અમદાવાદ / દુકાન પાસે કાર પાર્ક કરી ને ક્ષણભરમાં જ 12.96 લાખની રોકડ રકમની ઉઠાંતરી

થોડાંક દિવસ પહેલાં ઓઢવ વિસ્તારમાં એક કારનો કાચ તોડીને ૧.૬૦ લાખ રૂપિયા ચોરી કરીને ગઠિયાઓ ફરાર થઇ ગયા છે. ચાર કિલોમીટરના અંતર પર અલગ અલગ સમયે બનેલી આ બંને ઘટનાઓને કોઇ એક જ ગેંગ દ્વારા અંજામ અપાયો હોવાનું પોલીસ માની રહી છે. પોલીસ બંને ઘટનાઓમાં સીસીટીવી ફૂટેજ કબજે કરીને ગુનેગારોનાં મૂળ સુધી પહોંચવા માટે ચક્રોગતિમાન કર્યાં છે. નરોડા વિસ્તારમાં આવેલ હરિદર્શન દર્શન સર્કલ નજીક કેશવપાર્ક સોસાયટીમાં રહેતા અને મનોહર વિલા સર્કલ નજીક ભવાની ચોક પાસે ખાંડનો વેપાર કરતા વિમલભાઇ હસમુખભાઇ મોદીએ નિકોલ પોલીસ સ્ટેશનમાં ગઠિયાઓ વિરુદ્ધમાં ૧૨.૯૬ લાખ રૂપિયાની ચોરીની ફરિયાદ કરી છે.

ફરિયાદમાં કરેલા આક્ષેપ પ્રમાણે ગઇ કાલે વિમલભાઇ બાપુનગર વિસ્તારમાં આવેલી આંગડિયા પેઢીમાંથી ધંધાના કામે ૧૨.૯૬ લાખ રૂપિયા લેવા માટે ગયા હતા. ૧૨.૯૬ લાખ રૂપિયા લઇને વિમલભાઇ પરત તેમની દુકાન પર આવ્યા હતા અને તમામ રૂપિયા કારમાં ડ્રાઇવર સીટની બાજુની સીટની નીચે કોથળીમાં મૂકી દીધા હતાં. વિમલભાઇએ તેમની દુકાન પાસે પોતાની કાર પાર્ક કરી હતી અને કામ માટે ગયા હતાં.

થોડાંક સમય પછી વિમલભાઇ પરત આવ્યા ત્યારે તેમની કારની ડ્રાઇવર સીટનો કાચ તૂટેલો જોયો હતો. વિમલભાઇએ કારનો દરવાજો ખોલીને ડ્રાઇવર સીટની બાજુની સીટની નીચે કોથળીમાં મૂકેલા રૂપિયા જોતાં તે ગાયબ હતા. ગઠિયાઓ વિમલભાઇની કારનો કાચ તોડીને ૧૨.૯૬ લાખ રૂપિયા ચોરીને નાસી ગયા હતાં. વિમલભાઇએ તરત જ આ ઘટના મામલે પોલીસને જાણ કરી હતી. ઘટનાની જાણ થતાં પોલીસ તેમજ ઉચ્ચ અધિકારીઓ તરત જ ઘટના સ્થળે દોડી આવ્યા હતા અને તપાસનો ધમધમાટ શરૂ કર્યો હતો.

નિકોલ પોલીસે વિમલભાઇની ફરિયાદના આધારે ગુનો દાખલ કરીને તપાસ શરૂ કરી છે અને આસપાસના વિસ્તારોના સીસીટીવી ફૂટેજ ચેક કરવા માટેની તજવીજ શરૂ કરી છે. 
તારીખ ૧૬ ઓગસ્ટના રોજ આવી જ ઘટના નરોડાથી ચાર કિલોમીટર દૂર આવેલા ઓઢવમાં બની છે. નિકોલ વિસ્તારમાં આવેલ ભક્તિ એન્ક્લેવમાં રહેતા અને ઓઢવના બીલેશ્વર એસ્ટેટમાં ગિઝર બનાવવાનું કારખાનું ધરાવતા બ્રિજેશભાઇ છત્રોલાએ ઓઢવ પોલીસ સ્ટેશનમાં ૧.૬૦ લાખની ચોરીની ફરિયાદ કરી છે.

તારીખ ૧૬ ઓગસ્ટના રોજ બ્રિજેશભાઇને બેન્કમાં રૂપિયા જમા કરાવવાના હોવાથી તેમણે ૧.૬૦ લાખ રૂપિયા તેમની કારમાં મુક્યા હતા. સાંજે પાંચ વાગ્યાની આસપાસ બ્રિજેશભાઇ ઓઢવ સિંગરવા રોડ પર તેમની કાર પાર્ક કરીને સરસપુર નાગરિક બેન્કમાં ચેકની પુછપરછ માટે ગયા હતા ત્યારે કોઇ ગઠિયાએ ડ્રાઇવર સીટની પાછળનો કાચ તોડીને ૧.૬૦ લાખ રૂપિયાની ચોરી કરી હતી. આ મામલે ઓઢવ પોલીસે ગુનો દાખલ કરીને તપાસ શરૂ કરી છે. પોલીસ સૂત્રોનાં જણાવ્યાં અનુસાર ગઇ કાલે નરોડામાં બનેલી ઘટના તેમજ થોડાક દિવસ પહેલાં ઓઢવમાં બનેલી ઘટનામાં કોઇ એક જ ગેંગનો હાથ હોય તેવું લાગી રહ્યું છે.