વેપારી નડિયાદથી કાર લઈ અડાલજ જઈ રહ્યા હતા તે દરમિયાન 5 લોકોએ અકસ્માતનો ડોળ કરી અપહરણ કર્યું અને 35 હજાર પડાવી લીધા
અમદાવાદમાં શીલજથી વેપારીનું થયું અપહરણ
સ્થાનિકોએ પીછો કર્યો તો અપહરણકારો ભાગી ગયા
સમગ્ર ઘટનાની તપાસ સોલા પોલીસે શરૂ કરી
સોલામાં વેપારીનું ફિલ્મી ઢબે અપહરણ કરીને લૂંટ ચલાવાનો બનાવ બનતા ચકચાર મચ્યો છે. અકસ્માતના બહાને પાંચ લૂંટારાઓએ વેપારીને અપહરણ કર્યું હતું છરીની અણીએ રૂ 35 હજારની કરી લૂંટ ચલાવી હતી. ફરિયાદ થતાં પોલીસે 2 આરોપીની ઝડપી જેલ હવાલે કર્યા છે.
શું છે સમગ્ર ઘટના
પોલીસ કસ્ટડીમાં જોવા મળતા આરોપી ધવલ ચુડાસમા અને ઋતુરાજસિંહ જાડેજા છે. જેમને વેપારીનું અપહરણ કરીને લૂંટ કરી હતી. ઘટના એવી છે કે ગોવા સી સી આર સોલ્યુશનની કંપની ધરાવતા મિલિંદભાઈ હલદનકર નડિયાદથી કાર લઈને પોતાના ઘરે અડાલજ જઇ રહ્યા હતા. ત્યારે શીલજ નજીક ધવલ ચુડાસમા, ઋતુરાજસિંહ અને તેના અન્ય 3 મિત્રો બાઈક અને એકટીવા પર આવ્યા.. આ આરોપીઓએ વેપારીની કારને અડફેટે લઈને બાઈક તેમની ગાડી આગળ ઉભી રાખી દીધી. અને તેમને લાફા મારીને ગાડીની ચાવી લઈને વેપારીની કારમાં છરીની અણીએ અપહરણ કર્યું.
વેપારીએ ઈંડા ટ્રે મારી બૂમાબૂમ કરતાં જીવ બચ્યો
વેપારીને પાછળની સીટ પર બેસાડીને ખિસ્સામાંથી રૂ 35 હજાર પડાવ્યા.. અને ત્યાર બાદ ATMમાંથી પૈસા ઉપાડવા વેપારીને CTM તરફ લઈ ગયા. પરંતુ ગાડી બંધ થઈ જતા વેપારી પાછળની સીટ પર બેઠેલા લૂંટારાને ઈંડાની ટ્રે મારીને કારમાંથી નાસી છૂટ્યા અને બુમાબુમ કરતા લોકોનું ટોળું એકઠું થઈ જતા વેપારી બચી ગયા. આ ઘટનાને લઈને સોલા પોલીસે લૂંટ અને અપહરણનો ગુનો નોંધી 2 આરોપીની ધરપકડ કરી છે.;
મોજ-શોખ માટે લૂંટનો કારસો
આરોપી ધવલ ચુડાસમા બેકાર છે જ્યારે ઋતુરાજસિંહ આઇટીઆઈ કરે છે. આ આરોપીઓ અને અન્ય લૂંટારાઓની એક્સપ્રેસ હાઇવે પર બેઠક છે. સિગારેટ પીવા અને મોજશોખ કરવા એક્સપ્રેસ હાઇવે પર મળતા હોય છે. અને બાઈક પર લોન્ગ ડ્રાઈવમાં નીકળતા હોય છે. આ લૂંટનો માસ્ટર માઈન્ડ મદ્રાસી નામનો એક યુવક છે.. જે આ ટોળકીને શીલજ લઈ ગયો અને વેપારીનું અપહરણનું ષડ્યંત્ર પણ રચ્યું હતું. પકડાયેલા આરોપીમાં ધવલ ચુડાસમા અગાઉ પ્રોહિબિશનના ગુનામાં ઝડપાયો છે. આ ટોળકીએ અન્ય કોઈ લૂંટને અજામ આપ્યો છે કે નહીં તે મુદ્દે પૂછપરછ શરૂ કરી છે.
મુખ્ય સૂત્રઘારને પકડવા કવાયત તેજ
પકડાયેલા બંને આરોપીઓને સોલા પોલીસે કોર્ટમાં રજૂ કરી રિમાન્ડની માંગ કરશે..આ ઉપરાંત આ લૂંટ અને અપહરણ કેસમાં મુખ્ય સૂત્રધાર મદ્રાસી અને તેના સાગરીતો ફરાર હોવાથી પોલીસે શોધખોળ શરૂ કરી છે.