આંખોદેખી હકીકત / વડોદરામાં મનપાના માનીતા કોન્ટ્રાક્ટરનો ગરમાગરમ ભ્રષ્ટાચાર, પાક્કો ડામરનો રોડ ઓગળી ગયો

• વડોદરામાં ડામર પીગળ્યો
• સમાથી છાણી કેનાલના રોડનો ડામર પીગળ્યો
• રોડ પીગળતા ઉઠ્યા સવાલો

આપણે ત્યાં વાતો વિકાસની થાય છે.. પરંતુ વિકાસ માત્ર નેતાઓનો થાય છે.નેતાઓના ચમચાઓનો થાય છે.આવું અમે નહીં પરંતુ વડોદરા શહેરમાંથી છેલ્લા એક મહિનામાં સામે આવેલી ઘટનાઓ કહે છે.કારણ કે, અહીં જ્યાં જનતાની જરૂરિયાત માટે રોડ-રસ્તા બનવા જોઈએ ત્યાં ખાડા છે.અને જ્યાં રોડ-રસ્તાની કોઈ જરૂર નથી.. ત્યાં લાખો રૂપિયાના ખર્ચે રસ્તાઓ તૈયાર થયા છે. પણ હવે તો હદ ત્યારે થાય છે કે ઉનાળાની ગરમીમાં ભ્રષ્ટાચારથી લથબથતાં રોડ પીગળવા લાગે છે. 

વાહનચાલકોને નવા રોડમાં પણ સાધન ચલાવવામાં મુશ્કેલી
વડોદરામાં સમાથી છાણી કેનાલ પર એક માસ અગાઉ નવો કહેવતો ચકાચક રોડ બનાવવામાં આવ્યો હતો. પણ ખાડા તો ઠીક રોડમાં એવું હલકી કક્ષાનું મટિરિયલ વાપરવામાં આવ્યું હોય તેવા અંદેશો આવી રહ્યો છે કે રોડ ઉનાળાની ગરમીમાં પીગળી રહ્યો છે. આ રોડ કોર્પોરેશનના માનીતા કોન્ટ્રાક્ટરની કંપની એટલે કે શિવાલય કન્સ્ટ્રક્શન કંપનીએ બનાવ્યો છે. ડામરનો યોગ્ય ઉપયોગ ન થતા ગરમીમાં રોડ પીગળ્યો છે. એક માસ અગાઉ જ રોડ પર ડામરની કામગીરી પૂર્ણ થઈ હતી પણ હવે રાહદારીઓ અને વાહનચાલકોને નવા રોડમાં પણ સાધન ચલાવવામાં મુશ્કેલી પડી રહી છે. આજે વડોદરામાં ગરમીનો પારો 41 ડિગ્રી પર પહોચ્યો હતો. ગરમીને કારણે રોડનું પીગળવું સામન્ય બાબત ન કહી શકાય કારણ કે હલકી કક્ષાનું મટિરિયલ વાપરવામાં આવ્યું હોય તો આ કારનામું શક્ય બને. 

VTV ગુજરાતીના સળગતા સવાલ

• શું રસ્તામાં ડામરનો ઉપયોગ યોગ્ય રીતે ન થયો?
• શું રસ્તાની બનાવટમાં ભ્રષ્ટાચાર થયો?
• એક મહિનામાં જ ડામર ઉખડવા લાગ્યો?
• 41 ડિગ્રીમાં પીગળી ગયો ડામરનો રસ્તો?
• માનીતા કોન્ટ્રાક્ટરે રોડના કામમાં ધ્યાન કેમ ન આપ્યું?
• વડોદરાની ટેક્સ ભરનારી જનતાને આવો રસ્તો આપશો?
• શિવાલય કન્સ્ટ્રકશન કંપનીએ બનાવેલા અન્ય રસ્તાની તપાસ થશે?
• વડોદરામાં શહેરમાં અન્ય કેટલા રોડ બનાવ્યા?

કદાચ હલકી ગુણવત્તાના ડામરને કારણે પણ પીગળ્યો હોઇ શકેઃ ડો.હિતેન્દ્ર પટેલ, ચેરમેન સ્ટેન્ડિંગ કમિટી,VMC
સમગ્ર મામલે VTV ગુજરાતીએ વડોદરા તંત્રના કાન મરોડયા છે. ત્યારે VMCના સ્ટેન્ડિંગ કમિટીના ચેરમેન ડો હિતેન્દ્ર પટેલે નિવેદન આપતા કહ્યું છે કે રોડની કામગીરીમાં ગેરરીતિ થઇ હશે તો કાર્યવાહી કરીશું, રોડ પીગળવા પાછળ ગરમી કારણભૂત હોઇ શકે અથવા તો હલકી ગુણવત્તાના ડામરને કારણે પણ પીગળ્યો હોઇ શકે. ગેરરીતિ થઈ હશે તો તપાસ કરાવીને કાર્યવાહી કરીશું તેવો ખૂલસો પણ તેમના દ્વારા કરવામાં આવ્યો છે. પણ સવાલ એ છે કે જો હલકી ગુણવત્તાનો રોડ બનાવ્યો છે તો અધિકારીઑ દ્વારા પાસ કેમ કરવામાં આવ્યો?