અમદાવાદમાં આંગડિયા પેઢીના કર્મચારી સાથે 7 લાખ રૂપિયાની નિષ્ફળ લૂંટની ઘટના, લૂંટ કરવા આવેલો આરોપી વિકલાંગ હોવાથી નાસી છૂટવાની કોશિશમાં ઝડપાયો
આંગડિયા પેઢીનો કર્મચારી લૂંટતા બચ્યો
બે લૂંટારુઓએ લૂંટ ચલાવી હતી
દુકાન માલિકે લુંટારૂને ઝડપ્યો
અમદાવાદના વસ્ત્રાપુરમાં થોડા દિવસ અગાઉ આંગડિયા પેઢીના કર્મચારી સાથે લૂંટનો પ્રયાસ નિષ્ફળ ગયો હતો. જે બાદ સોલા વિસ્તારમાં વધુ એક લૂંટનો નિષ્ફળ પ્રયાસ સામે આવ્યો છે. જો કે, લૂંટની ઘટનામાં એક આરોપીની ધરપકડ પણ કરી દેવાઈ છે. સમગ્ર ઘટના ગોતા વિસ્તારની નજીક આવેલી રમેશકુમાર અંબાલાલ આંગડિયા પેઢીની છે. બપોરના સમયે ગ્રાહક ન હોવાથી બે શખ્સ પેઢીમાં ઘૂસી આવ્યા હતા. અને હાજર કર્મચારીને છરી બતાવી હાથ-પગ બાંધી દીધા હતા.
કર્મચારીને બંધક બનાવી 7 લાખ રૂપિયાની લૂંટ કરી હતી. લૂંટના રૂપિયા લઈ રિક્ષામાં બેસી ભાગવાની કોશિશ કરી હતી. પરંતુ પાસે દુકાનમાં કામ કરતા રોનક નામના વ્યક્તિએ રિક્ષા પાસે પહોંચી એક વ્યક્તિને ઝડપી પાડ્યો હતો. જે વ્યક્તિ ઝડપાયો તેનું નામ જતીન હોવાનું સામે આવ્યું છે. અને જતીન શારીરિક રીતે વિકલાંગ હોવાનું પણ સામે આવ્યું છે. સમગ્ર મામલે પોલીસે જણાવ્યું કે, બપોરના સમયે પેઢીમાં ગ્રાહક ન હોવાનું આરોપીને ખ્યાલ હતો. જતીન અગાઉ પેઢીમાં પૈસા લેવા માટે આવ્યો હતો. આ સમયે આંગડિયા પેઢીમાં કાકા એકલા હોય તેવું જાણીને લૂંટ માટેની હિંમત કરી હતી.
ઝડપાયેલા આરોપી વિશે પોલીસે જણાવ્યું કે, જતીન પટેલ એક હોસ્પિટલમાં આસિ.ટેક્નિશિયન છે. અને કોરોના સમયે દર્દીઓની સારવાર પણ કરી ચૂક્યો છે. અને પૈસાની જરૂરિયાતના કારણે ગુનાના રસ્તા પર ઉતર્યા હોવાનું પણ સામે આવ્યું છે.