રાજ્યમાં મોંઘવારીના મારથી લોકો પરેશાન થઇ ગયા છે.પેટ્રોલ-ડીઝલ, ગેસ અને ખાતરના ભાવો સતત વધી રહ્યાં છે.જેથી ખેડૂતોને પણ ખેતી કરવી પરવડે તેમ નથી.તો બીજી તરફ સમયસર ખેતરમાં વીજળી પણ મળતી નથી.જેથી કંટાળીને ખેડૂતોએ અનોખી રીતે વિરોધ નોંધાવ્યો હતો.ખેડૂતોએ ખેતરમાં બળદની જગ્યાએ જાતે હળ ચલાવીને વિરોધ નોંધાવ્યો હતો.સરકાર સુધી પોતાની વ્યથા વ્યક્ત કરવા અનોખી રીતે વિરોધ પ્રદર્શન કર્યું હતું.
બળદની જગ્યાએ ખેડૂતો જાતે જ હળ બાંધી ખેતીમાં જોતરાયા
આજ રોજ ધોરાજીના ખેડૂતોએ અલગ જ અંદાજમાં વિરોધ પ્રદર્શન કરી પોતાનો રોષ વ્યક્ત કર્યો હતો. જેમા ખેતરમાં વપરાતા હળનો ઉપયોગ બળદ દ્વારા કરવાને બદલે ખેડૂત પોતે બળદની જગ્યાએ હળ ચલાવી રહ્યા હતા. સરકાર સુધી પોતાની વ્યથા વ્યક્ત કરવા અને વાત પહોંચાડવા આ કીમિયો ખેડૂતોએ અપનાવ્યો હતો. ખેતરમા ખેડૂતો એકઠા થઈ ને પેટ્રોલ ડીઝલ ખાતર ના ભાવો ઘટાડો અને સમયસર ખેત વિજળી આપો તેવા સુત્રોચ્ચાર કર્યા હતા.
ગુજરાતમાં 15 દિવસમાં 10 રૂપિયા ઈંધણ મોંઘું થયું
પેટ્રોલ ડીઝલ ના ભાવમાં સતત ભડકો થઈ રહ્યો છે. પેઅમદાવાદમાં હવે પ્રતિ લિટર 105.09 જ્યારે ડીઝલ પ્રતિ લિટરે 98.08ની આસપાસ પહોંચી ગયું છે.6 એપ્રિલને બુધવાર સવાર 6 વાગ્યાથી નવા ભાવ લાગુ થઈ ગયો છે. ઈંધણમાં છેલ્લા 15 દિવસમાં 10 રૂપિયાનો જંગી વધારો થયો છે. .
ખેડૂતો જાય તો જાય ક્યાં?
ગુજરાતમાં દિન પ્રતિદિન પેટ્રોલ ડીઝલ ગેસ સિલિન્ડર ખાતરના ભાવો વધી રહ્યા છે. ત્યારે આ મોંઘવારી થી ત્રસ્ત મધ્યમ પરીવાર હેરાન પરેશાન થાય છે તો પરીવારનું ગુજરાન કઈ રીતે ચલાવવુ એ પણ એક મોટો પ્રશ્ન છે મહિલાઓનું બજેટ ખોરવાઈ ગયુ છે. વાહન ચાલકો પણ ચિંતિત થયા છે તો ગુજરાત ના ધરતીપુત્રો પણ બાકાત નથી પેટ્રોલ ડીઝલ મોંઘુ થતુ જાય છે ખાતરના ભાવો વધતા જાય છે ત્યારે ખેડૂતો ને ખેતી કરવી પોસાય તેમ નથી.તનતોડ મહેનત કરી ખેડૂતો પાક ઊભા કરતા હોય છે ત્યારે મોંઘવારી તથા પેટ્રોલ ડીઝલના ભાવોમાં તોતીંગ થતા ખેડૂતો ચિંતિત થઈ ગયા છે તો બીજી બાજુ ખેડૂતો ને સમયસર વિજળી મળતી નથી તેમાં પણ ધાંધીયા જોવા મળે છે. સિંચાઇના પાણીના વિકટ સમસ્યાઓ આવી રહી છે. હાલ ગુજરાતનો તાત, ઈંધણના ભાવ ભડકે બળતા જોઇ જીવ બાળી રહ્યો છે.