અમદાવાદ / ક્રાઈમ બ્રાંચનું ઓપરેશનઃ લૂંટ વિથ મર્ડરનો ખૂંખાર આરોપી બે તમંચા, એક પિસ્તોલ અને 12 કારતૂસ સાથે ઝડપાયો

• લૂંટ વિથ મર્ડરના ગુનામાં નાસતો ફરતો આરોપી ઝડપાયો
• આરોપી પાસેથી પોલીસને બે દેશી તમંચા, એક પિસ્તોલ તેમજ 12 જીવતા કારતૂસ મળ્યા
• આરોપી ક્રાઇમ બ્રાંચના ચોપડે આર્મ્સ એક્ટના ગુનામાં વોન્ટેડ હતો

લૂંટ વિથ મર્ડરના ગુનામાં આજીવન કેદની સજા પામેલા ખૂંખાર આરોપી પાસેથી ક્રાઇમ બ્રાંચને બે દેશી તંમચા, એક પિસ્તોલ અને ૧૨ જીવતા કારતૂસ મળી આવતાં ચકચાર મચી ગઇ છે. આરોપી પેરોલ જમ્પ કરીને નાસતો ફરતો હતો અને હથિયાર લાવીને કોઇ ગુનાને અંજામ આપવાના પ્લાનમાં હતો. આરોપી ક્રાઇમ બ્રાંચના ચોપડે આર્મ્સ એક્ટના ગુનામાં વોન્ટેડ છે અને રાજકોટની મધ્યસ્થ જેલમાંથી પેરોલ જમ્પ કરીને નાસતો ફરે છે. આરોપી હથિયાર તસ્કરીને ગુનામાં પણ સંડોવાયેલો હોવાથી ક્રાઇમ બ્રાંચે તે દિશામાં તપાસ શરૂ કરી છે. 

પેરોલ જમ્પ કરીને નાસતો ફરતો આરોપી ઝડપાયો
ક્રાઇમ બ્રાંચને બાતમી મળી હતી કે આર્મ્સ એક્ટના ગુનામાં વોન્ટેડ તેમજ મોરબી તાલુકામાં લૂંટ વિથ મર્ડરના કેસમાં રાજકોટની મધ્યસ્થ જેલમાં આજીવન કેદની સજા ભોગવી રહેલો અલકેશ ઉર્ફે અખિલેશ ભદોરિયા હાલમાં પેરોલ જમ્પ કરીને નાસતો ફરે છે અને તેની પાસે પિસ્તોલ અને જીવતા કારતૂસ છે. બાતમીના આધારે ક્રાઇમ બ્રાંચની ટીમ મેમ્કો આનંદ હોસ્પિટલ પાસે પહોંચી ગઇ હતી અને અલકેશ ભદોરિયાને કોર્ડન કરી લીધો હતો. અલકેશ પાસે પ્લાસ્ટિકની થેલી હતી. જેમાં બે દેશી તમંચા અને એક પિસ્તોલ હતી જ્યારે તેના પેન્ટના ખિસ્સાંમાંથી ૧૨ જીવતા કારતૂસ મળી આવ્યા હતા. 

લૂંટ, મારામારી તેમજ હત્યા અને હથિયાર તસ્કરીના ગુનાઓમાં સંડોવાયેલો
ક્રાઇમ બ્રાંચ અલકેશની ધરપકડ કરીને વડી કચેરીએ લાવી હતી. અલકેશ લૂંટ, મારામારી તેમજ હત્યા અને હથિયાર તસ્કરીના ગુનાઓમાં સંડોવાયેલો છે. પેરોલ જમ્પ કરીને અલકેશ હથિયાર તસ્કરી કરી રહ્યો હોવાનું પ્રાથમિક તપાસમાં સામે આવ્યું છે. અલકેશ પાસે હથિયાર છે તે ક્યા ઉપયોગ માટે લેવાનો તે મામલે ક્રાઇમ બ્રાંચે આકરી પૂછપરછ શરૂ કરી છે. મેમ્કો જેવા ભરચક વિસ્તારમાં ત્રણ હથિયાર અને ૧૨ જીવતા કારતૂસ મળી આવતાં પોલીસ પણ ચોંકી ઊઠી છે. અલકેશ કોઇ મોટી લૂંટની ઘટનાને અંજામ આપવાની ફિરાકમાં હોય તેવું લાગી રહ્યું છે.