જનતાના પૈસે જલસા! / એક તરફ તિજોરી ખાલી છતા રાજકોટ મનપાએ નેતાઓ માટે ખરીદી લાખોના ખર્ચે કાર

• રાજકોટ મનપાના ખર્ચે હોદ્દેદારોના વાહનોની ખરીદી
• શાસક પક્ષના નેતા માટે નવી કાર ખરીદવામાં આવી
• ફાયર કમિટી ચેરમેન, ફાયર ઓફિસર માટે પણ નવી કાર

એક તરફ તંત્ર લોકોના ટેક્સના પૈસા લઇને વિકાસના કામો કરવાની વાત કરે છે તો બીજી તરફ હોદ્દેદારોના બંગલા, ઑફિસનું રિનોવેશન સહિતની અલગ અલગ ઉજવણીઓ કરીને કરોડો રુપિયાનો ધુમાડો કરે છે. એક તરફ મોંઘવારી આસમાને પહોંચી છે તો બીજી તરફ સત્તાઘીશો જનતાના પૈસામાઁથી પોતાની સુવિધામાં વધારો કરી રહ્યા છે. ત્યારે  રાજકોટ મહાનગર પાલિકામાં પણ આ પ્રકારની ઘટના સામે આવી છે.

મનપાના ખર્ચે નવા વાહનોની ખરીદી 

એક તરફ આર્થિક તંગીના દાવા કરવામાં આવે છે,  6 બેંકો પાસેથી 600 કરોડની લોન લેવાની તૈયારી કરવામાં આવે છે તો બીજી તરફ RMC દ્વારા લાખો રુપિયાનો ખર્ચ કરવામાં આવ્યો.  બીજી તરફ તંત્ર પ્રજાના પૈસે લહેર કરી રહી હોવાનું સામે આવ્યું છે. રાજકોટ મહાનગર પાલિકા દ્વારા પોણા કરોડ રુપિયાના ખર્ચે નવા વાહનોની ખરીદી કરવામાં આવી. કારમાં ટેકનિકલ ખામીને કારણે નવી કાર ખરીદવામાં આવી.
 

શાસક પક્ષ-વિપક્ષના નેતા માટે નવી કાર 

રાજકોટ મહાનગરપાલિકામાં આર્થિક સંકટના દાવા વચ્ચે વાહનોની ખરીદી કરવામાં આવી. આમ તો આખો દિવસ વિપક્ષ અને શાસક પક્ષ આમને સામને જોવા મળતા હોય પરંતું વાહનોની ખરીદી માટે શાસક પક્ષ અને વિપક્ષ એક થયા. રાજકોટ મનપાના શાસક પક્ષના નેતા માટે નવી કાર ખરીદવામાં આવી. આ ઉપરાંત  ફાયર કમિટી ચેરમેન, ફાયર ઓફિસર માટે પણ નવી કાર ખરીદવામાં આવી.  3 કાર પાછળ મનપાએ રૂપિયા 50 લાખથી વધુ ખર્ચ કર્યા છે. ત્યારે હવે  વિપક્ષી નેતા માટે પણ નવી કાર ખરીદવામાં આવશે. જેની પાછળ રૂપિયા 22 લાખનો ખર્ચે કરવામાં આવશે. વિપક્ષી નેતાની કાર 3 લાખથી વધુ કિલોમિટર ચાલી છે. પરંતુ કારમાં ટેક્નિકલ ખામીઓને કારણે નવી કાર ખરીદાશે.

શું કહ્યુ RMCના સ્ટેન્ડિંગ કમિટીના ચેરમેને ?

વી ટીવી ન્યૂઝ સાથે વાતચીત દરમિયાન RMCના સ્ટેન્ડિંગ કમિટીના ચેરમેને જણાવ્યું કે વિપક્ષી નેતાની કાર બહુ જુની થઇ ગઇ છે. 3લાખ 28 હજાર કિલોમીટરથી પણ વધારે ચાલી છે. આથી તેના મેન્ટેનન્સ પાછળ  બે વર્ષથી 8-9 લાખ રુપિયાનો ખર્ચો આવે છે જેથી કાર નવી લાવવી પડે તેમ છે.

ત્યારે અહીં સવાલ એ થાય કે તમારી કારમાં કોઇ ખામી સર્જાય તો તમે સ્હેજ પણ ચલાવી લેતા નથી. તાત્કાલિક અસરથી નવી કાર ખરીદી લો છો.  પરંતુ જ્યારે જનતા પોતાની કોઇ સમસ્યા લઇને આવે તો પછી આંખ આડા કાન કેમ ? શાસક પક્ષ, ફાયર કમિટી ચેરમેન, ફાયર ઓફિસર આ ત્રણેયની કાર એક સાથે જ ખરાબ થઇ ?? અત્યાર સુધી ત્રણેયની કારમાં કોઇ પ્રોબ્લેમ ન હતો ?