પંજાબ / છે ને બાકી કલાકારો! ચાલુ વરસાદે રોડ બનાવવા બેઠા, VIDEO વાયરલ થતાં પંજાબ સરકારે ચાર અધિકારીઓને કર્યા સસ્પેન્ડ

• પંજાબમાં એક ચાલુ વરસાદે રોડ બનાવવાનો વીડીયો વાયરલ 
• એક વ્યક્તિએ કારીગરોને કામ કરતા અટકાવ્યા પરંતુ કોઈએ સાંભળ્યું નહી 
• સરકારે એ કામના ચાર અધિકારીઓને સસ્પેન્ડ કર્યા

વીડીયો વાયરલ
પંજાબના હોશિયારપુરમાં વરસાદ વચ્ચે રસ્તો બનાવવાનો મામલો સામે આવ્યો છે. આ દરમિયાન એક વ્યક્તિએ વીડિયો બનાવીને સોશિયલ મીડિયા પર પોસ્ટ કર્યો હતો. આ વીડિયો વાયરલ થયા બાદ પંજાબની ભગવંત માન સરકારે પીડબલ્યુડીના ચાર અધિકારીઓને સસ્પેન્ડ કરી દીધા છે.

ચાલુ  વરસાદ વચ્ચે રોડ બનાવવાની કામગીરી
વાયરલ વીડિયોમાં જોઈ શકાય છે કે પીડબલ્યુડીના કર્મચારીઓ વરસાદની વચ્ચે રોડ બનાવી રહ્યા છે. આ દરમિયાન એક યુવક ત્યાં પહોંચે છે અને વીડિયો બનાવવા લાગે છે. યુવક વારંવાર કર્મચારીઓને વરસાદ બંધ થવા પર અને રસ્તા પર જમા થયેલા પાણી નીકળી જાય તેની રાહ જોવાનું કહે છે, પરંતુ કર્મચારીઓ અટકતા નથી.

જાહેર નાણાંનો બગાડ કરવાનો આરોપ
વીડિયોમાં આ વ્યક્તિ કહે છે કે, આ લોકો જનતાના પૈસાનો વેડફાટ કરી રહ્યા છે. રસ્તા પર પાણી એકઠું થયું છે અને પીડબ્લ્યુડી સ્ટાફ વરસાદ વચ્ચે રસ્તો બનાવી રહ્યા છે. માણસ કહે છે કે આ વરસાદમાં રસ્તો બનાવવાનો અર્થ શું છે? વરસાદ વચ્ચે રોડ ધોવાશે, જનતાના પૈસાનો થશે બગાડ .વીડિયો બનાવનાર વ્યક્તિએ સ્ટાફ ઉપરાંત રોડ રોલર ચલાવી રહેલા ડ્રાઇવરને પણ કામ બંધ કરવાની અપીલ કરી હતી. વ્યક્તિનું કહેવું છે કે તેમની સામે કડક કાર્યવાહી થવી જોઈએ. તેમણે કહ્યું કે તમને શરમ આવવી જોઈએ. તે વ્યક્તિ વારંવાર ચેતવણી આપે છે કે તે કોન્ટ્રાક્ટરનું  નામ, નંબર અને સરનામું જાહેર કરશે. આમ છતાં કર્મચારીઓ કામ કરવાનું બંધ કરતા નથી. આખરે તે વ્યક્તિ કહે છે કે અગ્રવાલ કન્સ્ટ્રક્શન કંપની રસ્તો બનાવી રહી છે.

અધિકારીઓ ને સસ્પેન્ડ કર્યા
બીજી તરફ પંજાબ સરકારે આ શખ્સ દ્વારા બનાવવામાં આવેલા આ વીડિયોની નોંધ લઈને કાર્યવાહી કરી છે. આ કેસમાં સંડોવાયેલા પીડબ્લ્યુડીના ચાર અધિકારીઓને તાત્કાલિક સસ્પેન્ડ કરવામાં આવ્યા છે.