સુરત અને વલસાડ પંથકમાં માર્ગ અકસ્માતની બે જુદી-જુદી ઘટના સામે આવી હતી. જે ઘટનામાં પાંચ લોકોના મોત નિપજ્યાં હોવાનું સામે આવ્યું છે.
મહુવા-બારડોલી રોડ પર ત્રિપલ અકસ્માત
ચાલુ વરસાદે 2 બાઈક અને ટેમ્પો અથડાતા અકસ્માત
અકસ્માતમાં બાઈકસવાર 2 વ્યક્તિઓના મૃત્યુ થયા
ગુજરાતમાં અવારનવાર અકસ્માતની ઘટનાઓ સામે આવતી રહેતી હોય છે. તેવામા સુરતના મહુવા-બારડોલી રોડ પર આજે વધુ એક અકસ્માતની ઘટના સામે આવી છે. બે બાઈક અને એક ટેમ્પો સહિત ત્રણ વાહન વચ્ચે ધડકાભેર અકસ્માત સર્જાયો હતો. ચાલુ વરસાદને લઈને ટેમ્પો ચાલકે સ્ટેરિંગ પરનો કાબૂ ગુમાવી દેતા બે બાઇક સાથે અકસ્માત સર્જાયો હતો. આ ઉપરાંત વલસાડ જિલ્લાના કપરાડા નજીક બે ટ્રક વચ્ચે અકસ્માતમાં 3 ના મોત નિપજ્યાં હતા.
અકસ્માતમાં 2 બાઈકસવારના મૃત્યુ થયા
મહુવા-બારડોલી રોડ પર સર્જાયેલ કરુણાંતિકામાં બે બાઇકસવારને કાળ ભેટી જતા તેનું સારવાર મળે તે પહેલા જ મોત નીપજ્યું હતું. જ્યાંરે બાઇક સવાર બે વ્યક્તિનો આબાદ બચાવ થયો હતો. આ ઘટના અંગે જાણ થતા મહુવા પોલીસ તાત્કાલીક ઘટના સ્થળે દોડી ગઈ હતી. જ્યાં અકાળે મોત અંગેની નોંધ કરી અને ઇજાગ્રસ્તોને હોસ્પિટલ ખાતે ખસેડવા સહિતની કાર્યવાહી હાથ ધરી હતી.
વલસાડમાં બે ટ્રક વચ્ચે અકસ્માતમાં 3 ના મોત
આ ઉપરાંત વધુ એક અકસ્માતની ગોઝારી ઘટના વલસાડ પંથકમાં પણ સામે આવી હતી. જેમાં વલસાડના કપરાડાના કુંભઘાટ પર ગમખ્વાર અકસ્માત સર્જાયો હતો. જેની વિગત એવી છે કે, પંચર પડતાં એક ટ્રક રોડની સાઈડમાં ઊભો હતો. આ દરમિયાન પાછળની કાળ બનીને આવેલ બેકાબુ ટ્રકે ઠોકર મારતા અકસ્માત સર્જાયો હતો. જેમાં 2 ટ્રક વચ્ચે સર્જાયેલા અકસ્માતમાં 3 લોકોના કમકમાટીભર્યું મોત નીપજ્યું હતું અને એક વ્યક્તિને ગંભીર ઇજા થવા પામી હતી. પંચર પડેલ અને સાઈડ પર ઉભેલા ટ્રકના ચાલક અને ક્લીનરનું ટ્રકની ઠોકરે મોત નીપજ્યું હતું. આ મામલે કપરાડા પોલીસને જાણ થતા પોલીસ કાફલો દોડી ગયો હતો. જ્યાં વધુ કાર્યવાહી હાથ ધરી હતી.