પશ્ચિમ કાંઠે સરદારબ્રિજ તથા આંબેડકરબ્રિજની વચ્ચે એનઆઇડીની પાછળના ભાગે 45,૦૦૦ ચો.મીટર એરિયામાં તો પૂર્વ બાજુએ દધીચિબ્રિજ અને ગાંધી બ્રિજની વચ્ચે શાહપુરના પાછળના ભાગે સ્પોર્ટ્સ કોમ્પ્લેક્સ લોકોને આનંદિત કરશે
પશ્ચિમ કાંઠે સરદારબ્રિજ તથા આંબેડકરબ્રિજની વચ્ચે એનઆઇડીની પાછળના ભાગે 45,૦૦૦ ચો.મીટર એરિયામાં તો પૂર્વ બાજુએ દધીચિબ્રિજ અને ગાંધી બ્રિજની વચ્ચે શાહપુરના પાછળના ભાગે સ્પોર્ટ્સ કોમ્પ્લેક્સ લોકોને આનંદિત કરશે મ્યુનિ. કોર્પોરેશનના સત્તાવાળાઓ રમતપ્રેમી અમદાવાદીઓને સાબરમતી રિવરફ્રન્ટ ખાતે તેના પશ્ચિમ અને પૂર્વ કાંઠે એક-એક મળીને કુલ બે અદ્યતન સ્પોર્ટ્સ કોમ્પ્લેક્સનું નવલું નજરાણું આપવા જઈ રહ્યા છે. આ બંને સ્પોર્ટ્સ કોમ્પ્લેક્સનો કરોડો રૂપિયાનો પ્રોજેક્ટ હવે પૂર્ણતાના આરે આવી પહોંચ્યો છે.
કરોડો રૂપિયાનો પ્રોજેક્ટ હવે પૂર્ણતાના આરે
આ મહિનાના અંત સુધીમાં સ્પોર્ટ્સ કોમ્પ્લેક્સ તૈયાર થઈ જવાના હોઈ તેનો ટૂંક સમયમાં લોકોને લાભ મળતો થઈ જશે.સાબરમતી રિવરફ્રન્ટને તેના વિવિધ પ્રોજેક્ટોથી વધુ ને વધુ લોકોપયોગી બનાવવાના તંત્ર દ્વારા પ્રયાસો થઈ રહ્યા છે. તાજેતરમાં તેને છેક ઇન્દિરા બ્રિજ સુધી લંબાવવાનો નિર્ણય લેવાઈ ચૂક્યો છે. આનાથી રિવરફ્રન્ટની રમ્યતામાં ઔર વૃદ્ધિ થશે. આ કામગીરી તેના થર્ડ ફેઝ હેઠળ હાથ ધરાશે.
કોમ્પ્લેક્સનું નિર્માણ પણ ઝડપભેર થઈ રહ્યું છે
આ ઉપરાંત રિવરફ્રન્ટના નિર્માણાધીન પ્રોજેક્ટમાં પણ હવે કોરોનાના કેસ ઓછા થવાથી ગતિ આવી રહી છે. કોરોનાના કારણે વતન ભેગા થયેલા શ્રમિકો શહેરમાં પરત ફરવાથી સ્પોર્ટ્સ કોમ્પ્લેક્સનું નિર્માણ પણ ઝડપભેર થઈ રહ્યું છે.તંત્ર દ્વારા પશ્ચિમ કાંઠે સરદાર બ્રિજ તથા આંબેડકર બ્રિજની વચ્ચે એનઆઇડીની પાછળના ભાગે અને પૂર્વ કાંઠે દધીચિ બ્રિજથી ગાંધી બ્રિજની વચ્ચે શાહપુરના પાછળના ભાગે અપર પ્રોમિનોડ પર સ્પોર્ટ્સ કોમ્પ્લેક્સનું નિર્માણ થઈ રહ્યું છે. ક્રીડાપ્રેમી યુવાઓ માટે તેમાં વિવિધ જાતની રમતોનું આયોજન કરાયું છે.
ઓપન એરિયામાં મલ્ટિપલ સ્પોર્ટ્સની જોગવાઈ
પશ્ચિમ કાંઠાના સ્પોર્ટ્સ કોમ્પ્લેક્સમાં એનઆઇડીની પાછળના ભાગે 45 હજાર ચો.મીટર એરિયા ધરાવતા ઓપન એરિયામાં મલ્ટિપલ સ્પોર્ટ્સની જોગવાઈ કરાઈ છે, જેમાં ચાર નંગ ક્રિકેટ પીચ, પાંચ નંગ ટેનિસ કોર્ટ, ચાર નંગ મલ્ટિપલ સ્પોર્ટ્સ કોર્ટ, સ્કેટિંગ રિંગ અને સ્કેટ બોર્ડ, 800 મીટર જોગિંગ ટ્રેક, ઇન્ટરનલ રોડ તથા પાર્કિંગ, એડમિનિસ્ટ્રેશન બિલ્ડિંગ, યુટિલિટી બિલ્ડિંગમાં અને ટોઇલેટ બ્લોકનો સમાવેશ કરાયો છે.
મલ્ટિપલ સ્પોર્ટ્સની સુવિધા ઊભી કરાઈ
જ્યારે પૂર્વ કાંઠે શાહપુરના પાછળના ભાગે 8000 ચો.મીટર એરિયા ધરાવતા ઓપન એરિયામાં મલ્ટિપલ સ્પોર્ટ્સની સુવિધા ઊભી કરાઈ છે, જેમાં ચાર નંગ ક્રિકેટ પીચ, બે નંગ ટેનિસ કોર્ટ, 320 મીટર જોગિંગ ટ્રેક, ઇન્ટરનલ રોડ તથા પાર્કિંગ, એડમિનિસ્ટ્રેશન બિલ્ડિંગ, યુટિલિટી બિલ્ડિંગ અને ટોઇલેટ બ્લોકનો સમાવેશ થાય છે. આ બંને સ્પોર્ટ્સ કોમ્પ્લેક્સમાં યુવાઓને પ્રોફેશનલ કોચિંગ મળી રહે તે મુજબનું આયોજન પણ હાથ ધરાયું છે. જોકે કોરોનાના કારણે આ બંને સ્પોર્ટ્સ કોમ્પ્લેક્સના નિર્માણમાં મહિનાઓનો વિલંબ થયો છે.
પૂર્વ કાંઠાનો સ્પોર્ટ્સ કોમ્પ્લેક્સ પૂર્ણ
પૂર્વ કાંઠાનો સ્પોર્ટ્સ કોમ્પ્લેક્સ તો નવેમ્બર-2020માં પૂર્ણ કરવાનો હતો, પરંતુ આ પ્રોજેક્ટમાં કોરોના ઉપરાંત પોલીસ તંત્રની બેદરકારી પણ નડતરરૂપ બની છે. રિવરફ્રન્ટ પર ઈસ્ટ પોલીસ સ્ટેશન દ્વારા પોલીસની કેબિનો બનાવાઈ હોઈ તેના કારણે આ જગ્યામાં એપ્રોચ રોડ, કમ્પાઉન્ડ વોલ તથા જોગિંગ ટ્રેકની કામગીરીને અસર પડી છે. રિવરફ્રન્ટના સત્તાવાળાઓ દ્વારા આ કેબિનો દૂર કરવા પોલીસ તંત્રને વારંવાર પત્રો લખાઈ ચૂક્યા છે. જોકે હવે પોલીસ તંત્ર જાગ્યું હોઈ કેબિનો હટાવાઈ રહી છે.
પશ્ચિમ પશ્ચિમ કાંઠાનું સ્પોર્ટ્સ કોમ્પ્લેક્સ
બીજી તરફ પશ્ચિમ કાંઠાનું સ્પોર્ટ્સ કોમ્પ્લેક્સ જાન્યુઆરી-2021માં પૂરું કરવાનું હતું, જેમાં આશરે પાંચ મહિનાનો વિલંબ થશે. આ બંને સ્પોર્ટ્સ કોમ્પ્લેક્સ પાછળ તંત્ર દ્વારા કુલ રૂ. 25.66 કરોડ ખર્ચાશે, જોકે પ્રોજેક્ટ વિલંબમાં મુકાયો હોવા છતાં સંબંધિત કોન્ટ્રાક્ટરોને એક પણ રૂપિયો વધારાનો નહીં ચૂકવાય તેવો તંત્રનો દાવો છે.