મુશ્કેલી / ગુજરાતમાં ભારે વરસાદને કારણે 5 જિલ્લામાં 12 રસ્તા બંધ, હજું વરસાદની ભારે આગાહી

• ગુજરાતમાં ભારે વરસાદને કારણે રસ્તાઓ બંધ 
• 5 જિલ્લામાં 12 જેટલા રસ્તાઓ થયા બંધ 
• વાહનચાલકો ને કરવો પડ્યો ભારે હાલાંકીનો સામનો 

ગુજરાતમાં હવામાન વિભાગની આગાહી પ્રમાણે આજે મેઘરાજાએ ધમાકેદાર એન્ટ્રી કરી. પરંતુ ધોધમાર વરસાદને કારણે આજે 5 જિલ્લાઓમાં 12 જેટલા રસ્તાઓ બંધ થઈ ગયા છે.જેમા નર્મદા જિલ્લામાં 3 , સુરતમાં 2 અને ડાંગમાં 5 રસ્તાઓ બંધ કરવામાં આવ્યા છે. સાથેજ ઘણા રસ્તાઓ પર પાણી ભરાઈ ભરાઈ જવાને વાહન ચાલકોને ભારે હાલાંકીનો સામનો કરવો પડી રહ્યો છે.

અમરેલીમાં સ્ટેટ હાઈવે બંધ 

અમરેલીમાં આવે સ્ટેટ હાઈવે બંધ કરી દેવામાં આવ્યો છે.તેમજ પંચાયત હસ્તક આવતા 13 રસ્તાઓ પણ બંધ કરી દેવામાં આવ્યા છે. અમરેલીમાં આજે ધોધમાર વરસાદ પડ્યો છે. જેના કારણે સાવરકુંડલા-રંઘોળાનો માર્ગ બંધ કરી દેવામાં આવ્યો છે. લીલીયા ચોકડી પાસે વરસાદી પાણી ભરાતા નાના લીલીયા નજીકનો રોડ પણ બંધ થઈ ગયો છે. જેના કારણે રંઘોળા જતા વાહનોને લીલીયાથી ડાયવર્ટ કરવામાં આવ્યા છે. 

લીલીયા પથકમાં ભારે વરસાદ

હવામાન વિભાગની આગાહીને લઈને અમરેલીના વિવિધ વિસ્તારોમાં વરસાદ પડ્યો છે. લીલીયા શહેરમાં અને ગ્રામ્ય પંથકમાં મેઘરાજાએ એન્ટ્રી કરી દીધી છે. વહેલી સવારથી અહીયા ધોધમાર વરસાદ પડ્યો જેના કારણે રોડ રસ્તાઓ પર પાણી ભરાઈ ગયા છે. પરિણામે વાહન વ્યવહાર ખોરવાયો છે અને લોકોને ભારે હાલાંકીનો સામનો કરવો પડી રહ્યો છે.

જૂનાગઢમાં ધીમીધારે વરસાદ 

જૂનાગઢમાં પણ વહેલી સવારથી ધીમીધારે અનેક વિસ્તારોમાં મેઘરાજા મહેરબાન થયા છે. જેના કારણે ગીરનાર પર્વત પર તો અદ્ભુત દ્રશ્યો જોવા મળ્યું હતું. જોકે અહીયા વરસાદ પડતા ખેડૂતોમાં એકંદરે ખુશીનો માહોલ જોવા મળી રહ્યો છે. 

બંગાળની ખાડીમાં લો પ્રેશર સર્જાવાને કારણે પડશે વરસાદ 

રાજ્યમાં છેલ્લા ઘણા સમયથી વરસાદ નહોતો પડતો પરંતુ સપ્ટેમ્બર મહિનાની શરૂઆતથીજ મેઘરાજાની બીજી ઈનીંગ શરૂ થઈ ગઈ છે. હવામાન વિભાગ દ્વારા વરસાદને લઈને મોટી આગાહી કરવામાં આવી છે. બંગાળની ખાડીમાં લો પ્રેશર સર્જાવાને કારણે ભારે વરસાદ પડી શકે છે. જેથી આગામી 48 કલાકમાંજ હવામાન વિભાગ દ્વારા ભારે વરસાદની આગાહી કરવામાં આવી છે. 

અમદવાદ તેમજ ગાંધીનગરમાં ભારે વરસાદની આગાહી 

હવામાન વિભાગે કરેલી આગાહી મુજબ સૌરાષ્ટ્રમાં ભારેથી અતિભારે વરસાદની આગાહી કરવામાં આવી છે. સાથેજ ઉત્તરભારતમાં સારો વરસાદ રહેશે તેવી શક્યતા વર્તાઈ રહી છે. અમદાવાદ અને ગાંધીનગર તેમજ વડોદરા સહિતના વિસ્તારોમાં ભારે વરસાદની આગાહી હવામાન વિભાગ દ્વારા કરવામાં આવી છે.