ટીમ ઇન્ડિયાએ ઇંગ્લેન્ડ સામે નોટિંઘમ ટેસ્ટના પહેલા દિવસે પોતાની પહેલી ઇનિંગમાં 6 વિકેટ ગુમાવીને 307 રન બનાવ્યાં છે. બેટ્સમેનોના શાનદાર ફોર્મથી ટીમ ઇન્ડિયાએ સારો સ્કોર કર્યો છે. આ ટેસ્ટની ખાસ વાત રહી કે દિલ્હીના 20 વર્ષના રિષભ પંતે ટીમ ઇન્ડિયા માટેની ટેસ્ટ કેપ આપવામાં આવી હતી ઇંગ્લેન્ડમાં સામેની ટેસ્ટ મેચથી રિષભ પંતે પોતાનું ટેસ્ટ ડેબ્યૂ કર્યુ છે.
પ્રથમ બે ટેસ્ટ મેચમાં નબળું પ્રદર્શન કરનાર દિનેશ કાર્તિકની જગ્યાએ રિષભ પંતનો સમાવેશ કરવામાં આવ્યો હતો. સાતમા ક્રમે આવેલા રિષભ પંતે આદિલ રાશિદની બોલિંગમાં સિક્સર ફટકારી પોતાના ટેસ્ટ કરિયરની ધમાકેદાર શરૂઆત કરી હતી.
ઈંગ્લેન્ડ સામેની ત્રીજી ટેસ્ટ મેચમાં રિષભ પંતને ટેસ્ટ કેપ મળતાં જ તે ટીમ ઇન્ડિયા તરફથી ટેસ્ટ મેચ રમનાર 291મો ખેલાડી બન્યો હતો. નોંધનીય છે કે આજથી દસ વર્ષ પહેલા 18 ઓગસ્ટ 2008ના રોજ દિલ્હીના જ ખેલાડી વિરાટ કોહલીએ તેનું વન ડે ડેબ્યૂ કર્યું હતું.
રિષભ પંત પોતાની આક્રમક બેટિંગ માટે જાણીતો છે. IPLમાં રિષભ પંતે ધમાલ મચાવી હતી. જેમાં તે ટોપ સ્કોરર રહ્યો હતો. તેના આ પ્રદર્શનની નોંધ લઈને મેનેજમેન્ટે ભારતીય ટીમમાં તેનો સમાવેશ કર્યો છે.