લદ્દાખમાં લાઇન ઓફ કંટ્રોલ પર ચીન સાથે ચાલી રહેલા વિવાદ વચ્ચે ભારતીય સેનાએ પુરતો સામાનની વ્યવસ્થા કરીને આ વિસ્તારમાં સડક નિર્માણનું કાર્ય યુધ્ધના ધોરણે હાથ ધર્યું છે.
બોર્ડર રોડ ઓર્ગેનાઇઝેશન(BRO)એ આ વિસ્તારમાં ઝડપથી રસ્તાઓ અને પુલો બનાવવાની કામગીરી હાથ ધરી છે. આ અંતર્ગત રેકોર્ડ સમયગાળામાં લેહ-લદાખમાં 3 જુદા જુદા પુલ બનાવવામાં આવ્યા છે. આ પુલો નીમુ, ઉલે ટોપો અને બાસ્ગો ખાતે બનાવવામાં આવ્યા છે. આ સાથે જ કેટલાક રસ્તાઓ પહોળા કરવાની કામગીરી પણ ચાલુ છે.
અત્યાર સુધીમાં 20 પુલ આકાર પામ્યા
BRO દ્વારા લેહ-લદાખમાં સરહદી વિસ્તારોમાં સૈન્ય પ્રવેશની સુવિધા માટે, 3 વર્ષમાં 40 પુલોનું નિર્માણ હાથ ધરવામાં આવ્યું છે. તેમાંથી 20 પુલ પણ બનાવવામાં આવ્યા છે. આ સાથે જ આ વિસ્તારમાં ઘણા વ્યૂહાત્મક રસ્તા બનાવવાની કામગીરી પણ ઝડપથી ચાલી રહી છે. 2022 સુધીમાં આ વિસ્તારમાં 66 આવા વ્યૂહાત્મક રસ્તા બનાવવામાં આવનાર છે.
સેનાના ભારે વાહનોને તકલીફ ન પડે તેનું રાખવામાં આવે છે ધ્યાન
સિયાચીન અને દૌલાત બેગ ઓલ્ડિ થઈને લેહથી ખારદુંગા તરફ જતા માર્ગનું પણ સમારકામ કરવામાં આવી રહ્યું છે. નવા બ્રિજ બનાવવાની સાથે સાથે જૂના પુલો પણ એવી રીતે બનાવવામાં આવી રહ્યા છે કે સેનાના ભારે વાહનો અને સાધનોને ત્યાંથી પસાર થવામાં તકલીફ ન પડે.
સીમા પર ભારતે કર્યું શક્તિ પ્રદર્શન
આપને જણાવી દઇએ કે, વાયુસેનાએ પણ પૂર્વી લદ્દાખમાં ચીનની સાથે વધી રહેલા તણાવને જોતા વાસ્તવિક નિયંત્રણ રેખા પાસે પોતાના અગત્યના કેન્દ્રો પર ફ્રન્ટલાઇન લાડાકુ વિમાન, હેલિકોપ્ટર મોટી સંખ્યામાં તૈનાત કર્યા છે. વાયુસેનાએ ક્ષેત્રમાં ભારતની સૈન્ય તૈયારીઓ મજબૂત કરવા માટે કેટલાક અગ્રિમ અડ્ડા સુધી મોટા સૈન્ય ઉપકરણ અને હથિયાર પહોંચાડવા માટે સી-17 ગ્લોબમાસ્ટર 3 પરિવહન વિમાન અને સી-13 જે સુપર હરક્યુલસ વિમાન તૈનાત કર્યા છે.