સૂરત: છેલ્લી અનેક મેચથી કંગાળ ફોર્મમાં રમી રહેલા ઋષભ પંતને પ્રદર્શન સુધારવા માટે બાંગ્લાદેશ સામેની કોલકાતા ટેસ્ટ દરમિયાન જ ટીમ ઇન્ડિયામાંથી રિલીઝ કરી દેવામાં આવ્યો હતો, જેથી તે ડોમેસ્ટિક ક્રિકેટ રમીને પોતાનું ફોર્મ પાછું મેળવી શકે. ટીમ ઇન્ડિયામાંથી રિલીઝ કરાયા બાદ પંત દિલ્હીની ટીમ તરફથી સૈયદ મુસ્તાક અલી ટ્રોફીની મેચમાં હરિયાણા સામે મેદાનમાં ઊતર્યો, પરંતુ અહીં પણ તે દિલ્હીની ટીમને ભારે પડ્યો.
પ્રથમ બેટિંગ કરતા હરિયાણાએ નિર્ધારિત 20 ઓવરમાં 181 રન બનાવ્યા
પંત લગભગ 11 ઓવર ક્રીઝ પર ટકી રહ્યો
દિલ્હીની ટીમને 30 રનથી હારનો સામનો કરવો પડ્યો
પ્રથમ બેટિંગ કરતા હરિયાણાએ નિર્ધારિત 20 ઓવરમાં 181 રન બનાવ્યા. લક્ષ્યનો પીછો કરવા ઊતરેલી દિલ્હીની ટીમને પંત પાસેથી મોટી ઇનિંગ્સની આશા હતી. પંત લગભગ 11 ઓવર ક્રીઝ પર ટકી રહ્યો. 20 ઓવરની મેચમાં આટલો સમય ક્રીઝ પર વીતાવ્યા છતાં ટીમ અને પોતાના ચાહકોને ધમાકેદાર ઇનિંગ્સ દેખાડી શક્યો નહીં. પોતાની ટીમને હાર ભણી ધકેલીને પેવેલિયનમાં પાછો ફર્યો અને દિલ્હીની ટીમને 30 રનથી હારનો સામનો કરવો પડ્યો. 20 ઓવરની મેચમાં પંતે 32 બોલનો સામનો કર્યો અને માત્ર 28 રન જ બનાવી શક્યો.
દિલ્હીની ટીમને પંત પાસેથી ઘણી આશા હતી
દિલ્હીની ટીમને પંત પાસેથી ઘણી આશા હતી, પરંતુ તે જ્યારે આઉટ થયો ત્યારે બહુ ઓછા બોલ બચ્યા હતા અને લક્ષ્ય ઘણું દૂર હતું. એ મેચમાં પંતની વિકેટ બાદ નીતીશ રાણા (37)એ દિલ્હીની ઇનિંગ્સ સંભાળવાની કોશિશ કરી હતી, પરંતુ બીજા છેડેથી સાથ ન મળવાને કારણે દિલ્હીનો રનરેટ ઘણો ધીમો પડી ગયો અને દિલ્હીની ટીમ નિર્ધારિત ઓવરમાં 151 રન જ બનાવી શકી હતી. ટી-20 મેચમાં પણ પંતની ધીમી બેટિંગે ટીમને પરાજય ભણી ધકેલી દીધી હતી.