તમારા કામનું / વાહન ચાલકો માટે મોટા સમાચાર! ટૂંક સમયમાં બદલાઈ જશે આ નિયમ, જુઓ નીતિન ગડકરીએ શું કર્યું એલાન

• ભારતમાં આકરા બનશે રોડ સેફ્ટી નિયમો
• નીતિન ગડકરીએ કર્યું એલાન
• 1 ઓક્ટોબર, 2022થી થશે અમલવારી

કેન્દ્રીય માર્ગ પરિવહન અને ધોરીમાર્ગ મંત્રી નીતિન ગડકરીએ કહ્યું છે કે ટૂંક સમયમાં ભારતમાં વેચાતી તમામ નવી કારમાં છ એરબેગ્સને સ્ટાન્ડર્ડ સેફ્ટી ફીચર બનાવવામાં આવશે. 

1 ઓક્ટોબર, 2022થી અમલી બનશે

નવા નિયમો 1 ઓક્ટોબર, 2022થી અમલમાં આવશે. રિપોર્ટ અનુસાર વધારાની એરબેગ્સના કારણે વાહનોની કિંમત 50 હજાર સુધી વધી શકે છે. હાલમાં, 6 એરબેગ્સ મોડલ અને વેરિઅન્ટ્સની કિંમત લગભગ 10 લાખ રૂપિયાથી શરૂ થાય છે.

હાઈ સિક્યોરિટી સ્ટાન્ડર્ડ અપનાવવાનો સમય આવી ગયો છે 

નીતિન ગડકરીએ કહ્યું કે, હવે સમય આવી ગયો છે કે, જ્યારે ભારત વધુ સિક્યોરિટી સ્ટાન્ડર્ડ્સ અપનાવે, જે વાહન અને પદયાત્રીઓ બંન્ને માટે હોવા જોઈએ. તેમણે કહ્યું કે, ભારતમાં વેચાણ થઈ રહેલી કારમાં 6 એરબેગ્સ અનિવાર્ય કરવાથી સુરક્ષા માનકોમાં વધારો થઈ શકે છે. 

નવા નિયમનો કડક રીતે કરાશે અમલ 

જાન્યુઆરીની શરૂઆતમાં, મંત્રાલયે આઠ પેસેન્જર ટ્રેનોમાં છ એરબેગ્સ ફરજિયાત બનાવવા માટેના ડ્રાફ્ટ સૂચનાને મંજૂરી આપી હતી. મંત્રાલયે જાન્યુઆરી 2022માં ડ્રાફ્ટ નોટિફિકેશન બહાર પાડ્યું હતું, જેમાં નવા નિયમોની રૂપરેખા આપવામાં આવી હતી જે તમામ કાર માટે સ્ટાન્ડર્ડ તરીકે છ એરબેગ્સ ફરજિયાત બનાવશે. નોટિફિકેશન અનુસાર, આ નિયમ 1 ઓક્ટોબર, 2022થી તમામ નવી કાર પર લાગુ થશે.

હાલમાં આ સ્ટાન્ડર્ડ સેફ્ટી ફીચર્સ છે

1 એપ્રિલ, 2019થી ભારતમાં તમામ વાહનો માટે ડ્રાઈવર એરબેગ્સ ફરજિયાત બનાવવામાં આવી હતી. ત્યારબાદ ડ્યુઅલ એરબેગ્સ ફરજિયાત કરવામાં આવી હતી. સરકારે તમામ કાર માટે સ્ટાન્ડર્ડ સેફ્ટી ફીચર્સ તરીકે ડ્યુઅલ એરબેગ્સ તેમજ રિયર પાર્કિંગ સેન્સર અને એન્ટિ-લોક બ્રેક્સ ફરજિયાત કર્યા છે.