયારી ચાલી રહી છે. અધિકારીઓએ વધુમાં જણાવ્યું હતું કે, આ રોબોટ્સ કોઈપણ આતંક વિરોધી અભિયાન દરમિયાન આતંકીઓ પર હુમલો કરવામાં મદદરૂપ થશે.
આતંકીઓ વિરુદ્ધની કાર્યવાહીમાં સુરક્ષાદળો માટે સૌથી મોટો પડકાર તેમની ચોક્કસ સંખ્યા અને તેમની પાસે ઉપલબ્ધ હથિયારોની સંપૂર્ણ માહિતી મેળવવી હોય છે. આ રોબોટ ઑપરેશન દરમિયાન કોઈ પણ મકાન કે અન્ય આતંકી ઠેકાણા-કેમ્પમાં સરળતાથી ઘૂસીને ત્યાંની પ્રવૃત્તિઓની સંપૂર્ણ વિગતો લઈ શકે તેવા સક્ષમ છે. આ ઉપરાંત વીડિયોગ્રાફીના માધ્યમથી આતંકીઓના લોકેશન શોધવામાં પણ તે મદદ કરશે. દરેક યુનિટમાં એક લૉન્ચિંગ સિસ્ટમ, એક ટ્રાન્સમિશન સિસ્ટમ અને એક એચડી કેમેરા પણ હશે, જે રાત-દિવસ તસ્વીરો લઈ શકવામાં સક્ષમ હશે. તે કોઈપણ મકાન કે ઈમારતથી લગભગ 200 મીટરના અંતર સુધીના સ્પષ્ટ વિડિઓ ફૂટેજ પણ મોકલી શકે છે.
રોબોટિક્સ સર્વેલન્સ યુનિટ ચલાવવા માટે અધિકારીઓને સ્પેશિયલ ટ્રેનિંગ આપવામાં આવશે
તે રોબોટ લાઈન ઑફ કન્ટ્રોલ (એલઓસી) પર નજર રાખી શકે છે અને તે આસપાસની એવી કોઈપણ જગ્યાની સઘન તપાસ કરી શકે છે, જ્યાં ઘુસણખોરો અથવા પાકિસ્તાનની બૉર્ડર એક્શન ટીમ (બેટ) છુપાયેલી હોવાની આશંકા હોય છે. આવી સ્થિતિમાં, એલઓસી પર પાકિસ્તાનની દરેક ચાલને પહોંચી વળવામાં સેનાના ફ્રન્ટલાઈનના જવાનો સફળ થઈ શકે છે. રોબોટિક્સ સર્વેલન્સ યુનિટ ચલાવવા માટે અધિકારીઓને સ્પેશિયલ ટ્રેનિંગ આપવામાં આવશે. સેનાની દરેક બટાલિયનમાં સાતથી આઠ અધિકારીઓ અને જવાનોને પણ તેની તાલીમ આપવામાં આવશે.