ભાવનગર / લગ્નના અભરખાં પડ્યા મોંઘા ! યુવકે માથે હાથ દઇને રોવાનો વારો આવ્યો, જાણો કેમ ?

• પ્રેમજાળમાં ફસાવીને મહિલાએ ચલાવી લૂંટ
• મહિલા મિત્ર સાથે ફરવા જતા લૂંટાયો યુવક
• ભાવનગરમાં લૂંટેરી દુલ્હન 1.34 લાખ લઇને ફરાર

ગુજરાતમાં છેલ્લા ઘણા સમયથી ચોરી અને લૂંટફાટની ઘટનાઓ વધી રહી છે. અરે હવે તો લીંબુની પણ ચોરી થઇ રહી છે. અને હવે તો લગ્નની સિઝન શરુ થઇ રહી છે ત્યારે  ભાવનગરમાં લગ્નની લાલચમાં એક યુવક લૂંટાયો. તો મહેસાણામાં મહિલા મિત્ર સાથે ફરવા ગયેલા યુવકે સોનાના દાગીના સહિત કારથી હાથ ધોવાનો વારો આવ્યો. આ બંને ચોરીની ઘટનામાં યુવકને પોતાની પ્રેમ જાળમાં ફસાવીને  મહિલા લૂંટ ચલાવીને ફરાર થઇ ગઇ.  મહત્વનું છે કે એક તરફ  હનીટ્રેપના કિસ્સાઓ વધી રહ્યા છે તો બીજી તરફ યુવાનોને પ્રેમજાળમાં ફસાવીને પૈસા પડાવવાનું ષડયંત્ર ચલાવવામાં આવતુ હોવાનો પર્દાફાશ થયો છે.

લૂંટેરી દુલ્હન 1.34લાખ લઇને ફરાર

ભાવનગરમાં લગ્નની  લાલચમાં યુવકે 1.34 લાખ ગુમાવવાનો વારો આવ્યો .વાત જાણે એમ છે કે ભાવનગરના યુવકને લગ્ન કરવા માટે આણંદ બોલાવ્યો. બંનેએ બોરસદના બનેજડા ખાતે બોલાવીને મંદિરમાં ફુલહાર કર્યા. બાદમાં યુવતી સોના-ચાંદીના દાગીના સહિત 1.34 લાખનો મુદ્દામાલ લઇને ફરાર થઇ ગઇ. સીદસરના યુવકે આણંદના વિરસદ પોલીસ સ્ટેશનમાં 8 શખ્સો સામે પોલીસ ફરિયાદ નોંધાવી. 

મહેસાણમાં મહિલા મિત્રએ યુવકને લૂંટ્યો

તો આ તરફ એક યુવકને મહિલા મિત્ર સાથે ફરવા જવુ ભારે પડ્યું. ગાંધીનગરથી અંજલિ નામની મહિલા સાથે યુવક ફરવા ગયો હતો. મહિલાએ અચાનક જ
મહેસાણા-ઊંઝા હાઈવે ઉપર કાર ઉભી રખાવી. જેવી કાર ઉભી રહી તેવા જ બે અજાણ્યા શખ્સોએ પેલા યુવકને માર મારીને લૂંટી લીધો. મારી પત્ની સાથે ફરે છે કેમ એવું કહીને યુવકને માર માર્યો. આમ જણાવીને 3.25 લાખના સોનાના દાગીના અને 3 લાખની કારની લૂંટ કરીને મહિલા સહિત ત્રણેય શખ્સો ફરાર થઇ ગયા. ઘટનાને પગલે યુવકે મહેસાણા તાલુકા પોલીસમાં ફરિયાદ નોંધાવતા પોલીસે આરોપીઓને ઝડપી પાડવા તપાસના ચક્રોગતિમાન કર્યા છે.